Klei Aê Diê Blŭ: Y‑Mathiơ 11:20‑24
Êlan kliăng: Hruê anei, tơdah diih hmư̆ asăp Ñu, đăm bi khăng ai tiê diih ôh msĕ si ti hruê arăng bi kdơ̆ng” (Hêbrơ 3:15b).
Klei êmuh ksiêm mĭn: Ti ƀuôn prŏng mâo klei ƀuah? Ya mta phŭn Khua Yang Yêsu ƀuah dŭm ƀuôn prŏng anăn? Si klei truh kơ dŭm ƀuôn prŏng anăn? Hruê anei hlăm ya klei drei dôk khăng ai tiê hŏng Aê Diê?
Khua Yang Yêsu ƀuah tlâo ƀuôn prŏng Kôrasin, Betsaida leh anăn Kapernum. Mta phŭn Ñu ƀuah tlâo ƀuôn prŏng anei jing diñu amâo kmhal ôh soh wăt tơdah Khua yang ngă leh lu klei myang ti krah dŭm ƀuôn prŏng anăn. Khua Yang Yêsu bi msĕ ƀuôn prŏng Kôrasin leh anăn Betsaida hŏng dua ƀuôn prŏng Tir leh anăn Sidon, jing dŭm ƀuôn prŏng Aê Diê bi rai kyua klei soh digơ̆ (Y‑Êsêkiêl 26:3‑4; Y‑Amôt 1:10), Khua Yang lač tơdah dua ƀuôn prŏng anei dưi ƀuh Khua Yang leh anăn ƀuh klei myang Ñu ngă snăn diñu srăng kmhal leh anăn arăng amâo srăng mdjiê ôh.
Ƀuôn prŏng tal tlâo jing Kapernum dưi msĕ hŏng ƀuôn Sôdôm, sa ƀuôn prŏng Aê Diê mdjiê kyua klei soh jhat digơ̆ (Klei Mphŭn Dơ̆ng 19:24‑25). Khua Yang brei thâo tơdah Khua Yang ngă klei myang hlăm ƀuôn Sôdôm msĕ si Ñu ngă leh ti Kapernum snăn ƀuôn prŏng anăn amâo srăng rai ôh. Drei mđing knuih mơ̆ng mnuih ƀuôn sang tlâo ƀuôn prŏng Kôrasin, Betsaida leh anăn Kapernum, wăt tơdah diñu amâo bi kdơ̆ng ôh, amâo ngă jhat kơ Khua Yang ôh ƀiădah lŏ ngă ngơi mang hŏng klei Khua Yang mtô leh anăn klei myang Khua Yang ngă. Diñu amâo mđing thâo kral Khua Yang jing Yang Mêsi, diñu amâo thâo kral ôh klei soh pô čiăng kmhal đăo kơ Ñu. Kyua mmông găl Aê Diê brei kơ tlâo ƀuôn prŏng anei lu snăk ƀiădah diñu ăt khăng ai tiê hŏng Khua Yang anăn diñu srăng tŭ klei bi kmhal kjham hĭn dŭm ƀuôn prŏng Tir, Sidon leh anăn Sôdôm.
Hruê anei, wăt tơdah dưi hmư̆ lu klei mtô bi hriăm leh anăn ƀuh lu klei myang Khua Yang ngă ƀiădah drei năng ai ăt dôk khăng ai tiê hŏng Khua Yang hlăm dŭm bruă snei: Tal sa, drei khăng ai tiê hŏng Klei Aê Diê Blŭ mñă. Drei knŏng hriăm tuč êlan kliăng čiăng mă klei pah mni, nao sang kkuh mpŭ hmư̆ klei mtô grăp hruê kăm… ƀiădah amâo brei Klei Aê Diê mgei ai tiê pô ôh. Tal dua, drei khăng ai tiê hŏng klei Yang Mngăt Jăk mñă, Ñu mtă brei drei hưn brei răng kơ klei soh, ƀiădah drei ngă ngơi mang amâo hmư̆ kyua čiăng hlue ngă tui si klei mĭn pô, drei lui hĕ klei Yang Mngăt Jăk mñă hlăm klei hdĭp pô. Tal tlâo, drei khăng ai tiê hŏng dŭm bruă Aê Diê jao, amâo čiăng amâodah amâo khăp ngă hlue si klei Khua Yang čiăng kyua ƀuh klei anăn amâo ba klei tŭ dưn kơ pô ôh, leh anăn ăt dôk ngă ngơi mang hŏng phung ka mâo klei bi mtlaih Khua Yang mdưm riêng gah pô. Tal pă, drei khăng ai tiê hŏng klei Aê Diê brei, drei mă lu klei jăk mơak Khua Yang brei ƀiădah ăt hdĭp amâo hdơr knga hŏng Ñu. Brei drei hdơr tơdah lŏ dơ̆ng hdĭp khăng ai tiê snăn drei srăng tŭ klei bi kmhal kjham hĭn kơ ƀuôn Tir, Sidôn leh anăn Sôdôm.
Drei dôk khăng ai tiê hŏng klei Khua Yang mñă kơ pô mơ̆?
Wah lač: Ơ Khua Yang, akâo kơ Ih đru kâo thâo kral Ih, thâo kral klei Ih mñă leh anăn thâo kral dŭm klei pap Ih brei leh kơ kâo. Akâo kơ Ih đru kâo thâo luă gŭ kmhal klei soh ti anăp Ih, hdĭp tui hlue si klei Ih čiăng leh anăn bi guh kơang Anăn Ih mơ̆ng klei hdĭp kâo.
Dlăng klei Aê Diê Blŭ hlăm tlâo thŭn: Y‑ Êsai 43:8–44:5
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
