II Xwmtxheej 17:7-19
Nqe cim.
“Mauxes hu tagnrho cov Yixalayees tuaj ua ke thiab hais rau lawv tias, “Cov Yixalayees, nej cia li mloog tej kevcai uas hnub no kuv qhia rau nej. Kom nej paub coj thiab ua raws li tej kevcai ntawd” (II Kevcai 5:1).
Lus nug rau sawvdaws xav:
- Thaum Vajntxwv Yehausafas kav tebchaws tau peb xyoos, nws txib neeg
mus qhov twg thiab lawv mus ua dabtsi?
- Qhov ntawd ua rau cov tebchaws ib ncig xav licas?
- Vajntxwv Yehausafas tau tus Tswv pub yam dabtsi?
- Peb tau ua thiab tabtom ua dabtsi kom lub neej sab ntsujplig loj hlob?
Tomqab uas Vajntxwv Yehausafas rhuav tej chaw teev dab thiab tus mlom Aselas povtseg, nws txib neeg coj Phau ntawv sau tus Tswv txoj kevcai “mus cob qhia cov Yudas nyob txhua lub nroog.” Tsis yog Vajntxwv tsuas nrhiav nws cov yawgkoob tus Vajtswv thiab ua raws li tus Tswv tej kevcai xwb, nws tseem xav kom cov pejxeem kuj ua ib yam nkaus li ntawd kom lub tebchaws tau tus Tswv pub “nyob ruaj khov” (II Xwmtxheej 17:4-5). Vajntxwv paub hais tias yog xav kom tus Tswv haivneeg tso tseg kev pe mlom, tig los nrhiav tus Tswv thiab ua raws tus Tswv tej kevcai, ces qhov xubthawj yuav tsum yog qhia kom lawv paub txog tus Tswv tej kevcai, lawv thiaj yuav totaub thiab ua raws li Vajtswv Txojlus qhia. Vajntxwv hlub Vajtswv Txojlus thiab nws kuj xav kom nws haivneeg hlub Vajtswv Txojlus. Twb yog vim li ntawd “Tus TSWV ua rau tej tebchaws uas nyob ibncig ntshai thiab tsis tuaj tua Vajntxwv Yehausafas lawm” (nqe 10). Thaum Vajntxwv Yehausafas txib neeg “mus…txhua lub nroog” cob qhia tus Tswv tej kevcai ces cov tebchaws “ibncig” Yudais ntshai thiab tsis kam tuaj tsim kev kub ntxhov. Cov Filitees nyob sab hnub poob coj nyiaj thiab khoom ntau heev tuaj pub rau Vajntxwv Yehausafas; cov neeg Alav nyob nram qab teb kuj coj tej tsiaj coob heev tuaj pub rau nws. Vajntxwv Yehausafas yim hnub yim muaj hwjchim, muaj zog, thiab yim npluanuj (nqe 12).
Vajntxwv Yehausafas nyiam Vajtswv Txojlus nws thiaj coj rawv Vajtswv tej kevcai rau ib sab, niaj hnub nyeem kom “paub hwm tus TSWV thiab ua raws li txhua yam uas qhia tseg rau hauv phau ntawv ntawd” (II Kevcai 17:18-19). Tsis tas li ntawd xwb, Vajntxwv tseem pab kom cov pejxeem tau hnov tus Tswv tej kevcai thiab tej lus samhwm ntawd kom lawv tau kawm thiab ua raws, vim Vajntxwv paub hais tias ntawd yog yam uas haum Vajtswv siab (II Kevcai 5:1).
Tswv Yexus hais tias: “Tus uas lees yuav Kuv tej lus qhia thiab ua raws li tej lus ntawd, tus ntawd yog tus uas hlub Kuv. Tus uas hlub Kuv, Kuv Txiv yuav hlub tus ntawd; Kuv yuav hlub tus ntawd thiab qhia Kuv rau nws paub” (Yauhas 14:21). Tus neeg hais tias hlub Tswv Yexus, tus ntawd yeej nyiam Vajtswv Txojlus thiab ua raws. Tus ntawd yuav tau nqi zog, tau Vajtswv hlub thiab qhia paub ntxiv txog Vajtswv. Thov tus Tswv pab peb ua tau raws li Vajntxwv Yehausafas tus qauv zoo uas yog nyiam Vajtswv Txojlus thiab pab lwm tus paub txog Vajtswv Txojlus, lawv thiaj tau nyeem, kawm thiab ua raws kom loj hlob hauv sab ntsujplig.
Thov Vajtswv,
Tus Tswv, thov qhia kom nyuam yaus paub nyiam Koj Txojlus thiab pab tau lwm tus los cuag Koj Txojmoo Zoo, kom nyuam yaus thiab coob leej sab ntsujplig “loj hlob”, muaj zog sis rau Koj. Amees.
Peb qhia tshwm kev nyiam Vajtswv Txojlus licas thiab pab lwm tus nyiam Vajtswv Txojlus licas lawm?
Nyeem Vajluskub hauv peb lub xyoos: Nkauj Quaj Ntsuag 4:16-5:22
