Klei Aê Diê Blŭ: Hêbrơ 13:16
Êlan kliăng: “Đăm wơr bĭt ôh ngă klei jăk leh anăn bi mbha mnơ̆ng diih mâo kơ phung mkăn, kyuadah klei ngă yang msĕ snăn bi mơak kơ Aê Diê.” (Hêbrơ 13:16)
Klei êmuh ksiêm mĭn: Pô čih hră Hêbrơ lač kơ ya mnơ̆ng ngă yang hruê anei grăp čô dưi myơr sơăi kơ Khua Yang? Si klei hdĭp thâo khăp tui si Klei Aê Diê Blŭ mtô? Si brei phung đăo bi êdah klei khăp ti krah ala ƀuôn hruê anei?
Hlăm ênuk Klei Bi Mguôp Hđăp, phung ƀuôn sang Israel myơr lu mta mnơ̆ng ngă yang ti Sang Yang čiăng kkuh mpŭ kơ Aê Diê. Mâo êma mta mnơ̆ng myơr ngă yang diñu yua pioh myơr kơ Aê Diê, anăn jing mnơ̆ng myơr čuh, mnơ̆ng myơr kpŭng ƀhĭ, mnơ̆ng myơr kơ klei êđăp ênang, mnơ̆ng myơr kyua klei soh, leh anăn mnơ̆ng myơr kyua klei gao klei bhiăn (Bruă Lêwi kdrêč 1-7). Ƀiădah lĕ, hră čih mơĭt Hêbrơ 13:16 mñă kơ sa “mnơ̆ng ngă yang” mdê jih jang mnuih dưi myơr sơăi kơ Khua Yang, anăn jing “ngă klei jăk leh anăn bi mbha mnơ̆ng diih mâo kơ phung mkăn”. Anei amâo jing kdrăp bhiăn ti êngao ôh ƀiădah klei hdĭp thâo khăp leh anăn kah mbha mnơ̆ng kơ mnuih mkăn.
Klei Aê Diê Blŭ brei thâo Aê Diê jing Klei Khăp (I Y-Yôhan 4:8), kyuanăn Ñu uêñ mĭn hĭn kơ phung ƀun ƀin leh anăn kơ phung dôk găn klei knap mñai. Khua Yang amâo knŏng dlăng kơ klei wah lač, kơ ênoh prăk myơr, amâodah klei kkuh mpŭ ti Sang Aê Diê ôh, ƀiădah Khua Yang dlăng wăt kơ knhuah drei dôk hdĭp hŏng phung mkăn msĕ mơh. Kyuanăn, hdĭp kpă ênô, thâo khăp, đru mnuih găn klei dleh dlan, bi thâo săng brei leh anăn bi mbha mnơ̆ng drei mâo kơ mnuih mkăn yơh jing mnơ̆ng ngă yang bi mơak kơ Aê Diê. Khua Yang dlăng kơ pô brei pap kơ mnuih ƀun ƀin jing “brei Yêhôwa čan, leh anăn Yêhôwa srăng lŏ bi wĭt kơ ñu tui si bruă jăk ñu ngă leh.” (Klei Bi Hriêng 19:17). Khua Yang Yêsu mtô msĕ mơh hlăm Y-Mathiơ 23:23, mta klei yuôm amâo djŏ myơr lu amâodah ƀiă ôh, ƀiădah ai tiê thâo khăp leh anăn klei săn asei mlei sĭt. Mta phŭn yuôm hĭn kơ klei bhiăn jing klei kpă ênô, klei thâo pap leh anăn klei đăo. Khua Yang lač, “Jăk mơak yơh phung thâo pap, kyuadah Aê Diê srăng pap kơ diñu.” (Y-Mathiơ 5:7). Mniê djiê ung ƀun ƀin myơr knŏng dua asăr jin ƀiădah Khua Yang bi mni kyuadah gơ̆ myơr leh hŏng jih ai tiê leh anăn klei đăo (Y-Luk 21:1-4). Klei anei brei ƀuh jih jang mnuih dưi hdĭp thâo khăp leh anăn dưi ngă klei jăk sơăi thâodah hŏng lu amâodah ƀiă mnơ̆ng.
Hruê anei, ti krah ala ƀuôn lu klei čuôt klih leh anăn amâo mâo klei thâo pap, phung đăo mâo klei iêô mthưr amâo knŏng bi êdah klei khăp hŏng klei blŭ ƀiădah hŏng bruă ngă hdĭp kpă ênô leh anăn thâo khăp hŏng bruă ngă sĭt êmĭt: đru phung mnuih dôk găn klei dleh dlan knap mñai; klei blŭ êdu êun, bi juh, đru rŭ mnuih awăt êdu klei mĭn, mnuih êdu ai; bi mđĭ ai mnuih ênguôt hnĭng hŏng klei blŭ leh anăn bruă ngă sĭt ai tiê; hdĭp sĭt kpă leh anăn dôk dơ̆ng ƀơ̆ng huă ênuah ênô hŏng jih jang mnuih. Hŏng bruă ngă đơ điêt jih jang mnuih dưi thâo ƀuh anăn yơh, jing “mnơ̆ng ngă yang” bi mơak kơ Aê Diê, leh anăn jing klei hưn bi sĭt hdĭp kơ klei khăp Khua Yang hlăm ala ƀuôn hruê anei. Akâo Khua Yang brei drei amâo wơr bĭt ôh ngă bruă jăk, thâo uêñ mĭn bi mbha mnơ̆ng drei mâo kơ mnuih mkăn, leh anăn bi đru hdơ̆ng pô, čiăng kơ knhuah hdĭp drei ti krah ala ƀuôn dưi bi mơak kơ Khua Yang nanao.
Si drei myơr leh kơ Khua Yang mnơ̆ng ngă yang jing bruă jăk leh anăn ai tiê thâo brei pap kơ mnuih mkăn?
Wah lač: Ơ Khua Yang, bi hriăm kâo hdĭp thâo khăp leh anăn ngă bruă jăk ti krah ala ƀuôn hruê anei. Akâo Khua Yang đru kâo thâo uêñ mĭn, bi mbha mnơ̆ng kâo mâo leh anăn đru rŭ phung mnuih dôk găn klei dleh dlan riêng gah kâo. Brei klei hdĭp kâo jing mnơ̆ng ngă yang bi mơak kơ Khua Yang grăp hruê. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Yôp 35
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
