Yelemis 38:7-13
Nqe cim:
“Tus Tswv thiaj cev tes puag saum nruab ntug tuaj tuav kuv hauv qab thu no, nws thiaj rub kuv tawm hauv qab thu dej qhov tob tshaj plaws los. Nws cawm kuv dim ntawm kuv cov yeebncuab lub hwjchim, thiab dim ntawm cov neeg uas ntxub kuv, rau qhov lawv muaj zog dua kuv” (Phau Ntawv Nkauj 18:16-17).
Lus nug rau sawvdaws xav:
- Enpemelej yog leejtwg?
- Nws tau ua dabtsi thaum pom tus cevlus Yelemis yuav raug tuag?
- Yam tsis ncaj ncees nyob hauv zaj xwm no yog dabtsi?
- Peb kawm tau dabtsi txog tus Tswv lub hwjchim tswjkav hauv tus kheej kev ua tus Tswv haujlwm?
Plaub tug tibneeg muaj npe nyob hauv nqe 1 yog cov Yixalayees plaub tug nomtswv, lawv yog neeg Yudais tiamsis tuav tswvyim muab Vajtswv tus tubtxib tua povtseg los ntawm qhov uas muab pov rau hauv qhov tshij qhuav. Tshuav tus tibneeg hais txog hauv nqe 7 yog yawm Enpemelej ho nrhiav kev cawm tus cevlus Yelemis.
Enpemelej yog neeg Sudas lossis neeg Ethiau-pias, yog ib tug nraug sam ua haujlwm hauv vajntxwv lub loog. Lub npe “Enpemelej” txhais hais tias “vajntxwv tus qhev”, yog li ntawd tej zaum tus nom no yog ib tug qhev uas tsis muaj suab npe. Tiamsis thaum pom muaj yam tsis ncaj ncees, thiab txhawj rau tus cevlus Yelemis txojsia, nws thiaj mus qhia rau vajntxwv Xedekiyas thov tso cai cawm Yelemis. Thaum tau vajntxwv tso cai, Enpemelej coj vajntxwv peb caug leej txivneej nrog nws mus rub Yelemis tawm hauv qhovtshij los thiab coj mus rau hauv chav uas muaj tubrog zov hauv vajntxwv lub loog.
Qhov tsis ncaj ncees uas peb pom hauv no yog txhua tus puavleej tau hnov Yelemis tej lus qhia tiamsis lawv nyias ua nyias sib txawv. Plaub tug nomtswv neeg Yudais tsis nyiam tej lus cev tseg ntawd, lawv thiaj nrhiav kev tua Yelemis, tiamsis tus qhev uas yog neeg txawv tebchaws, txawm yog tsis tshua paub ntau txog tej lus cev tseg los nws yeej nrhiav kev cawm Yelemis. Tus cevlus Yelemis ntsib teebmeem vim nws haivneeg tus vajntxwv thiab tej nomtswv tiamsis nws ho tau ib tug neeg txawv tebchaws cawm dim. Txawm yog neeg txawv tebchaws, los Enpemelej yeej tsis saib tus kheej yog neeg sab nraud uas tsis quav ntsej tej kev tsis ncaj ncees tabtom tshwmsim. Vajntxwv Xedekiyas tau tus vajntxwv kav tebchaws Npanpiloos tsa ua vajntxwv hloov Yehauyakees uas raug ntes mus ua cev qhev lawm chaw, nws tsuas paub noj nyob ua si thiab tsis quav ntsej txog Vajtswv tus tubtxib.
Thaum ntsib tej yam phem qias, tsis ncaj ncees, thov tus Tswv pab peb muaj lub siab tawv tiv thaiv tej kev ncaj ncees zoo li Enpemelej. Txhob ua neeg siab yau uas cia tej yam phem qias tshwmsim ntawm yus qhov muag. Tshwjxeeb yog thaum ua tus Tswv tes haujlwm, peb yeej khiav tsis dhau yuav ntsib kev tsimtxom, tiamsis yuav tsum cia siab ntsoov rau tus Tswv lub hwjchim tswjkav hauv yus lubneej. Ntau zaug zoo li kev phem kovyeej, tiamsis yeej meem ruaj siab rau tus Tswv vim Nws muaj cuabkav siv tej kev txomnyem los sim cov neeg uas ua Nws haujlwm. Thaum txog sijhawm, tus Tswv yeej yuav siv lwm tus, lwm txoj haukev los pab cawm peb.
Thov Vajtswv
Vajtswv tus uas ncaj ncees! Thov pab nyuam yaus nco ntsoov hais tias nyuam yaus yog ib tug pejxeem ntawm tus Vajntxwv uas ncaj ncees, nyuam yaus thiaj ua taus siab tawv tiv thaiv qhov tseeb thiab kev ncaj ncees; thiab tas siab tas ntsws ua Koj tes haujlwm txhua lub tsamthawj. Amees.
Peb puas ruaj siab rau tus Tswv lub hwjchim tswjkav hauv peb lubneej, kom peb sawv los tuaj kev ncaj ncees tog lawm tau?
Nyeem Vajluskub hauv peb lub xyoos: Yaxayas 44:6-23
Kênh Youtube BHKTHN:
