Klei Aê Diê Blŭ: Y‑Yêrêmi 38:7‑13
Êlan kliăng: “Mơ̆ng dlông, Ñu yơr kngan djă kơ̆ng kâo; Ñu kdjŏng mă kâo mơ̆ng êa êlam. Ñu bi mtlaih kâo mơ̆ng pô roh ktang kâo, mơ̆ng phung bi êmut kơ kâo; jing phung ktang hĭn kơ kâo” (Klei Mmuñ Hđăp 18:16-17).
Klei êmuh ksiêm mĭn: Hlei Y‑Êbet-Mêlek jing? Ya bruă ñu ngă leh ƀuh Khua pô hưn êlâo Y‑Yêrêmi dơ̆ng djiê? Ya klei amâo djŏ hlăm klei yăl dliê anei? Ya klei hriăm drei mâo kơ klei Aê Diê kiă kriê hlăm klei hdĭp pô mă bruă?
Pă čô mâo anăn hlăm êlan 1 jing phung khua kơ phung ƀuôn sang Israel, diñu jing phung Yuđa ƀiădah lŏ mâo klei mĭn bi mdjiê phung dĭng buăl sĭt suôr Aê Diê hŏng hdră klư̆ hlăm ƀăng êlam. Hlăk êjai sa čô mkăn bâo hlăm êlan 7 jing Y‑Êbet-Mêlek lŏ duah hdră bi mtlaih Khua pô hưn êlâo Y‑Yêrêmi.
Y‑Êbet-Mêlek jing mnuih Êthiôpi, ngă dĭng buăl arăng mkriâo hlăm sang mtao. Boh blŭ “Êbet-Mêlek” jing “dĭng buăl mtao”, anăn năng ai dĭng buăl arăng mkriâo anei jing sa čô hlŭn amâo mâo anăn ôh. Khădah leh ƀuh bruă amâo djŏ, leh anăn rŭng răng kơ Khua pô hưn êlâo Y‑Yêrêmi srăng djiê tơdah amâo hmao bi mtlaih, ñu nao ti tuôm hŏng Mtao Sêdêkia čiăng akâo asăp mtrŭn bi mtlaih Khua pô hưn êlâo. Leh mtao tŭ ư, Y‑Êbet-Mêlek hŏng tlâo pluh čô mnuih hlăm sang mtao mă klei ktŭng Khua pô hưn êlâo Y‑Yêrêmi mơ̆ng ƀăng leh anăn ba kơ anôk êđăp ênang hlăm tač kahan.
Klei bi mklăk drei ƀuh tinei jing grăp čô hmư̆ sơăi klei Khua pô hưn êlâo Y‑Yêrêmi hưn ƀiădah klei ngă mdê snăk. Pă čô khua Yuđa amâo khăp ôh klei hưn êlâo anăn, anăn duah klei bi mdjiê, bi phung hlŭn jing mnuih ala tač êngao năng ai amâo mđing lu ôh kơ klei hưn êlâo, lŏ duah hdră bi mtlaih khua pô hưn êlâo. Khua pô hưn êlâo Y‑Yêrêmi bi tuôm hŏng klei huĭ hyưt kyua mtao pô leh anăn phung khua djuê ana pô ngă ƀiădah ñu dưi mtlaih mơ̆ng sa čô ala tač êngao. Wăt tơdah knŏng jing sa čô hlŭn ƀiădah Y‑Êbet-Mêlek amâo dlăng pô jing mnuih ti êngao ôh dlăng ngơi mang bruă jhat dôk ngă ti ală mta. Hlăk êjai Mtao Sêdêkia, mrâo mâo čar Ƀaƀilôn mđĭ jing mtao leh Mtao Y‑Jêhôyakim arăng tiŏ nao jing mnă, snăn knŏng thâo hdĭp yua leh anăn ngă ngơi mang ti anăp djăp klei mâo hŏng dĭng buăl Aê Diê.
Dôk ti anăp klei jhat, klei amâo kpă ênô, akâo kơ Aê Diê brei kơ drei klei jhŏng bi mklă jing mnuih dôk hlăm boh klei čiăng mâo klei blŭ mgang hŏng bruă ngă răng mgang klei kpă ênô msĕ si Y‑Êbet-Mêlet. Đăm ñŭt huĭ ôh jing mnuih ti êngao, lui klei jhat mâo ti anăp mta pô. Boh nik, sĭt mă bruă kơ Aê Diê, klă sĭt drei amâo ñĕ ôh kơ klei arăng ngă jhat, ƀiădah brei kjăp ai tiê đăo kơ klei Aê Diê kiă kriê hlăm klei hdĭp pô. Lu blư̆ klei jhat msĕ si dưi hĭn, ƀiădah brei kjăp ai tiê kyua Aê Diê srăng yua klei dleh dlan mjuăt bi hriăm phung mă bruă kơ Ñu. Truh mmông Aê Diê kčah, Ñu srăng yua lu mnuih, lu hdră bi mtlaih drei.
Drei đăo kjăp kơ klei Aê Diê kiă kriê hlăm klei hdĭp pô čiăng dôk tĭng klei sĭt nik mơ̆ amâodah hơăi?
Wah lač: Ơ Aê Diê Kpă Ênô! Akâo kơ Ih brei kâo thâo bruă klam pô jing mnuih ƀuôn sang mơ̆ng Mtao Kpă Ênô, čiăng kâo jhŏng răng mgang klei sĭt nik leh anăn klei kpă ênô, mbĭt anăn jih ai tiê mă bruă kơ Ih wăt tơdah ya klei mâo kyua đăo sĭt Aê Diê kiă kriê klei hdĭp kâo.
Dlăng klei Aê Diê Blŭ hlăm tlâo thŭn: Y‑Êsai 44:6‑23
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
