Mathais 11:28-30
Nqe cim:
“Kuv yog tus uas muaj siab dawb siab zoo; yog li ntawd, nej cia li los kwv kuv tus quab thiab kawm tej uas kuv qhia, nej thiaj yuav tau so” (Mathais 11:29).
Lus nug rau sawvdaws xav:
- Tswv Yexus hais txog Nws tus kheej licas?
- Nws xav kom cov uas raws Nws qab yuav tsum ua dabtsi?
- Qhov kawg ntawm tus uas ua raws li tus Tswv tej lus yog dabtsi?
- Peb tabtom uas raws tus Tswv siabnyiam licas?
Txuas ntxiv lo lus nqua hu los ntseeg tus Tswv nyob hauv nqe 28, Tswv Yexus nqua hu cov uas twb los ntseeg Nws lawm cia li kawm Nws ua haujlwm pab lwm tus. Tswv Yexus tau ua qauv zoo hauv kev ua haujlwm pab lwm tus los ntawm kev txo hwjchim, siab mos muag, siab dawb siab zoo, thiab Nws xav kom peb kwv Nws tus quab thiab kawm Nws tus qauv. Daim duab tus tsiaj kwv quab yog xav hais txog kev mloog lus thiab ua haujlwm, Tswv Yexus mloog Vaj Leej Txiv lus los hauv ntiajteb tu lwm tus thiab muab Nws txojsia los txhiv ntau leej (Mathais 20:28). Tus Tswv xav kom peb kawm tu lwm tus zoo li Nws tau ua. Koobhmoov thaum peb kawm raws tus Tswv yog peb tus ntsujplig yuav tau so. “Tau so” muaj lub ntsiab hais tias yuav tsis qaug zog, tus Tswv yuav ntxiv zog rau peb ua tiav lub luag haujlwm uas Nws muab rau peb ua thiab Nws yuav ua rau peb txaus siab thaum ua Nws haujlwm. Tus Tswv coglus rau peb hais tias:“Tus quab uas kuv muab rau nej kwv yoojyim kwv, thiab lub nra uas kuv muab rau nej ris, lub ntawd tsis hnyav” (nqe 30), Nws tsis cia peb ris nra tibleeg tiamsis Nws yuav nrog peb ris nra thiab.
Cov ntseeg niaj hnub nimno tau nqua hu los ntseeg Tswv Yexus thiab kawm Nws tus qauv ua haujlwm. Peb yuav tsum xam pom cov neeg uas tus Tswv cia nyob ibncig, peb thiaj yuav ua tau haujlwm pab lawv. Tshwjxeeb yog lub sijhawm muaj kab mob kis, teebmeem nyiaj txiag, ntsib kev txomnyem, ntsib teebmeem,… Muaj coob leej tabtom ntsib kev txomnyem, tas kev cia siab, ntawd yog sijhawm rau Pawg Ntseeg thiab cov ntseeg qhia tshwm kev sib hlub sib pab.
Tswv Yexus xav kom peb kawm Nws tus qauv hauv kev ua haujlwm los ntawm tus cwjpwm siab mos muag thiab siab dawb siab zoo. Peb tsis ua kom luag pom hais tias tus kheej tseemceeb, peb tsis ua haujlwm kom luag qhuas, peb kuj tsis saib hlob qhov uas tau lwm tus nco txiajntsig lossis puas tsimnyog lawv tau peb pab. Peb yuav “tau so” lossis “txaus siab” thaum kawm Cawmseej Yexus tus qauv ua haujlwm. Yim ua raws tus Tswv, peb yim tau txais tus Tswv kev txhawb zog thiab tau Nws nyob nrog thaum peb pab lwm tus. Thov tus Tswv qhia peb txawj sib nug sib tshua kom pom lwm tus tej kev cheemtsum thiab nqis tes sib pab los ntawm kev hlub. Thiab thov tus Tswv pab peb kawm Nws tus qauv ua haujlwm pab lwm tus los ntawm lub siab mos muag thiab siab dawb siab zoo.
Thov Vajtswv,
Tus Tswv, thov ua Koj tsaug vim nyuam yaus tau cawmdim thaum los ntseeg Koj. Thov qhia nyuam yaus paub pab lwm tus thiab pub nyuam yaus tau so hauv Koj thaum ua haujlwm pub rau lwm tus. Amees.
Peb puas tau so hauv tus Tswv thaum tas siab tas ntsws ua haujlwm pab lwm tus lawm tau?
Nyeem Vajluskub hauv peb lub xyoos: Yelemis 12
Kênh Youtube BHKTHN:
