Mathais 18:15-20
Nqe cim zaj kawm:
“Yog koj ib tug kwvtij ua txhaum rau koj, koj cia li mus qhia nws qhov txhaum rau nws thaum neb ob leeg xwb. Yog nws mloog koj lus, koj yuav tau nws rov los ua koj kwvtij li qub.” (Mathais 18:15)
Lus nug xav:
– Lus qhia txog txojcai daws kev txhaum hauv Pawg Ntseeg qhia tshwm kev ncaj ncees thiab kev hlub li cas?
– Peb siv txojcai tus Tswv qhia hauv Pawg Ntseeg li cas?
Tswv Yexus qhia cov thwjtim txog txojcai daws kev txhaum hauv zej zog. Ntu Vajluskub no tsis yog tsuas hais txog kev qhuab ntuas ib tug kwvtij xwb, tiamsis tseem yog lub hauvpaus rau kev ncaj ncees thiab kev hlub hauv Pawg Ntseeg. Dhau ntawm qhov no, Pawg Ntseeg txojkev dawb huv tau tuav nyob ruaj khov, thiab kuj qhia tshwm Vajtswv txojkev hlub tshua.
Tus Tswv qhia hais tias thaum ib tug kwvtij hauv Pawg Ntseeg “ua txhaum rau koj” ces qhov xubthawj yuav tsum “mus qhia nws qhov txhaum rau nws” ncaj qha uas muaj neb ob leeg xwb. Kauj ruam daws teebmeem no qhia tshwm kev ncaj ncees tsis cia li zam rau kev txhaum, tiamsis qhib ib lub sijhawm rau tus uas ua txhaum hloov siab lees txim. Yog “nws tsis mloog koj lus” ces yuav tsum muaj ib lossis ob tug ntxiv los ua timkhawv kom paub meej qhov tseeb. Tus Tswv lo lus qhia no yog kom muaj kev ncaj ncees, tsis txhob cia muaj kev iab liam. Yog “nws tsis mloog koj lus” ces yuav tsum qhia rau Pawg Ntseeg kom sawvdaws txiav txim ua ke, kom muaj kev ncaj ncees thiab txojkev dawbhuv hauv Pawg Ntseeg.
Tus Tswv tej lus qhia kuj qhia tshwm kev hlub hauv Pawg Ntseeg. Qhov xubthawj, lub homphiaj uas mus ntsib thiab tham ntawm neb ob leeg xwb yog kom “tau nws rov los ua koj kwvtij li qub” (nqe 15). Kauj ruam thib ob thiab thib peb, uas yog caw cov timkhawv los koom thiab coj qhov teebmeem mus rau Pawg Ntseeg, qhia txog kev hlub dhau ntawm kev ua siab ntev thiab xav kom peb tus kwvtij hloov siab lees txim tig rov qab los. Txawm yog tus uas tawv ncauj yuav raug suav zoo li “lwm haivneeg lossis yog ib tug neeg uas sau se”, los Pawg Ntseeg yeej tseem hlub, vim tus Tswv thiab Pawg Ntseeg yeej tsis tso cov neeg zoo li no tseg hauv zej zog. Pawg Ntseeg yeej tseem qhia tshwm txojkev hlub siab dav thaum sawvdaws koom siab thov Vajtswv, thiab tus Tswv coglus hais tias Nws yuav nrog lawv nyob ua ke (nqe 18-20).
Tej lus qhia daws kev txhaum hauv Pawg Ntseeg qhia rau peb pom hais tias kev ncaj ncees thiab kev hlub tau muab los sib koom ua ke, sib txuam cais tsis tau. Yog tsuas daws kev txhaum raws kev ncaj ncees xwb, ces yuav yooj yim dhau los ua kev nruj thiab tsis muaj siab hlub. Yog tsuas daws raws kev hlub xwb, ces yuav yooj yim txuas tes nrog kev txhaum. Vajtswv cov menyuam yuav tsum zam tej kev daws teebmeem pheej pom muaj, uas yog tsimnyog mus sib ntsib sib tham ntawm ob leeg xwb, tiamsis ho mus ntxhi qhia rau coob tug. Tsimnyog sib qhuab ntuas xwb, tiamsis ho siv txojcai los daws teebmeem. Tsimnyog sib pab kom rov zoo, tiamsis ho sib tawm tsam ib leeg tshem ib leeg tawm mus. Tsimnyog coj qhov teebmeem mus rau Pawg Ntseeg txiav txim, tiamsis ho muab kev txhaum zais tsis kam qhia tawm, thiab lwm yam. Pawg Ntseeg yuav tsum ua neej raws li txojcai uas tus Tswv qhia, txojcai ntawd qhia tshwm tus Tswv txojkev ncaj ncees thiab kev dawb huv, tsis cia li zam rau kev txhaum, tiamsis kuj qhia tshwm tus Tswv txojkev hlub thiab kev ua zoo. Thaum Pawg Ntseeg ib leeg ua rau ib leeg raws li kev ncaj ncees thiab kev hlub, ces Pawg Ntseeg yuav tuav tau txojkev sib koom siab hauv tus Tswv, sib txhim kho thiab huamvam mus ntxiv.
Thov Vajtswv,
Tswv Yexus, ua tsaug uas Koj tau hlub nyuam yaus, tuag theej nyuam yaus lub txim kom nyuam yaus tau suav hais tias yog neeg ncaj ncees tabmeeg Vajtswv. Thov pab kom nyuam yaus coj ncaj ncees thiab muaj kev hlub rau lwm tus hauv Pawg Ntseeg raws li Koj Txojlus qhia. Nyuam yaus tuav Yexus Khetos lub npe thov, Amees.
Tom qab kawm zaj no, peb yuav tsum hloov dabtsi?
Nyeem Vajluskub hauv peb lub xyoos: Ntawv Nkauj 136-137
Kênh Youtube BHKTHN:
