Klei Aê Diê Blŭ: Klei Kbiă 32:25‑29
Êlan kliăng: “Hlei pô tĭng kơ Yêhôwa, brei hriê kơ kâo.” Leh anăn jih jang phung anak êkei Lêwi bi kƀĭn hŏng ñu” (Klei Kbiă 32:26).
Klei êmuh ksiêm mĭn: Si klei hrŏng ruah phung ƀuôn sang Aê Diê? Ênoh mnuih arăng mdjiê hlăm gưl anei jing hlei pô? Klei anei brei thâo kơ ya klei kơ klei kkuh kơ rup yang? Ya klei diih bi mklă mơ̆ng klei hriăm anei?
Leh bi ƀhĭ rup êmô mah jing ƀhơ̆k, tuh hlăm êa leh anăn brei phung ƀuôn sang mnăm, Y‑Môis ƀuh phung ƀuôn sang Aê Diê phưi tha ngă kơ diñu jing klei tlao mưč ti anăp phung roh, arăng mưč mač, anăn ñu dôk ti anăp ƀăng jang lač, “Hlei pô tĭng kơ Yêhôwa, brei hriê kơ kâo!” Jih jang phung anak êkei Lêwi dôk bi kƀĭn riêng gah ñu (êlan 26). Klei wĭt lač mơ̆ng phung Lêwi brei drei ƀuh hnơ̆ng yuôm bhăn mơ̆ng phung amĭ ama thâo huĭ mpŭ. Phung Lêwi bi hriăm anak čô kơ knuih leh anăn klei Aê Diê mtă hlăm klei hdĭp pô, mbĭt anăn bi hmô hlăm knuih hdĭp kkuh mpŭ kơ Aê Diê.
Sĭt grăp čô mnuih bi mklă pô jing dŏ Aê Diê amâodah rup yang, Y‑Môis srăng hưn asăp mtrŭn mơ̆ng Aê Diê kơ phung Lêwi, brei diñu yua đao gưm bi mdjiê jih jang phung amâo ruah Yêhôwa jing Aê Diê, wăt tơdah jing găp djuê amâodah ƀĭng găp diñu. Anei jing wưng hrŏng ruah phung ƀuôn sang Aê Diê hlue si Klei Blŭ Yêhôwa, Pô amâo tŭ ư ôh phung ƀuôn sang Aê Diê kkuh mpŭ kơ Aê Diê leh anăn wăt phung yang mkăn. Ñu ăt kăn dưi dôk ñăt kriêp sĭt ƀuh phung ƀuôn sang Aê Diê êbat ting ring dua nah, kkuh mpŭ kơ Aê Diê êjai kkuh kơ mamôn êjai amâodah phung yang mkăn (I Bruă Mtao 18:21). Phung Lêwi ngă djŏ asăp Aê Diê mtă. Bruă yơr đao bi mdjiê phung pô khăp jing klei amâo ênưih ôh, ƀiădah phung Lêwi thâo klă brei diñu gưt asăp Aê Diê jing yuôm hĭn, jih jang klei bi mguôp mkăn lui ti tluôn (dlăng thiăm hlăm Klei Yap 25:1‑11). Khua Yang Yêsu mtô: “Hlei pô khăp kơ amĭ ama ñu lu hĭn kơ Kâo amâo năng kơ Kâo ôh; hlei pô khăp kơ anak êkei amâodah kơ anak mniê ñu lu hĭn kơ Kâo amâo năng kơ Kâo ôh; 38leh anăn hlei pô amâo klam kyâo bi kal ñu leh anăn tui hlue Kâo amâo năng kơ Kâo ôh” (Y‑Mathiơ 10:37-38).
Phung ƀuôn sang Israel hlăk kbiă mơ̆ng čar Êjip mâo hlăm brô năm êbâo čô phung êkei, ka yap ôh phung mniê, hđeh điêt, leh anăn lu găp djuê mkăn nao mbĭt (Klei Kbiă 12:37‑38). Phung arăng mdjiê hlăm gưl hrŏng ruah tal anei mâo hlăm brô tlâo êbâo čô mnuih, anăn jing phung hngah kơ Yêhôwa, kkuh kơ rup yang. Klei anei brei ƀuh phung ƀuôn sang Aê Diê ruah amâo djŏ knŏng hjăn phung anak čô Israel ôh ƀiădah knŏng hlei pô đăo kơ Yêhôwa, sĭt suôr mă bruă knŏng hjăn kơ Ñu msĕ si Klei Khua Yang Yêsu lač, “Tơdah diih dôk kjăp hlăm klei Kâo blŭ, diih jing ƀĭng kna Kâo sĭt” (Y‑Yôhan 8:31b). Klei hriăm mñă kơ drei brei jih ai tiê sĭt suôr kkuh mpŭ kơ Aê Diê êla truh hruê bi tuôm hŏng Ñu.
Diih jih ai tiê sĭt suôr hŏng Aê Diê leh anăn bi hriăm anak čô pô sĭt suôr hŏng Aê Diê jih klei hdĭp mơ̆?
Wah lač: Bi mni kơ Khua Yang Yêsu djiê leh ti kyâo bi klah čiăng bi tui klei soh kâo, leh anăn brei kơ kâo klei pap dưi iêô Khua Yang jing Aba, Ama! Akâo kơ Ih đru kâo leh anăn anak čô kâo jih ai tiê huĭ mpŭ kơ Khua Yang, kkuh mpŭ lh anăn mă bruă knŏng hjăn kơ Ih.
Dlăng Klei Aê Diê Blŭ hlăm tlâo thŭn: Y‑ Êsai 52
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
