Klei Aê Diê Blŭ: II Klei Yăl Dliê 17:7-19
Êlan kliăng: “Y‑Môis iêô bi kƀĭn jih jang Israel leh anăn lač kơ diñu, ‘Hmư̆ bĕ, Ơ Israel, klei bhiăn leh anăn klei mtă kâo blŭ brei diih hmư̆ hruê anei, brei diih hriăm leh anăn gưt hlue hŏng jih ai tiê.’ ” (Klei Mtô Mñă Klei Bhiăn 5:1)
Klei Êmuh Ksiêm Mĭn: Hlăm thŭn tal tlâo mtao Y‑Jôsaphat kiă kriê, phă anôk ñu tiŏ mnuih nao leh anăn ya bruă brei digơ̆ ngă? Ya klei ngă anăn bi truh kơ jih jang čar jŭm dar čar Yuđa bi mǐn? Ya klei Aê Diê brei kơ mtao Y‑Jôsaphat? Ya klei drei ngă leh, leh anăn dôk ngă čiăng kơ klei hdĭp myang drei dưi đĭ hriê kơ prŏng?
Êngao ti klei bi rai hĕ anôk dlông leh anăn phung rup yang Asêra mơ̆ng čar Yuđa, mtao Y‑Jôsaphat msĕ mơh tiŏ nao mnuih djă ba hdruôm hră Klei Bhiăn Yêhôwa “hiu hlăm jih jang ƀuôn čar Yuđa leh anăn mtô kơ phung ƀuôn sang.” Mtao amâo knŏng duah Aê Diê ama ñu, gưt kơ klei Aê Diê mtă hjăn ñu pô ôh ƀiădah ñu čiăng jih jang phung ƀuôn sang ngă msĕ snăn mơh čiăng kơ Aê Diê bi kjăp ƀuôn ala mtao ñu “hlăm kngan ñu” (II Klei Yăl Dliê 17:4-5). Mtao thâo klă tơdah čiăng kơ phung ƀuôn sang lui kkuh rup yang, duah Aê Diê leh anăn gưt kơ klei Aê Diê mtă snăn êlâo hĭn mtô kơ digơ̆ klei bhiăn Aê Diê čiăng kơ digơ̆ thâo săng leh anăn mtrŭt digơ̆ ngă tui si klei Aê Diê mtă. Mtao khăp kơ Klei Aê Diê Blŭ leh anăn ñu čiăng phung ƀuôn sang khăp kơ Klei Aê Diê Blŭ msĕ mơh. Kyuanăn, “Klei huĭ kơ Yêhôwa truh kơ jih jang ƀuôn ala mtao hlăm čar jŭm dar čar Yuđa, leh anăn diñu amâo bi blah ôh hŏng Y‑Jôsaphat” (êlan 10). Tơdah mtao Y‑Jôsaphat tiŏ nao mnuih “hiu hlăm jih jang ƀuôn čar Yuđa” mtô Klei Bhiăn Aê Diê snăn jih jang ƀuôn ala mtao “jŭm” čar Yuđa amâo jhŏng ngă klei bi rŭng ôh ƀiădah đup gưt kơ ñu sơăi. Phung Philistin tĭng yŭ djă ba mnơ̆ng myơr leh anăn tuh jia kơ mtao Y‑Jôsaphat hŏng prăk; msĕ mơh phung Arabi tĭng dhŭng čar Yuđa ba myơr kơ ñu lu êbâo drei hlô mnơ̆ng rông. Mtao Y‑Jôsaphat ƀrư̆ hruê ƀrư̆ đĭ hriê jing prŏng, mdrŏng sah, leh anăn jing ktang hĭn nanao (êlan 12).
Mtao Y‑Jôsaphat khăp kơ Klei Aê Diê Blŭ kyuanăn hră Klei Bhiăn Aê Diê dôk nanao mbĭt hŏng ñu, leh anăn ñu dlăng nanao hră Klei Bhiăn anăn čiăng “kơ ñu dưi hriăm huĭ mpŭ kơ Yêhôwa Aê Diê ñu, êjai djă pioh jih jang klei blŭ mơ̆ng klei bhiăn leh anăn klei mtă anăn, leh anăn ngă tui hlue klei anăn” (Klei Mtô Mñă Klei Bhiăn 17:18-19). Amâo djŏ knŏng dŭm anăn ôh, msĕ mơh mtao mtô kơ phung ƀuôn sang ñu klei bhiăn leh anăn klei Aê Diê mtă čiăng kơ digơ̆ hriăm leh anăn gưt hlue kyuadah ñu thâo anăn yơh jing klei Aê Diê čiăng (Klei Mtô Mñă Klei Bhiăn 5:1).
Yang Yêsu lač: “Hlei pô mâo klei Kâo mtă leh anăn djă pioh digơ̆, ñu anăn yơh jing pô khăp kơ Kâo. Hlei pô khăp kơ Kâo, Ama Kâo srăng khăp kơ pô anăn, Kâo srăng khăp kơ ñu leh anăn bi êdah Kâo pô kơ ñu” (Y‑Yôhan 14:21). Pô lač ñu khăp kơ Aê Diê jing pô mâo klei Aê Diê blŭ leh anăn gưt hlue. Klei mưn kơ pô anăn jing Aê Diê Tlâo Čô Yang srăng khăp kơ ñu leh anăn bi êdah kơ ñu lu hĭn. Akâo Khua Yang đru drei tui knuih jăk Mtao Y‑Jôsaphat, khăp kơ Klei Aê Diê Blŭ leh anăn đru lu mnuih mkăn thâo kơ Klei Aê Diê Blŭ čiăng kơ digơ̆ dưi dlăng, hriăm leh anăn ngă hlue čiăng kơ klei hdĭp myang ƀrư̆ hruê ƀrư̆ “đĭ jing prŏng hĭn”.
Si drei bi êdah klei drei khăp kơ Klei Aê Diê Blŭ leh anăn đru mnuih mkăn khăp kơ Klei Aê Diê Blŭ?
Wal lač: Ơ Khua Yang, đru kâo thâo khăp kơ Klei Ih Blŭ leh anăn đru mnuih mkăn thâo kơ Klei Ih Blŭ, khăp kơ Klei Ih Blŭ čiăng kơ klei hdĭp myang kâo leh anăn lu mnuih mkăn srăng “đĭ jing prŏng hĭn”, leh anăn dôk kjăp nanao.
Dlăng Klei Aê Diê Blŭ hlăm tlâo thŭn: Klei Čŏk Hia 4:16–5:22
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
