Hêbrơ 13:16
“Iĕm ‘nĕ hiơt kơ tơdrong pơm ‘lơ̆ng kơ đe, iĕm athei ra tơmam iĕm kơdih wă tơgŭm lu ‘nhŏng oh dơnuh. Tơdrong noh kư̆m dang ra tơmam soi mơ̆n, wă pơhiôk kơ ‘Bok Kei-Dei.” (Hêbơrơ 13:16)
Nơ̆r jet tơchĕng pơwao:
- Bơngai đei chih Hla bơar Hêbrơ đei pơma tơmam soi pơyơ̆r kơ Kră Yang mă bu bu kŭm gơh pơyơ̆r kơ Kră Yang?
- Thoi yơ wă khan arih ‘mêm mơnat kiơ̆ thoi Kră Yang đei bơtho?
- Lu bơngai lui kăl kơ pơm tơ’bôh tơdrong ‘mêm kơ plah arih lăm teh đak âu thoi yơ?
Lăm Pah so, lu bơngai Israel đei pơyơ̆r lơ tơmam soi wă pơyơ̆r kơ Kră Yang lăm hnam akŭm wă kơ kuh kơ Kră Yang ‘Bok Kei-Dei. Đei pơđăm tơdrong tơmam soi wă pơyơ̆r ăn kơ Kră Yang ‘Bok Kei-Dei, noh jơ̆ tơmam soi ‘buh pơkhôi, soi tơpŭng, tơmam soi hơđơ̆ng, tơmam soi huai iŏk tơdrong yoch, păng tơmam soi huai iŏk tơdrong glăi (Lêwi chăl 1-7). Mă lei, lăm kơthơ Hêbrơ 13:6 đei tơ’blŏk minh “tơdrong tơmam soi” pha nai dơ̆ng mă đĭ đăng bơngai bơ̆n gơh pơyơ̆r kơ Kră Yang ‘Bok Kei-Dei, noh jơ̆ “tơdrong pơm ’lơ̆ng hăm song ăn tơmam kơ bơngai nai” ‘nâu jơ̆ tơdrong tơdrong ưh kơ sĭ pơm gah ‘nguaih đĕch ôh mă lei chăl arih đei tơdrong ‘mêm mơnat păng băt song ăn tơmam ăn kơ bơngai nai.
Sơ̆p hla bơar Nơ̆r ‘Bok Kei-Dei đei tơbăt ăn kơ bơ̆n Kră Yang jơ̆ tơdrong ‘mêm mơnat (I Yôhan 4:8), thoi noh na Kră Yang đei hyơ̆k bơngơ̆t kơ lu bơngai dơnuh hin păng lu bơngai mă đei tơdrong pơmat tat. Kră Yang ưh kơ sĭ lăng minh tơdrong krao khan đĕch, dah jên tơmam bơ̆n đei pơyơ̆r lơ, dah tơdrong bơ̆n akŭm kơkuh kơ Sư lăm hnam akŭm, mă lei Kră Yang lăng bơ̆n arih sa hăm kon pơlei pơla thoi yơ. Thoi noh, arih tơpăt, ‘mêm mơnat, tơgŭm bơngai đei tơdrong pơmat tat, păng đei băt mơnat păng song tơmam noh jơ̆ tơmam soi mă Kră Yang lăp đon dêh. Kră Yang lăng lu bơngai mă mơnat ăn kơ bơngai dơnuh noh jơ̆ “Bơngai bu băt mơnat kơ bơngai dơnuh hoh, noh thoi ăn kơ Kră Yang mơng; Kră Yang pơkă wă tơwih ăn thoi tơdrong ‘lơ̆ng sư pơm.” (Pơđơ̆k 19:17). Kră Yang Yêsu kŭm đei bơtho lăm Mathiơ 23:23, tơdrong kăl ưh kơ trŏ pơyơ̆r lơ dah tŏ sĕt, mă lei tơdrong kăl noh jơ̆ jơ-hngơ̆m ‘mêm păng ‘maih tơgŭm tơpă mă khan tơdrong noh pơm ăn kơ bơ̆n lôh ră. Tơdrong kăl gĭt kăl hloh kơ tơdrong tơpăt noh jơ̆ tơdrong trŏ ling lang, jơ-hngơ̆m ‘mêm păng đon lui (Luka 21:1-14). Tơdrong noh tơ’bôh rim ‘nu bơngai bơ̆n kăl kơ arih ‘mêm mơnat păng pơm tơdrong ‘lơ̆ng mă khan mŭk tơmam lơ dah tŏ sĕt.
Dang ei, lăm teh đak đei lơ tơdrong kret tơsen păng ưh kơ wă lăng tơgŭm dih băl. lu bơngai lui kơ Kră Yang đei nơ̆r krao wơ̆n ưh kơ sĭ tơ’bôh kơ tơdrong ‘mêm hăm nơ̆r pơma đĕch, mă lei kăl kơ arih hăm tơdrong ‘lơ̆ng tơpăt păng ‘mêm mơnat đơ̆ng tơdrong jang ‘bôh tơpă: Tơgŭm bơngai đei tơdrong pơmat kơplah lu sư tơ’bơ̆p tơdrong anat anot; nơ̆r pơma pơlung, tơgŭm kơ jơhngơ̆m đon bơngai đei rơdu, lu bơngai ưh pă đei hơmĕng; đei nơ̆r pơtrŭt lu bơngai đei tơdrong ơh sơ’ngon hăm nơ̆r pơma păng dŏng tơgŭm tơpă lăm tơdrong jang tơpă; arih tơpăt hăm ‘lơ̆ng hăm đĭ đăng bơngai. Đơ̆ng tơdrong jang iĕ thoi noh na đĭ đăng bơ̆n kư̆m gơh pơm thoi noh ngăl tơdrong noh jơ̆ “tơmam soi pơyơ̆r kơ Kră Yang” noh jơ̆ Kră Yang lăp đon păng tơdrong ‘noh jơ̆ tơdrong pơsĭt kơ tơdrong ‘mêm kơ Kră Yang lăm teh đak dang ei. Apinh Kră Yang ăn kơ lu bơ̆n ‘nĕ kơ hiơt pơm tơdrong ‘lơ̆ng băt tơgŭm tơmam, păng tơgŭm tơdrong jang dih băl wă kơ bơ̆n arih lăm teh đak âu lăp đon thoi Kră Yang wă.
Ơ Kră Yang, apinh ih bơtho inh băt kơ arih ‘mêm mơnat păng pơm ‘lơ̆ng lăm teh đak dang ei. Apinh inh tơgŭm inh băt hyơ̆k, tơgŭm klah song kơ dôm lu bơngai mă pơmat tat oei jum dăr kơ inh. Inh hơpơi wă jing tơmam soi sơmah lăp đon kơ jơhngơ̆m đon Kră Yang rim năr. Yua anăn Kră Yang Yêsu Krist, Amen.
Lu bơ̆n đei pơyơ̆r kơ Kră Yang tơmam soi păng pơm tơdrong ‘lơ̆ng song ăn kơ bơngai nai thoi yơ bơih?
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: Jop 35
Kênh Youtube BHKTHN:
