Klei Aê Diê Blŭ: Klei Mmuñ Hđăp 119:17-24
Êlan kliăng: “Klei Ih hưn jing klei hơ̆k mơak kơ kâo, jing phung kčĕ kơ kâo”
(Klei Mmuñ Hđăp 119:24)
Klei êmuh ksiêm mĭn: Ya mta klei pô čih akâo hlăm trăn Klei Mmuñ Hđăp anei? Si hdră êlan ñu hriăm leh hlăk dôk tlă anăp hŏng klei ƀuah, klei bi kdơ̆ng? Ti anôk phŭn phung kčĕ drei khăng tui duah hlăk tuôm hŏng klei dleh dlan?
Anei jing kdrêč klei duê tal 3 hlăm 22 kdrêč klei duê mơ̆ng Klei Mmuñ Hđăp 119, kčưm dơ̆ng hŏng boh hră klei Hêbrơ Gimel, lŏ čih wĭt klei pô čih kwưh akâo hŏng Aê Diê ti anăp lu klei lông dlăng hlăm klei hdĭp. Êlâo hĭn, ñu akâo kơ Aê Diê “ngă klei jăk” čiăng kơ ñu dưi dôk hdĭp leh anăn tui gưt Klei Aê Diê Blŭ (êlan 17). Ñu wah lač hŏng klei luă gŭ leh anăn thâo kral klei kñăm čiăng kơ klei hdĭp ñu jing pioh bi guh kơang kơ Anăn Aê Diê. Knŏng hŏng klei pap Aê Diê yơh drei dưi dôk hdĭp. Kyuanăn, tơdah Aê Diê brei drei dôk hdĭp snăn brei drei ƀuăn rơ̆ng djă pioh tui gưt Klei Aê Diê Blŭ leh anăn hdĭp kyua bi guh kơang kơ Ñu.
Tui čuê, pô čih kwưh akâo “Khua Yang mblang ală” ñu čiăng kơ ñu “dưi ƀuh klei yuôm bhăn hlăm klei bhiăn Aê Diê” (êlan 18). Ñu akâo kơ Aê Diê mă mđuĕ hĕ mơ̆ng ală ñu ya mta klei ngă bi kgăn klei ñu dưi ƀuh klei yuôm bhăn hlăm Klei Blŭ hdĭp leh anăn myang mơ̆ng Aê Diê (Hêbrơ 4:12). Drei khăng lui ai tiê klei mĭn leh anăn ală mngăt myang drei lu đei mta klei guôm hĕ ngă bi bum leh anăn amâo dưi thâo ƀuh ôh klei yuôm bhăn hlăm Klei Aê Diê Blŭ. Kyuanăn, brei drei akâo nanao kơ Khua Yang bi “mblang ală” mngăt myang drei čiăng kơ drei dưi thâo săng Klei Blŭ Ñu leh anăn gưt ngă hlue.
Pô čih thâo kral kơ ñu knŏng jing “sa čô tue ti lăn ala”, kyuanăn ñu jih ai tiê kwưh akâo kơ Khua Yang “đăm mdăp klei Ih mtă kơ kâo ôh” (êlan 19). Ñu hưn klă klei hdĭp ñu jing dŏ Aê Diê kluôm dhuôm leh anăn ñu êpa mhao čiăng dưi thâo săng ya klei Aê Diê mtă. Ñu brei thâo: “Mngăt kâo mčah leh kyua čiăng thâo nanao klei Ih mtă” (êlan 20). Phung anak ƀuôn sang Aê Diê brei mâo ai tiê êpa mhao kơ Klei Aê Diê Blŭ leh anăn čuăn hdĭp gưt ngă tui si klei Ñu mtă. Pô čih brei thâo phung mgao srăng tŭ klei Aê Diê ƀuah (êlan 21). Mơ̆ng anăn, ñu lŏ akâo kơ Khua Yang mă mđuĕ hĕ klei arăng bi hêñ leh anăn bi êmut kyuadah ñu djă pioh leh klei Aê Diê Hưn (êlan 22). Ñu lač klă wăt tơdah tŭ lu klei arăng bi kdơ̆ng, ngă jhat, ñu ăt dôk sĭt suôr ksiêm mĭn klei bhiăn Aê Diê (êlan 23). Kyuadah Klei Aê Diê Blŭ yơh jing klei hơ̆k mơak leh anăn klei bhiăn Aê Diê yơh jing klei kčĕ tloh ênoh kơ ñu (êlan 24).
Grăp čô drei mâo sơăi hdruôm hră Klei Aê Diê Blŭ hlăm kngan, brei drei mđing uêñ duh kơ klei hdĭp drei hŏng klei ksiêm hriăm Klei Aê Diê Blŭ grăp hruê, kyuadah Klei Aê Diê Blŭ yơh jing phŭn klei kčĕ yuôm bhăn leh anăn tloh ênoh Aê Diê brei kơ drei. Tuôm hŏng klei jhat truh hĕ? Brei ksiêm dlăng Klei Aê Diê Blŭ! Dôk rŭng ênguôt hĕ? Tui duah bĕ klei mơak hlăm Klei Aê Diê Blŭ! Klei lông dlăng dôk wang jŭm dar hĕ? Tui duah bĕ klei kčĕ yuôm bhăn hlăm klei bhiăn Aê Diê! Brei ksiêm hriăm Klei Aê Diê Blŭ čiăng kơ drei mâo nanao klei Khua Yang kčĕ hlăm djăp mta klei truh.
Si ngă drei duah ƀuh mơ̆ phŭn klei kčĕ yuôm bhăn hlăm Klei Aê Diê Blŭ kơ drei pô?
Wal lač: Ơ Khua Yang, akâo Ih mblang ală kâo, brei kâo thâo ƀuh klei kčĕ yuôm bhăn hlăm Klei Aê Diê Blŭ leh anăn gưt ngă hlue čiăng kơ kâo dưi bi knal klei jăk mơak leh anăn klei mơak ktuê knhuang êlan tui hlue Khua Yang.
Dlăng Klei Aê Diê Blŭ hlăm tlâo thŭn: Y‑Yêrêmi 52
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
