II Kauleethaus 8:7-8
Nqe cim:
“Cov menyuam, peb tsis txhob hlub luag ntawm lub ncauj lo lus xwb; tiamsis peb yuav tsum pab lawv, sawvdaws thiaj pom hais tias peb muaj lub siab hlub tiag tiag” (I Yauhas 3:18).
Lus nug rau sawvdaws xav:
- Cov ntseeg hauv Pawg Ntseeg Kauleethaus muaj txhij tej yam twg?
- Timthawj Paulus qhia paub yam dabtsi ua timkhawv rau lawv txojkev hlub yog txoj tseeb?
- Peb pheej ua tshwm kev hlub rau cov neeg ibncig licas?
Tomqab uas qhia txog cov ntseeg hauv Pawg Ntseeg Makedaunias tus qauv fij nyiaj siab dav, Timthawj Paulus hais txog tej yam zoo uas cov ntseeg hauv nroog Kauleethaus muaj, nws hais tias: “Nej twb muaj txhua yam txhij lawm, tsis hais cov neeg uas muab siab rau ntseeg, cov uas txawj qhia, cov uas txawj ntse, cov uas kub siab lug pab lwm tus thiab cov uas hlub peb …” (nqe 7). Dhau qhov ntawd, Timthawj Paulus hais muaj zog sis txog nws lub siab ntshaw, yog ntshaw kom cov ntseeg hauv Kauleethaus kuj yuav tsum zoo siab hlo pab ua txoj haujlwm zoo uas yog fij nyiaj pab Pawg Ntseeg Yeluxalees uas tabtom ntsib kev txomnyem, ib yam li cov ntseeg hauv Pawg Ntseeg Makedaunias tus qauv (nqe 1-6). Timthawj Paulus tsis yuam cov ntseeg hauv Kauleethaus ua, tiamsis nws tsuas txhawb lawv lub zog ua tiav nws txojkev ntshaw xwb, nws hais tias: “Kuv tsis yuam nej ua li ntawd, tiamsis kuv tsuas qhia rau nej hais tias lwm cov kub siab lug sib pab licas xwb. Kuv xav paub hais tias nej puas muaj lub siab hlub tiag.” (nqe 8). Qhov no qhia tau hais tias tus tshim ntsuas kev hlub tseeb yog kev ua haujlwm zoo thiab pab lwm tus. Yog li ntawd, Timthawj Paulus thiaj sim cov ntseeg hauv Kauleethaus kom ua timkhawv rau lawv txojkev hlub tseeb los ntawm nplooj siab pab lwm tus.
Vajtswv hlub tibneeg ntiajteb, Nws tsis yog tsuas hais ntawm ncauj xwb, tiamsis ua qhia tshwm los ntawm tes haujlwm ntag, ntawd yog “…txib nws tib Leeg Tub los rau hauv ntiajteb. Tus uas ntseeg nws Leej Tub, tus ntawd yuav tsis tuag, tiamsis yuav tau txojsia ntev dhawv mus ibtxhis” (Yauhas 3:16). Vajtswv kuj xav kom Nws cov menyuam ua qhia tshwm kev hlub rau cov neeg ibncig, thiab ntawm no tsis yog ib lo lus qhuab ntuas kom ua xwb tiamsis vim kev hlub cov neeg ibncig tseemceeb heev, Tswv Yexus thiaj hais sau zog Kaum Nqe Kevcai ua ob nqe tshwjxeeb, kom cov ntseeg Nws yuav tsum ua raws: “‘Hlub tus Tswv uas yog nej tus Vajtswv kom kawg siab kawg ntsws, kawg plab kawg plawv thiab kawg nej lub dag lub zog.’ Nqe no thiaj yog nqe uas tseemceeb dua ntais. Thiab nqe ob uas tseemceeb hais li no hais tias: ‘Hlub koj tej kwvtij zejzog ib yam li koj hlub koj lub cev’” (Mathais 22:37-39).
Hais lo lus hlub yog ib qhov zoo thiab cheemtsum, tiamsis yog tsuas hais ntawm ncauj xwb, ces yeej qhia tsis tau tshwm kev hlub los ntawm tes haujlwm ncajncees, ua zoo pab lwm tus li Vajtswv Txojlus qhia. Timthawj Yauhas kuj qhia meej txog qhov no hais tias: “Cov menyuam, peb tsis txhob hlub luag ntawm lub ncauj lo lus xwb; tiamsis peb yuav tsum pab lawv, sawvdaws thiaj pom hais tias peb muaj lub siab hlub tiag tiag” (I Yauhas 3:18). Thov tus Tswv pab peb cim civ paub hmov tshua lwm tus los ntawm kev sib pab, muab pub lwm tus thiaj yuav qhia tshwm tau kev hlub, vim paub hais tias ntawd yog tus tshim ntsuas paub yog kev hlub tseeb lossis tsuas yog kev hlub ntawm ncauj xwb.
Thov Vajtswv,
Vajtswv tus uas muaj kev hlub! Ua Koj tsaug vim Koj hlub thiab tuag txhiv nyuam yaus saum ntoo khaublig kom nyuam yaus tau txojsia. Thov pab nyuam yaus paub hlub lwm tus los ntawm tes haujlwm thiab txojkev hlub tseeb zoo li Koj tau hlub nyuam yaus. Amees.
Peb puas pheej ua qhia tshwm kev hlub rau lwm tus los ntawm tes haujlwm lawm tau?
Nyeem Vajluskub hauv peb lub xyoo: Exekees 43
Kênh Youtube BHKTHN:
