Klei Aê Diê Blŭ: Philip 2:5‑11
Êlan kliăng: “Leh Ñu jing sa čô mnuih, Ñu bi luă gŭ Ñu pô, leh anăn gưt asăp tơl djiê, wăt klei djiê ti kyâo bi kal” (Philip 2:8).
Klei êmuh ksiêm mĭn: Ya klei khua ƀĭng kna Y‑Pôl iêô mthưr drei? Si klei Khua Yang Yêsu bi luă gŭ Ñu pô gưt asăp? Ya boh tŭ mơ̆ng klei Ñu gưt asăp? Si klei drei mă hriăm kơ klei hdĭp drei mơ̆ng rup bi hmô klei Khua Yang Yêsu bi luă gŭ Ñu pô gưt asăp?
Anei jing trăn Klei Aê Diê Blŭ tloh ênoh hĭn mơ̆ng khua ƀĭng kna Y‑Pôl tơdah ñu hưn lač kơ rup Khua Yang Yêsu Krist bi luă gŭ Ñu pô gưt asăp kluôm dhuôm. Pŏk kčưm, ñu iêô mthưr phung đăo “Brei diih mâo klei mĭn msĕ si Krist Yêsu mâo leh” (êlan 5). Tui tluôn anăn ñu lač kơ “klei mĭn” Khua Yang.
Yang Krist mâo klei jing Aê Diê leh anăn Ñu pô jing Aê Diê. Ñu mâo mđơr klei dưi, mđơr anôk jing hŏng Aê Diê, ƀiădah Ñu amâo “djă pioh” klei hing ang anăn ôh (êlan 6). Khua Yang hmiêt mkăp toh lui anôk dlông, jih jang klei guh kơang leh anăn hơô klei jing hlŭn, trŭn jing sa čô mnuih kyua čiăng bi mtlaih phung mnuih (êlan 7). Tinei, khua ƀĭng kna Y‑Pôl hưn mdah wăt knuih myang leh anăn knuih mnuih Khua Yang Yêsu. Ñu jing Aê Diê ƀiădah “Ñu toh hĕ klei anăn” čiăng jing sa čô mnuih. Ya ngă Khua Yang bi ti gŭ hĕ Ñu pô msĕ snăn? Kyuadah Ñu gưt asăp klei Ama čiăng.
Khua Yang Yêsu hriê ti lăn ala jing mnuih leh anăn hdĭp gưt asăp kluôm dhuôm. Ktuê jih thŭn mlan Ñu hdĭp ti lăn ala, Ñu gưt ngă jih kluôm dhuôm klei Aê Diê Ama čiăng (Y‑Yôhan 4:34, 6:38, 8:29, 14:31, Y‑Luk 22:42). Khua Yang Yêsu lui pioh kơ drei sa rup bi hmô kơ klei gưt asăp. Khua ƀĭng kna Y‑Pôl brei thâo Ñu jing msĕ si mnuih, bi luă gŭ Ñu pô leh anăn “gưt asăp tơl djiê, wăt klei djiê ti kyâo bi kal” (êlan 8). Klei djiê ti kyâo bi kal jing klei djiê hêñ mlâo leh anăn ruă knap hĭn, phung Rôm mdưm yua kơ mnuih soh. Khua Yang Yêsu jing Pô amâo mâo sa mta klei soh leh anăn Ñu jing Pô doh jăk kluôm dhuôm ƀiădah Ñu tŭ klei djiê tăm pah anăn kyua gưt asăp hdră êlan čiăng bi mtlaih phung mnuih Aê Diê Ama čuăn mkra leh. Ñu klam klei soh leh anăn djiê hrô brei kơ grăp čô drei čiăng kơ đăm drei tŭ klei bi kmhal hlŏng lar mơ̆ng Aê Diê ôh.
Kyuadah Khua Yang Yêsu đup gưt kluôm dhuôm klei Aê Diê Ama čiăng leh anăn gưt asăp kluôm ênŭm hŏng klei săn asei mlei ti kyâo bi kal snăn Aê Diê “mpŭ kơ Ñu ti dlông snăk, leh anăn brei kơ Ñu Anăn dlông hĭn kơ jih jang anăn” (êlan 9). Truh hruê phat kđi, jih jang mnuih hlăm jih jang ênuk, jih jang lăn čar srăng hưn kơ “Yêsu Krist jing Khua Yang, čiăng bi guh kơang kơ Aê Diê Ama” (êlan 10-11). Leh čŏng čiăng bi luă gŭ Ñu pô leh anăn gưt asăp, Aê Diê mpŭ kơ Khua Yang Yêsu ti dlông hĭn leh anăn guh kơang hĭn. Klei Ñu gưt asăp kluôm ênŭm čiăng bi leh bruă Ama jao ti lăn ala. Ară anei hin, ñu dôk gŭ tĭng hnuă kơ Aê Diê Pô mâo jih klei myang leh anăn srăng lŏ hriê phat kđi phung mnuih. Khua Yang čiăng kơ drei hriăm tui rup Ñu bi hmô bi luă gŭ pô gưt asăp čiăng dưi hdĭp năng hŏng jih jang klei Ñu ngă leh kơ drei.
Si ngă mâo mơ̆ ya mta klei bi kgăn drei hmiêt mkăp bi luă gŭ pô gưt asăp Khua Yang?
Wah lač: Ơ Khua Yang, akâo Ih brei kâo hdơr nanao kơ klei mĭn luă gŭ gưt asăp Khua Yang Yêsu čiăng tui ngă hlue leh anăn thâo bi ti gŭ pô đup gưt klei Khua Yang čiăng kơ klei hdĭp kâo.
Dlăng Klei Aê Diê Blŭ hlăm tlâo thŭn: Y‑Êsai 26
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
