Klei Aê Diê Blŭ: II Kôrantô 8:7-8
Êlan kliăng: “Ơ phung anak điêt, đăm drei khăp knŏng hŏng boh blŭ leh anăn ti êlah kƀuê ôh, ƀiădah hŏng klei ngă leh anăn hŏng klei sĭt” (I Y-Yôhan 3:18).
Klei êmuh ksiêm mĭn: Ya kdrêč bruă phung đăo ti Sang Aê Diê Kôrantô ngă leh êdah hĭn? Khua ƀĭng kna Y-Pôl brei thâo ya klei bi mklă kơ klei khăp diñu jing sĭt nik? Si drei kreh bi êdah klei khăp hŏng phung riêng gah?
Leh hưn mthâo kơ klei bi hmô phung đăo Sang Aê Diê Masêdôn myơr hŏng klei kmah, Khua ƀĭng kna Y-Pôl lač kơ klei êdah êdi phung đăo Sang Aê Diê Kôrantô, diñu “jăk snăk hlăm jih jang bruă: hlăm klei đăo, hlăm klei blŭ, hlăm klei thâo săng, hlăm jih klei hur har, leh anăn hlăm klei diih khăp kơ hmei…” (êlan 7). Mơ̆ng anăn, Khua ƀĭng kna Y-Pôl ktang bi êdah klei ñu čang hmăng kơ phung đăo Kôrantô ăt êdah hĭn kơ bruă jăk, myơr đru kơ Sang Aê Diê Yêrusalem dôk tuôm hŏng klei dleh dlan, msĕ si klei bi hmô mơ̆ng phung đăo hlăm Sang Aê Diê ti krĭng Masêdôn (êlan 1-6). Khua ƀĭng kna Y-Pôl amâo mtrŭn asăp amâodah mgô̆ phung đăo Kôrantô ôh ƀiădah knŏng čiăng mđĭ ai digơ̆ bi leh bruă ñu čiăng, anăn jing “…bi sĭt klei sĭt suôr diih hlăm bruă klei khăp anei” (êlan 8). Klei anei brei ƀuh hnơ̆ng mkă klei khăp sĭt suôr jing bruă jăk, đru phung mkăn. Kyua anăn, ñu lông dlăng phung đăo Kôrantô bi mklă klei khăp sĭt suôr pô mơ̆ng ai tiê bi đru êdah êdi.
Aê Diê khăp kơ anak mnuih, Ñu amâo djŏ knŏng lač khăp hlăm boh blŭ đuč ôh ƀiădah bi êdah leh klei khăp hŏng bruă ngă klă sĭt, “… brei Anak Ñu pô mâo knŏng sa čô, čiăng kơ hlei pô đăo kơ Anak Ñu anăn amâo rai tuč ôh, ƀiădah mâo klei hdĭp hlŏng lar” (Y-Yôhan 3:16).
Aê Diê ăt čiăng kơ mnuih ƀuôn sang Ñu bi êdah klei khăp kơ phung riêng gah, leh anăn anei amâo djŏ knŏng jing klei mtă ôh ƀiădah jing knuih yuôm bhăn mơ̆ng bruă khăp kơ phung riêng gah anăn Khua Yang Yêsu klah čŭn Pluh Mta Klei Bhiăn jing dua mta klă klơ̆ng, mta phŭn phung tui hlue Khua Yang brei hlue ngă: “Yêsu lač kơ ñu, “Ih srăng khăp kơ Khua Yang Aê Diê ih hŏng jih ai tiê, hŏng jih mngăt, leh anăn hŏng jih klei mĭn ih. Klei mtă anăn jing prŏng hĭn leh anăn êlâo hĭn. Leh anăn klei mtă tal dua jing msĕ snăn mơh, Ih srăng khăp kơ pô riêng gah ih msĕ si kơ ih pô” (Y-Mathiơ 22:37-39).
Blŭ klei khăp jing klei jăk leh anăn čiăng êdi, khădah snăn tơdah knŏng hlăm klei blŭ đuč snăn klei khăp ka bi êdah kluôm ôh bruă kpă ênô, klei jăk msĕ si Klei Aê Diê Blŭ mtô. Khua ƀĭng kna Y-Yôhan ăt bi hriăm klei anei klă mngač: “Ơ phung anak điêt, đăm drei khăp knŏng hŏng boh blŭ leh anăn ti êlah kƀuê ôh, ƀiădah hŏng klei ngă leh anăn hŏng klei sĭt” (I Y-Yôhan 3:18). Akâo kơ Khua Yang đru drei thâo mđing uêñ bi đru hŏng bruă ngă klă sĭt, kah mbha čiăng bi êdah klei khăp, kyua thâo anei jing hnơ̆ng mkă klei khăp sĭt nik amâodah knŏng klei blŭ hlăm ƀăng êgei đuč.
Drei khăng bi êdah klei khăp hŏng phung riêng gah hŏng bruă ngă klă sĭt mơ̆?
Ơ Aê Diê klei khăp! Bi mni kơ Ih kyua Ih khăp leh kơ kâo leh anăn djiê hrô kơ kâo ti kyâo bi kal čiăng kâo dưi hdĭp. Akâo kơ Ih đru kâo thâo khăp kơ pô mkăn hŏng bruă ngă leh anăn klei khăp sĭt nik msĕ si Khua Yang khăp leh kơ kâo.
Dlăng Klei Aê Diê Blŭ hlăm tlâo thŭn: Y-Êsêkiêl 43
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
