Philip 2:14-18
“Gah iĕm hlôh wao tôm tơdrong boih, thoi lĕ kơ hơdah ŭnh, na iĕm athei pơchrang ăn tơdrong hơdah iĕm kơ lu sư kơplah oei tơ teh âu.” (Philip 2:15b)
Nơ̆r jet tơchĕng pơwao:
- Jô̆ jŏk hăm wă năm wă ưh noh thoi yơ?
- ‘Bok Pôl pơtih gia kơ teh đak âu thoi yơ păng sư athei lu kon ‘Bok Kei-Dei kăl kơ arih thoi yơ?
- Lu bơ̆n arih thoi yơ wă kơ pơchrang hơdah nhen thoi ŭnh lăm teh đak âu?
‘Bok Pôl đei tơdrong krao wơ̆n: “mă pơm tơdrong kiơ nĕ kơ jô̆ jŏk păng nhen wă năm wă ưh” (trong 14). ‘Nâu ưh kơ trŏ kơ nơ̆r bơtho tho gah tơdrong lăm jơ-hngơ̆m thoi yơ, mă lei ‘nâu jơ̆ tơdrong hơnă blŭng a wă kơ arih ‘lơ̆ng tơpăt hăm tơdrong ‘lơ̆ng rơgoh. “jô̆ jŏk” pơma gah tơdrong tơtok, ưh kơ lăp đon; “wă năm wă ưh” pơma gah tơdrong đei tơdrong pơjah, hăm ưh kơ đei pôm trong. Dôm tơdrong âu đei ‘bôh lăm Khŭl bơngai lui blŭng a sơ̆ păng lu bơngai lui dang ei. Noh ưh kơ trŏ minh tơdrong pơma tơ’bưh băl đĕch, mă lei tơdrong âu tơ’bôh kơ đơ̆ng lăm jơ-hngơ̆m ưh kơ lui ngeh dih băl.
Pôl đei pơtih gia teh đak âu “nhen thoi adrĕch adrŭng lu bơngai kơnê̆”, anih lăng tơdrong kơnê̆ nhen thoi hmă đĕch. ‘Bơ̆t anih ‘noh tơdrong kơnhăm wă bơwei kơdih akâu hlôi đơ̆ng tơdrong đei jô̆ jŏk wă kơ lu bơ̆n jing “’thoi noh đe anăn kon ‘Bok Kei-Dei, adrin pơm ‘lơ̆ng ling-lang, na huay kơ đei tơdrong yoch, mă khan iĕm oei tŏk-bŏk lu bơngai kơnê̆, lu bơngai hơlĕnh pơdăr, lu bơngai dang lĕ kơ oei lăm măng mu na lu sư gơh pơm dôm tơdrong ‘noh. Gah iĕm hlôh wao tôm tơdrong boih, thoi lĕ kơ hơdah ŭnh, na iĕm athei pơchrang ăn tơdrong hơdah iĕm kơ lu sư kơplah oei tơ teh âu.” (trong 15). Tơdrong âu pơma pran gag tơdrong ‘lơ̆ng rơgoh ưh kơ sĭ weh ataih đơ̆ng kon bơngai lăm teh đak , mă lei kăl kơ arih pha ra lăm teh đak. Lu bơ̆n oei arih tŏk ‘bŏk ‘bĕnh kơ tơdrong yoch mă lei lu bơ̆n pơchrang hơdah tơdrong ‘lơ̆ng tơpăt Kră Yang ‘Bok Kei-Dei. Tơdrong ‘lơ̆ng tơpăt đei lơi yua kơplah lu bơ̆n dơ̆ng kơjăp kĕ jei đơ̆ng tơdrong pơhlŭ đơ̆ng dôm tơdrong arih ‘mê̆ ‘mach lăm teh đak âu. Mă khan oei tŏk ‘bŏk “lu bơngai kơnê̆” thoi noh, lu kon Kră Yang kăl kơ “bơwei tơdrong lui đei tơdrong arih” păng “pơchrang hơdah nhen thoi ŭnh lăm teh đak âu” (trong 15b). Kơplah chăl arih bơ̆n đei tơdrong tơplih đơ̆ng ‘Bok Krist, lei tơdrong hơdah noh gô kơdih sư pơchrang lăm chăl arih bơ̆n, nơ̆r pơma dah tơdrong bơ̆n pơm hăm bơngai nai. Păng khŏa đei pơih lăm tơdrong arih ‘lơ̆ng tơpăt noh jơ̆ “bơwei tơdrong lui đei tơdrong arih”. Tơdah ưh kơ chĕp kơjăp Nơ̆r Kră Yang, lei tơdrong lăm teh đak gô dui hor ba bơ̆n. Mă lei tơdah đei Nơ̆r Kră Yang lăm jơ-hngơ̆m bơ̆n, Nơ̆r Kră Yang gô tơgŭm bơ̆n lăm tơdrong tơchĕng, nơ̆r pơma păng tơdrong bơ̆n jang. Tơdrong mă bơ̆n lăng hơlen ‘nâu Pôl đei pơma tơdrong bơ̆n pơm ‘noh ưh kơ sĭ kơ tơdrong pŭ trăp ôh mă lei noh jơ̆ tơdrong hiôk chơt. Sư đei pơma pơtih gia kơ akâu kăn sư nhen thoi tơmam soi pơyơ̆r kơ Kră Yang păng sư hiôk chơt tơpă lăm tơdrong ‘noh (trong 17-18).
Minh chăl arih ‘lơ̆ng rơgoh ưh kơ sĭ kơ minh chăl arih pơmat tat ôh mă lei minh chăl arih đei yua, minh chăl arih đei pơyơ̆r kơ Kră Yang păng đei yua ăn kơ bơngai nai. Tơpă lăm chăl arih, arih ‘lơ̆ng rơgoh lăm teh đak âu ưh kơ ‘bônh ôh. Lu bơ̆n gô đei tơ’bơ̆p lăm tơdrong anat pat, tơdrong pơhlŭ păng lơ bơngai arih pha ra kơ bơ̆n. Mă lei kơplah lăm jơ thoi noh, tơdrong hơdah lu bơ̆n đe gô ‘bôh nhen tơ pă. Kơplah lu bơ̆n đei rơih iŏk tơpăt lăm lơ bơngai đei tơdrong hơlĕnh, rơih iŏk ‘mêm mơnat lăm lơ bơngai đei tơdrong kret tơsen, rơih iŏk tơdrong iŏk đon ala lăm lơ bơngai đei tơdrong pơ-ang akâu kơ dih, lei jơ̆ lu bơ̆n đei pơchrang hơdah tơdrong Kră Yang.
Ơ Kră Yang, apinh ih tơgŭm inh băt kơ hŭt lê̆ tơdrong jô̆ jŏk păng đei tơdrong pơjah pơjăng dih băl, bơwei Nơ̆r Kră Yang păng arih ‘lơ̆ng tơpăt rim năr. Apinh Ih tơgŭm inh jing hơdah pơchrang kơ lăm teh đak, wă kơ anăn Kră Yang đei ư-ang. Yua anăn Kră Yang Yêsu Krist. Amen.
Chăl arih lu bơ̆n đei pơchrang hơdah Kră Yang Yêsu Krist lăm teh đak âu thoi yơ?
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: Jop 34.
Kênh Youtube BHKTHN:
