Filipis 2:5-11
Nqe cim:
“Nws txo hwjchim thiab niaj hnub ua raws li Vajtswv lub siab nyiam, txawm yog neeg muab nws ntsia rau saum ntoo khaublig los nws tseem mloog Vajtswv lus.” (Filipis 2:8).
Lus nug rau sawvdaws xav:
- Timthawj Paulus nqua hu peb txog yam dabtsi?
- Tswv Yexus tau txo hwjchim mloog lus licas?
- Qhov kawg ntawm Tswv Yexus kev mloog lus yog dabtsi?
- Peb kawm Tswv Yexus tus qauv txo hwjchim mloog lus rau tus kheej lubneej licas?
Ntawm no yog ntu Vajluskub zoo kawg nkaus uas Timthawj Paulus sau thaum hais txog Cawmseej Yexus kev mloog lus tuag nthi. Qhib thawj, nws nqua hu cov ntseeg “muaj lub siab zoo ib yam li Yexus Khetos lub” (nqe 5). Txuas ntxiv mus, nws hais txog tus Tswv “lub siab”.
Tus Cawmseej yeej zoo ib yam li Vajtswv thiab Nws kuj yog Vajtswv. Nws muaj hwjchim sib luag li Vajtswv, tiamsis Nws tsis xav hais tias yuav “tuav” lub hwjchim ntawd mus li (nqe 6). Nws zoo siab hlo tso plhuav ib puas tsavyam tseg los yug ua neeg, ua lubneej zoo li ib tug tub qhe vim xav cawm noobneej dim ntawm kev txhaum (nqe 7). Nyob ntawm no, Timthawj Paulus hais txog Tswv Yexus tus yamntxwv Vajtswv thiab yamntxwv tibneeg. Nws yog Vajtswv tiamsis “tso ib puas tsav yam tseg” los ua ib tug tibneeg. Vim licas tus Tswv thiaj txo tus kheej kom qis li ntawd? Vim Nws ua raws li Vaj Leej Txiv lub siab nyiam.
Tswv Yexus los hauv ntiajteb ua neeg thiab Nws ua lubneej mloog lus tuag nthi. Thaum tseem nyob hauv ntiajteb, Nws yeej ua raws nkaus li Vaj Leej Txiv lub siab nyiam (Yauhas 4:34, 6:38, 8:29, 14:31, Lukas 22:42). Tswv Yexus ua ib tug qauv zoo txog kev mloog lus rau peb txhua tus xyaum. Timthawj Paulus qhia hais tias Tswv Yexus los yug ua neeg, “Nws txo hwjchim thiab niaj hnub ua raws li Vajtswv lub siab nyiam, txawm yog neeg muab nws ntsia rau saum ntoo khaublig los nws tseem mloog Vajtswv lus” (nqe 8). Raug tuag saum tus ntoo khaublig yog txojkev tuag uas txaj muag thiab mob tshajplaws uas cov neeg Loos siv los rau txim rau cov neeg muaj txim. Tswv Yexus yog Tus Dawbhuv thiab zoo kawg nkaus tiamsis Nws raug txojkev tuag txaj muag ntawd vim yog xav ua kom tiav lub homphiaj cawm noobneej uas Vaj Leej Txiv tau npaj tseg. Nws ris peb tej kev txhaum thiab tuag txhiv peb kom peb tsis raug Vajtswv txojkev txiav txim ibtxhis.
Vim Tswv Yexus ua raws Vaj Leej Txiv lub siab nyiam thiab mloog lus tuag saum tus ntoo khaublig, Vajtswv thiaj “tsa nws ua tus loj dua ntais, thiab tis lub npe uas zoo tshaj tej npe huv tibsi rau Nws” (nqe 9). Thaum txog hnub txiav txim, txhua tus tibneeg nyob txhua tiam, txhua lub tebchaws yuav lees hais tias “Yexus Khetos yog tus Tswv, kom Vajtswv tus uas yog Leej Txiv thiaj tau koob meej” (nqe 10-11). Tomqab uas txo tus kheej thiab mloog lus, Tswv Yexus tau Vajtswv pub muaj meejmom thiab tshwjchim siab tshajplaws. Tswv Yexus mloog lus tuag nthi, Nws thiaj ua tiav tes haujlwm uas Leej Txiv muab cob rau Nws ua hauv ntiajteb no. Nimno, Nws zaum ntawm Vajtswv tus uas muaj hwjchim loj kawg nkaus sab xis thiab Nws yuav rov qab los txiav txim rau noobneej. Tus Tswv xav kom peb yuav tsum xyaum raws Nws tus qauv txo hwjchim mloog lus thiaj ua tau lubneej phim tej uas Nws tau ua pub rau peb lawm.
Thov Vajtswv
Tus Tswv, thov pab nyuam yaus niaj hnub nco txog Tswv Yexus kev txo hwjchim mloog lus, nyuam yaus thiaj paub txo hwjchim ua raws li Koj dej siab rau nyuam yaus lubneej. Amees.
Puas muaj yam dabtsi tav peb txoj haukev txo hwjchim mloog tus Tswv lus?
Nyeem Vajluskub hauv peb lub xyoos: Yaxayas 26
Kênh Youtube BHKTHN:
