Mathais 11:20-24
Nqe cim:
“Hnub no yog nej hnov Vajtswv lub suab hu, nej tsis txhob tawv ncauj ib yam li yav tas los nej cov yawgkoob ntxeev siab rau Vajtswv” (Henplais 3:15b).
Lus nug rau sawvdaws xav:
- Tej nroog twg raug tus Tswv cem?
- Vim licas Tswv Yexus cem tej nroog ntawd?
- Tej nroog ntawd yuav raug dabtsi?
- Niaj hnub nimno peb tseem tawv ncauj rau tus Tswv hauv tej yam twg?
Tswv Yexus cem peb lub nroog uas yog Khaulaxis, Npexaidas thiab Kapena-us. Nws cem peb lub nroog ntawd twb yog vim lawv tsis lees kev txhaum txawm yog Nws tau ua ntau yam txujci rau lawv pom. Tswv Yexus muab lub nroog Khaulaxis thiab Npexaidas piv rau lub nroog Tiles thiab Xidoos, yog ob lub nroog uas raug tus Tswv ua rau puastsuaj vim lawv tej kev txhaum (Exekees 26:3-4; Amaus 1:10), tus Tswv hais tias yog ob lub nroog no tau pom tus Tswv thiab pom tej txujci uas Nws ua ces lawv twb lees kev txhaum thiab tsis raug kev puastsuaj lawm.
Lub nroog tim peb yog Kapena-us, tau muab piv rau lub nroog Xaudoos uas raug tus Tswv ua rau puastsuaj vim lawv tej kev txhaum (Chivkeeb 19:24-25). Tus Tswv hais tias yog Nws ua tej txujci tseemceeb rau hauv nroog Xaudoos zoo li tej uas Nws ua hauv nroog Kapena-us, ces lub nroog ntawd yuav tsis raug kev puastsuaj. Peb tig saib tus cwjpwm ntawm cov neeg nyob hauv peb lub nroog Khaulaxis, Npexaidas thiab Kapena-us, lawv tsis tawmtsam, tsis tsimtxom tus Tswv, tiamsis lawv tsis quav ntsej txog tej lus tus Tswv qhia, thiab tej txujci uas tus Tswv ua. Lawv tsis quav ntsej lees yuav Tswv Yexus ua lawv Tus Mexiyas, lawv tsis xam pom lawv tej kev txhaum kom los lees txim thiab ntseeg Tswv Yexus. Vim tus Tswv pub rau peb lub nroog no muaj sijhawm ntau heev tiamsis lawv tseem pheej tawv ncauj, Nws yuav rau txim rau lawv hnyav dua tej nroog Tiles, Xidoos thiab Xaudoos.
Niaj hnub nimno, txawm yog peb twb hnov ntau zaj lus uas tus Tswv qhia, pom ntau zaj txujci uas Nws tau ua, los peb yeej tseem tawv ncauj rau tus Tswv los ntawm tej yam nram qab no: Tim ib, peb tawv ncauj rau Vajtswv Txojlus qhuab ntuas. Peb kawm nco nqe cim kom tau pub khoom plig, tuaj pehawm txhua lub lim tiam… tiamsis peb tsis cia Vajtswv Txojlus nkag los hauv siab. Tim ob, peb tawv ncauj rau Vaj Ntsujplig kev qhuab ntuas, Nws ceebtoom peb txog tej kev txhaum, tiamsis peb tsis quav ntsej vim xav ua raws tus kheej siab nyiam, peb txwv tav Vaj Ntsujplig tej lus qhuab ntuas hauv peb lubneej. Tim peb, peb tawv ncauj rau tes haujlwm uas tus Tswv txib, tsis xav ua raws tus Tswv lub siab nyiam vim pom hais tias tej ntawd tsis muaj nqis rau peb tus kheej, thiab peb kuj tabtom tsis quav ntsej txog cov neeg tsis tau txais kev cawmdim uas tus Tswv cia nyob ib ncig peb. Tim plaub, peb tawv ncauj rau tej koobhmoov uas Vajtswv pub, peb tau txais ntau yam tiamsis tseem tsis nco tus Tswv txiaj ntsig. Nco ntsoov hais tias yog tseem pheej ua lubneej tawv ncauj zoo li ntawd, ces peb yuav raug tus Tswv txiav txim hnyav dua lub nroog Tiles, Xidoos thiab Xaudoos.
Thov Vajtswv
Tus Tswv, thov pab nyuam yaus paub zoo txog Koj, zeem paub Koj tej kev qhuab ntuas thiab tej koobhmoov uas Koj pub rau nyuam yaus. Thov pab nyuam yaus paub lees kev txhaum, ua lubneej raws nraim li Koj lub siabnyiam thiab ua rau Koj tau koobmeej. Amees.
Peb puas tabtom tawv ncauj rau tej uas Tus Tswv qhuab ntuas peb?
Nyeem Vajluskub hauv peb lub xyoos: Yaxayas 43:8-44:5
Kênh Youtube BHKTHN:
