Klei Aê Diê Blŭ: Y-Yêrêmi 40:5-12.
Êlan kliăng: “…anak êkei Y-Ahikam čô Y-Saphan, pô mtao Ƀaƀilôn mjing khua kiă kriê kơ jih jang ƀuôn čar Yuđa” (Y-Yêrêmi 40:5b)
Klei êmuh ksiêm mĭn: Ya bruă Mtao Y-Nêƀukatnêtsar mjing brei Y-Gêdalia ngă? Ya ngă mtao Ƀaƀilôn ruah ñu? Hruê anei si ngă Aê Diê ruah phung mă bruă kơ Ñu? Ya drei ngă tơdah thâo Aê Diê ruah drei?
Tơdah leh jih jang phung dôk ti ƀuôn Yêrusalem leh anăn čar Yuđa arăng mă ba jing mnă kơ čar Ƀaƀilôn, snăn hlăm čar Yuđa ăt dôk mă đơ phung ƀun ƀin knap mñai. Mtao Y-Nêƀukatnêtsar mjing leh Y-Gêdalia, anak êkei Y-Ahikam, čô Y-Saphan jing khua kiă kriê hlăm čar. Bruă kơ ñu jing kiă kriê jih jang phung ƀuôn sang ăt dôk, hlăm anăn mâo: “phung êkei, mniê, leh anăn hđeh, jih jang phung ƀun ƀin hlăm čar phung arăng amâo atăt jing mnă kơ čar Ƀaƀilôn ôh” (êlan 7). Hmư̆ klei mtao Ƀaƀilôn mdưm leh Y-Gêdalia jing khua kiă kriê, phung khua kahan leh anăn phung kahan Yuđa dôk ti gŭ klei dưi mơ̆ng djăp anôk hriê bi tuôm hŏng ñu ti ƀuôn Mispa, amâo djŏ knŏng dŭm anăn ôh, wăt phung Yuđa bra đuĕ leh ti Môap, Amôn, Êđôm leh anăn mơ̆ng jih jang anôk mkăn sa ai lŏ wĭt kơ čar diñu pô (êlan 11-12). Y-Gêdalia mtă kơ diñu đăm huĭ ôh mă bruă kơ phung Kaldê, ăt dôk hlăm čar leh anăn gưt kơ mtao hlăm gưl anei snăn digơ̆ srăng mâo klei hơĭt pưk sang ênang duah ƀơ̆ng. Bi ñu dê srăng dôk ti ƀuôn Mispa čiăng bi ala kơ digơ̆ ti anăp phung Kaldê, bruă digơ̆ jing hơĭt ai tiê buh pla mkra mjing. Thŭn anăn Aê Diê brei kơ diñu mâo lu boh kriăk ƀâo leh anăn boh kroh mkăn (êlan 12). Drei dưi lač anei jing klei bi knal klă kơ boh tŭ dưn mơ̆ng bruă Y-Gêdalia mă tŭ leh.
Năng ai drei srăng mĭn kyua Y-Gêdalia jing mnuih knhâo leh anăn djŏ ai mtao Ƀaƀilôn snăn mtao knang. Amâodah kyua ñu mâo sa čô ama thâo huĭ mpŭ kơ Aê Diê jing Y-Ahikam, pô bi mtlaih leh Khua pô hưn êlâo Y-Yêrêmi (Y-Yêrêmi 26:24) kyuanăn Aê Diê ruah ñu. Ƀiădah boh klă gơ̆, Aê Diê ruah hlei pô Ñu čiăng (Y-Markôs 2:14) leh anăn kyuadah Aê Diê čiăng yua pô Ñu ruah leh pioh mă bruă kơ klei Ñu kñăm čiăng (Bruă Phung Khua Ƀĭng Kna 9:15-16). Sĭt nik tơdah mtao Ƀaƀilôn ruah mjing bruă khua kiă kriê, mtao ăt mâo hnơ̆ng kčah ñu pô mơh, ƀiădah klei Aê Diê kiă kriê jing êgao hĭn kơ klei anak mnuih tĭng yap. “Ai tiê mtao jing msĕ si sa hnoh êa hlăm kngan Yêhôwa, Yêhôwa brei gơ̆ đoh phă anôk Ñu čiăng” (Klei Bi Hriêng 21:1).
Hruê anei, Khua Yang ăt ruah nanao đrông lu mnuih pioh ênông klam bruă sang Ñu. Mâo pô Aê Diê ruah pioh myơr jih klei hdĭp jing khua pô mtô, pô mtô, pô hiu hưn Klei Mrâo Mrang Jăk, mâo mnuih Aê Diê ruah pioh kơ lu bruă mdê mdê čiăng jih jang bi mguôp sa ai mkŏ mjing bi mđĭ kyar Phung Sang Aê Diê hlăm krĭng pô. Đăm mĭn ôh kâo ruah Khua Yang ƀiădah hdơr bĕ Khua Yang yơh ruah kâo. Msĕ mơh đăm mâo pô mĭn mgao ôh Khua Yang ruah kâo kyuadah kâo mâo klei thâo hĭn amâodah bruă kâo ngă mâo boh tŭ dưn hĭn kơ mnuih mkăn ƀiădah brei thâo ƀuh klei pap Aê Diê pioh kơ kâo jing sa čô mnuih amâo klă ênŭm ôh čiăng thâo hdơr knga bi mni kơ Aê Diê leh anăn hŏng klei luă gŭ mă bruă jăk hĭn.
Si ngă drei hdơr knga mơ̆ kơ Khua Yang kyua Ñu mơak ruah leh drei pioh mă bruă kơ Ñu?
Ơ Khua Yang, kâo thâo kral klei pap prŏng êbeh dlai Ih brei leh kơ kâo, Hŏng klei mơak Ih ruah kâo čiăng bi mlih klei hdĭp kâo jing sa čô mnuih mă bruă kơ Ih. Đru bĕ kâo hdĭp nanao tui si klei Ih mtă čiăng klei hdĭp kâo ba boh tŭ dưn kơ lu mnuih.
Dlăng klei Aê Diê Blŭ hlăm tlâo thŭn: Y-Êskiêl 40:5-37.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
