Henplais 13:16
Nqe cim:
“Nej yuav tsum nco ntsoov ua haujlwm zoo thiab ib tug pab ib tug, rau qhov tej ntawd haum Vajtswv siab.” (Henplais 13:16)
Lus nug xav:
– Tus sau tsab ntawv Henplais hais txog yam khoom fij twg uas niaj hnub no txhua tus puavleej muaj peev xwm muab fij rau tus Tswv?
– Kev ua neej sib hlub raws li Vajtswv Txojlus qhia yog zoo li cas?
– Cov ntseeg yuav tsum qhia tshwm txojkev hlub li cas hauv ntiajteb tiam no?
Nyob rau tiam Vajluskub Qub, cov Yixalayees muab ntau yam khoom fij xyeem rau Vajtswv hauv lub Tuamtsev. Muaj tsib yam khoom fij, yog khoom fij hlawv huvsi, khoom fij qoob loo, khoom fij sib raug zoo (lossis thaj yeeb), khoom fij daws txim thiab khoom fij daws kev txhaum (Levis Kevcai tshooj 1–7). Tiamsis Henplais 13:16 hais txog ib yam “khoom fij” ntxiv uas txhua tus puavleej muaj peev xwm muab fij rau tus Tswv, ntawd yog “ua haujlwm zoo thiab ib tug pab ib tug.” Qhov no tsis yog ib txoj kevcai ua sab nraud xwb, tiamsis yog kev ua neej sib hlub thiab sib faib rau lwm tus.
Vajtswv Txojlus qhia hais tias Vajtswv yog tus muaj kev hlub (I Yauhas 4:8), yog li ntawd Nws thiaj mob siab rau cov neeg pluag thiab cov uas raug kev txomnyem. Tus Tswv tsis yog tsuas saib mus rau tej lus peb thov, tej nyiaj peb muab fij, lossis kev pehawm hauv Tuamtsev xwb, tiamsis Nws tseem saib mus rau tej uas peb ua rau lwm tus thiab. Yog li ntawd, kev ua neej ncaj ncees, hlub lwm tus, pab cov txomnyem, muaj lub siab khuvleej thiab pub lwm tus, puavleej yog tej khoom fij uas haum Vajtswv siab. Tus Tswv suav hais tias tus uas hlub thiab pab cov neeg pluag yog tus “qiv rau tus TSWV ntag, ces tus TSWV yuav them rov…” (Pajlug 19:17). Tswv Yexus kuj qhia hauv Mathais 23:23 tias, yam tseem ceeb tsis yog muab fij ntau lossis tsawg, tiamsis yog lub siab hlub thiab kev txi tus kheej tiag tiag. Yam tseem ceeb hauv txoj kevcai yog kev ncaj ncees, kev hlub tshua thiab kev ntseeg. Tswv Yexus hais tias: “Cov uas muaj lub siab hlub lwm tus, cov ntawd tau koob hmoov; Vajtswv yuav hlub lawv!” (Mathais 5:7). Tus poj ntsuam pluag tsuas muab ob lub nyiaj me me fij xwb, tiamsis Tswv Yexus qhuas nws vim nws muab fij los ntawm lub siab thiab kev ntseeg (Lukas 21:1–4). Qhov no qhia tau hais tias txawm peb muaj thiab pluag, los peb yeej muaj peev xwm sib hlub thiab ua tau haujlwm zoo.
Niaj hnub nimno, nyob hauv lub ntiajteb uas tibneeg muaj kev qia dub thiab tsis quav ntsej lwm tus, cov ntseeg raug nqua hu los ua lub neej qhia tshwm txojkev hlub tsis yog ntawm ncauj xwb, tiamsis yuav tsum qhia dhau los ntawm tej haujlwm tseeb, xws li: pab cov neeg pluag thiab cov uas tabtom ntsib kev txomnyem; hais lus mos muag, nplig thiab txhawb cov uas qaug zog lossis poob siab; siv ncauj lus thiab kev ua haujlwm los txhawb cov ntsib kev nyuaj siab lub zog; ua neej ncaj ncees, hais qhov tseeb thiab ua zoo rau txhua tus. Tej haujlwm me me no yog yam uas txhua tus muaj peev xwm ua tau. Tej ntawd dhau los ua tej “khoom fij” uas haum Vajtswv siab thiab yog ib zaj lus timkhawv uas muaj sia qhia tshwm Vajtswv txojkev hlub hauv zej zog txhua hnub. Thov tus Tswv pab kom peb nco ntsoov ua haujlwm zoo, muaj lub siab hlub thiab sib pab sib txhawb, kom peb lub neej pab tau lwm tus ua haum Vajtswv siab.
Thov Vajtswv,
Tus Tswv, thov qhia kom nyuam yaus paub ua neej sib hlub thiab ua haujlwm zoo hauv zej zog txhua hnub. Thov pab nyuam yaus muaj lub siab hmov tshua, pab thiab txhawb cov neeg txomnyem uas nyob ibncig. Thov cia nyuam yaus lub neej dhau los ua ib yam khoom fij uas haum Koj siab txhua hnub. Nyuam yaus tuav Tswv Yexus Khetos lub npe thov, Amees.
Peb fij tej khoom uas yog kev ua haujlwm zoo thiab ib tug pab ib tug rau Vajtswv zoo licas lawm?
Nyeem Vajluskub hauv peb lub xyoos: Yauj 35
Kênh Youtube BHKTHN:
