Yelemis 40:5-12
Nqe cim:
“…Koj cia li mus nrog Ahikas tus tub Nkedaliyas uas yog Safas tus xeebntxwv nyob; tus vajntxwv uas kav tebchaws Npanpiloos tsa nws ua tswvxeev saib tej nroog hauv tebchaws Yudas” (Yelemis 40:5b).
Lus nug rau sawvdaws xav:
- Nkedaliyas tau Vajntxwv Nenpukajnexales tsa ua tes haujlwm dabtsi?
- Vim licas tus vajntxwv kav tebchaws Npanpiloos thiaj xaiv nws?
- Niaj hnub nimno, tus Tswv xaiv neeg los ua Nws tes haujlwm zoo licas?
- Peb yuav tsum ua licas thaum paub hais tias tus Tswv xaiv yus?
Tomqab uas cov neeg hauv nroog Yeluxalees thiab tebchaws Yudas raug ntes coj mus ua qhev tim Npanpiloos, ces hauv lub tebchaws tsuas tshuav cov neeg txomnyem seem nyob lawm xwb. Vajntxwv Nenpukajnexales tau tsa Ahikas tus tub Nkedaliyas uas yog Safas tus xeebntxwv ua tswvxeev kav tebchaws. Nws tes haujlwm yog saibxyuas cov neeg uas seem nyob, lawv yog “cov neeg txomnyem uas tsis raug ntes coj mus rau tim tebchaws Npanpiloos” (nqe 7). Thaum hnov hais tias tus vajntxwv kav tebchaws Npanpiloos tsa Nkedaliyas ua tswvxeev, cov Yudas cov nomtswv thiab cov tubrog qee leej uas tsis kam mus thawj cov Npanpiloos thiaj tuaj cuag Nkedaliyas hauv lub nroog Mixepas, tsis tas li ntawd xwb, cov Yudas uas nyob hauv tebchaws Mau-am, Amoos, Edoos thiab cov uas nyob lwm lub tebchaws kuj tuaj cuag Nkedaliyas thiab (nqe 11-12). Nkedaliyas ntuas lawv txhua tus txhob ntshai ua qhev rau cov Npanpiloos, cia li nyob twjywm hauv lub tebchaws thiab mloog lus, ces yuav tau ua neej thajyeeb ua noj ua haus. Tshuav nws tus kheej yuav nyob hauv lub nroog Mixepas sawv cev rau lawv tabmeeg cov Npanpiloos, lawv lub luag haujlwm yog rau siab khwv noj khwv haus xwb. Lub xyoo ntawd, Vajtswv pub rau lawv sau tau txiv hmab txiv ntoo ntau kawg li (nqe 12b). Qhov no yog lub cim qhia hais tias Nkedaliyas tes haujlwm tawg paj txi txiv lawm.
Peb xav hais tias, vim Nkedaliyas yog neeg txawjntse, ua haum vajntxwv kav Npanpiloos siab thiaj tau vajntxwv tsa ua haujlwm. Lossis tej zaum yog vim nws muaj ib leej txiv hwm Vajtswv uas yog Ahikas, tus uas cawm Tus cevlus Yelemis dim (Yelemis 26:24) nws thiaj tau tus Tswv xaiv. Tiamsis qhov tseeb, tus Tswv xaiv leejtwg nyob ntawm Nws lub siabnyiam (Malakaus 2:14) thiab tus Tswv siv tus uas Nws xaiv los ua tiav Nws lub homphiaj (Tes Haujlwm 9:15-16). Tseeb tiag, thaum vajntxwv kav Npanpiloos xaiv neeg los ua tswvxeev, nws yeej xaiv raws li nws lub siab xav, tiamsis siab tshaj tibneeg tej kev xav ntawd yog muaj Vajtswv lub hwjchim tswjkav. Vajtswv Txojlus qhia hais tias: “Tus TSWV tswj vajntxwv lub siab yoojyim ib yam li nws tswj tus dej” (Pajlug 21:1).
Niaj hnub nimno, tus Tswv kuj xaiv coob leej los ua Nws tes haujlwm, Nws xaiv ib txhia los ua xibhwb saibxyuas, xibhwb qhia Txojmoo Zoo, Nws kuj xaiv ib txhia los ua lwm yam haujlwm, kom sawvdaws tau koom tes hauv kev txhim kho Pawg Ntseeg ntawm qhov chaw lawv nyob. Txhob muaj leejtwg xav hais tias, yog yus xaiv tus Tswv, tiamsis nco ntsoov hais tias yog tus Tswv xaiv yus. Kuj txhob khav hais tias, tus Tswv xaiv kuv vim kuv muaj peevxwm lossis ua tau zoo dua lwm tus, tiamsis yuav tsum xam pom txoj koobhmoov tus Tswv pub rau yus uas yog neeg tsis tseemceeb, kom yus thiaj paub ua tus Tswv tsaug thiab paub txo hwjchim ua tus Tswv haujlwm zoo dua qhov qub.
Thov Vajtswv,
Tus Tswv, nyuam yaus xam pom txog txoj koobhmoov loj kawg nkaus uas Koj pub rau nyuam yaus, Koj tau xaiv thiab hloov nyuam yaus lubneej ua Koj tes haujlwm. Thov pab nyuam yaus ua lubneej raws li Koj Txojlus qhia kom ua tau ntau yam zoo rau lwm tus. Amees.
Peb puas paub ua tus Tswv tsaug vim Nws xaiv peb los ua Nws tes haujlwm lawm tau?
Nyeem Vajluskub hauv peb lub xyoo: Exekees 40:5-37
Kênh Youtube BHKTHN:
