Yelemis 41:16 – 42:3
Nqe cim:
“Kuv yuav qhia txojkev uas koj yuav taug rau koj, kuv yuav qhia koj thiab ua koj tus tuavxam” (Ntawv Nkauj 32:8).
Lus nug rau sawvdaws xav:
– Vim licas Yauhanas coj cov neeg uas nyuam qhuav tau cawmdim khiav mus lawm nram tebchaws Iziv?
– Nws tuaj cuag tus cevlus Yelemis muaj homphiaj dabtsi?
– Yuav uacas peb thiaj muaj kev txiavtxim siab yog?
Tomqab uas “…coj cov neeg uas Yisamayees ntes hauv Mixepas mus rov qab los, tom qab uas Nkedaliyas raug tua tuag lawm, tsis hais cov tubrog, cov pojniam menyuam thiab cov neeg uas ua haujlwm hauv vajntxwv lub loog rov qab hauv Nkinpe-oos los” (nqe 16), pab neeg uas tau Yauhanas coj txiav txim siab khiav lawm nram tebchaws Iziv tsis kam rov mus nyob Mixepas. Vim licas lawv ua li ntawd? Vim lawv ntshai cov Npanpiloos chim thaum hnov xov tias tus tswv xeev Nkedaliyas, uas lawv tsa los ua haujlwm, raug Yisamayees tua tuag lawm. Lawv thiaj taug kev mus thiab mus so rau ntawm Khihas uas nyob ze lub nroog Npelehees, uas ncaj kev mus rau tebchaws Iziv. Lub sijhawm ntawd cov thawj tubrog txhua tus nrog cov pejxeem sawvdaws, tsis hais tus hlob tus yau tuaj cuag tus cevlus Yelemis, thiab taij kom tus cevlus thov Vajtswv pab, lawv hais tias: “Koj thov tus Tswv uas yog peb tus Vajtswv qhia rau peb saib peb yuav mus qhov twg thiab peb yuav ua li cas!” (nqe 3).
Tus Tswv qhia rau tus cevlus Yelemis pom meej txog Yauhanas thiab cov pejxeem tej lus dag (Yelemis 42:20). Txawm tias lub sijhawm ntawd cov Yixalayees twb paub meej txog lawv tus kheej thaum lawv hais tias:“Yav tas los peb muaj coob, tiamsis nimno peb tshuav tsawg heev raws li koj pom no lawm xwb” (nqe 2), thiab lawv paub hais tias tsuas muaj tus Tswv xwb thiaj yuav qhia rau lawv paub mus qhov twg thiab ua licas (nqe 3). Tiamsis lawv tus kheej twb xub txiav txim siab tsis rov qab mus nyob Mixepas, tsis kam nyob hauv lub tebchaws uas raug cov Npanpiloos kav thiab khiav mus rau tebchaws Iziv. Hais tau hais tias Yauhanas muaj kev txiav txim siab yog thaum nws coj pab tubrog mus cawm tau cov neeg raug Yisamayees ntes coj mus, tiamsis nws ho txiav txim siab yuamkev thaum coj cov pejxeem khiav mus nram tebchaws Iziv tsis rov mus nyob Mixepas raws li tej lus tus Tswv twb qhia thiab raws li tus tswv xeev Nkedaliyas tej lus txhawb cov pejxeem lub zog. Yauhanas ua raws li tej uas nws xav hais tias yog, tiamsis nws tseem xav kom tus Tswv tuaj nws tog thiab!
Txij thaum poob rau kev txhaum, tibneeg “tu ncua Vajtswv lub tshwjchim lawm” (Loos 3:23) yog li ntawd peb tsis muaj kev txiav txim siab yog nyob hauv lub neej. Qhov tseeb, muaj ntau zaug peb zoo li Yauhanas, kuj thov tus Tswv coj kev tiamsis ho xav kom tus Tswv ua raws li tej tswvyim uas tus kheej twb npaj tseg lawm!… tomqab ntawd mam thov tus Tswv foom koob hmoov rau tej uas yus txiav txim siab ua! Tus Tswv tsis yog “lub teeb yees siv” rau peb txib. Yuav kom muaj kev txiav txim siab yog thiab mus raws txojkev ncaj kev ncees, tsuas muaj ib txoj haukev xwb ntawd yog tuag nthi ua raws Vajtswv kev coj qhia. Tej zaum peb tsis totaub meej txojkev tus Tswv coj peb mus, tiamsis yuav tsum tuav ruaj kev ntseeg Vajtswv Tus uas muaj hwjchim, muaj tswvyim, Nws yuav muab yam zoo tshajplaws pub rau Nws cov menyuam.
Thov Vajtswv,
Vajtswv Tus uas muaj hwjchim, muaj tswvyim! Thov qhia rau nyuam yaus paub tias tus kheej zoo tsis txaus, nyuam yaus tej kev txiav txim siab muaj qhov yuamkev, kom nyuam yaus tas siab tas ntws taij thov Koj coj qhia thiab txaus siab hlo ua raws Koj lub siab nyiam los ntawm txojkev ntseeg. Amees.
Peb puas txaus siab ua raws tus Tswv kev coj lawm tau?
Nyeem Vajluskub hauv peb lub xyoo: Xakhaliyas 11:1-12:14
Kênh Youtube BHKTHN:
