Khiavdim 32:25-29
Nqe cim:
“‘Leejtwg tuaj tus Tswv tog cia li los cuag kuv!’ Tagnrho xeem Levis txawm sau nthwv los vij Mauxes” (Khiavdim 32:26b).
Lus nug rau sawvdaws xav:
- Tus Tswv haivneeg raug ntxuav zoo licas?
- Muaj pestsawg leej raug tua tuag zaum no?
- Zaj xwm no qhia rau peb paub dabtsi txog kev txhaum pe mlom?
- Peb txiav txim siab licas thaum kawm dhau zaj no?
Tomqab uas coj tus mlom nyuj mus hlawv, muab zom ua hmoov mos mos, muab tov dej rau cov Yixalayees haus lawm, Mauxes pom tus Tswv haivneeg ua tej kev txajmuag tabmeeg lawv tej yeebncuab, ua rau lwm haivneeg saib tsis taus lawv, nws thiaj mus sawv ntawm rooj vag thiab qw hais tias, “Leejtwg tuaj tus Tswv tog cia li los cuag kuv!” Tagnrho xeem Levis txawm sau nthwv los vij nws (nqe 26). Dhau ntawm cov Levis kev teb Mauxes lub suab hu, ua rau peb pom qhov tseemceeb ntawm cov ua niam ua txiv uas hwm tus Tswv. Cov Levis qhia lawv tej menyuam paub txog Vajtswv tus cwjpwm thiab Vajtswv lub siab nyiam, lawv kuj ua qauv zoo hauv kev pehawm tus Tswv rau cov menyuam xyaum.
Thaum sawvdaws xaiv tuaj tus Tswv tog thiab tuaj tej mlom tog lawm, Mauxes thiaj qhia Vajtswv tej lus samhwm rau cov Levis, lawv yuav tsum siv ntaj mus tua txhua tus uas tsis xaiv tuaj tus Tswv tog, tsis hais lawv kwvtij, zej zog, phoojywg. Ntawm no yog sijhawm ntxuav tus Tswv haivneeg kom huv raws li tus Tswv tej lus samhwm, Nws tsis txaus siab qhov uas Nws haivneeg pehawm Nws, kuj pehawm lwm tus vajtswv. Nws tsis nyob twjywm thaum pom Nws haivneeg ua li ntawd (I Vajntxwv 18:21). Cov neeg Levis tau ua raws nraim li tus Tswv tej lus samhwm. Qhov uas rho ntaj tua cov neeg yus hlub tshua tsis yog yoojyim, tiamsis cov Levis paub meej hais tias lawv yuav tsum ua raws li tus Tswv tej lus samhwm, tso txhua yam tseg rau tomqab (saib ntxiv Teev Npe 25:1-11). Tswv Yexus qhia hais tias: “Tus uas hlub nws niam nws txiv heev dua hlub kuv, tus ntawd tsis tsimnyog ua kuv tus thwjtim; tus uas hlub nws tej tub tej ntxhais heev dua hlub kuv, tus ntawd tsis tsimnyog ua kuv tus thwjtim. Tus uas tsis kwv nws tus ntoo khaublig nrog kuv mus, tus ntawd tsis tsimnyog ua kuv tus thwjtim” (Mathais 10:37-38).
Thaum cov Yixalayees tawm hauv tebchaws Iziv los muaj kwvlam rau pua txhiab tus txivneej, tsis tau xam pojniam, menyuam, thiab muaj lwm haivneeg nrog lawv los (Khiavdim 12:37-38). Cov neeg raug tua tuag zaum no muaj kwvlam peb txhia leej, lawv yog cov uas tawmtsam tus Tswv thiab xaiv pe mlom. Qhov no qhia tau hais tias, tus Tswv haivneeg tsis yog suav tagnrho cov Yixalayees tej xeebleej xeebntxwv, tiamsis tsuas yog hais txog cov uas ntseeg tus Tswv, rau siab ntso pehawm Nws, zoo li Tswv Yexus tej lus hais tias: “Yog nej ua raws li tej lus uas kuv qhia, nej thiaj yog kuv cov thwjtim tiag” (Yauhas 8:31b). Zaj kawm no qhuab ntuas peb yuav tsum muab siab npuab tus Tswv kawg siab kawg ntsws mus txog hnub uas ntsib Nws.
Thov Vajtswv
Tswv Yexus, nyuam yaus ua Koj tsaug, vim Koj tuag saum tus ntoo khaublig txhiv nyuam yaus tej kev txhaum. Thov Koj pab nyuam yaus thiab tej menyuam ua tau lubneej hwm Koj, pehawm Koj thiab ua Koj tes haujlwm txhua hnub. Amees.
Peb puas coglus hais tias yuav muab siab npuab tus Tswv thiab qhia tej menyuam muab siab npuab tus Tswv tas simneej?
Nyeem Vajluskub hauv peb lub xyoos: Yaxayas 52
Kênh Youtube BHKTHN:
