Daniyees 9:20-27
Nqe cim:
“Thaum koj pib thov Vajtswv, Nws twb teb koj tej lus thov lawm, Nws yeej hlub koj” (nqe 23a).
Lus nug rau sawvdaws xav: Hais sau zog lub ntsiab cov lus timtswv Khali-ees hais. Cov xwmtxheej tseemceeb hais tshwm hauv nqe 24-27? Vim li cas qhov kev qhia tshwm no yog “kev totaub” rau tus cevlus Daniyees? Vim li cas tus Tswv qhia tshwm qhov uas tsis tau muaj neeg paub hais txog yav tom ntej rau Daniyees? Nimno tus Tswv qhia tshwm Nws txojkev npaj rau leejtwg?
Thaum lees txim thiab thov Vajtswv txhim kho dua lub nroog Yeluxalees tshiab, tus cevlus Daniyees tau tus Tswv teb nws tej lus thov los ntawm qhov qhia tshwm txog xya caum lub limtiam (nqe 22-23). Vajtswv twb teem xya caum lub limtiam zam lawv tej kev txhaum thiab “muaj kev ncaj ncees mus ibtxhis”. Xya caum lub limtiam tau muab faib ua ob ntu sijhawm: ntu xya lub limtiam thiab rau caum ob lub limtiam; thiab ntu ib lub limtiam (nqe 24-27). Ntu xya lub limtiam thiab rau caum ob lub limtiam pib txij thaum tus Tswv haivneeg txais tau tsab ntawv tso cai txhim kho lub nroog mus txog thaum tus uas Vajtswv xaiv cia ua tus thawj los ua Vajntxwv (nqe 25). Hauv ntu sijhawm no lub nroog yuav tau txhim kho dua tshiab. Tom qab ntawd, “tus uas Vajtswv xaiv cia ua tus thawj…yuav raug luag muab tua povtseg”, lub nroog dawbhuv thiab lub Tuamtsev dawbhuv yuav raug puastsuaj, tsis muaj kev fij khoom rau tus Tswv, yuav muaj kev tsovrog (nqe 26-27). Lub limtiam kawg yuav xaus rau hnub uas tus Tswv teem tseg (nqe 27).
Qhov no yog ib hauv cov lus uas nyuaj totaub nyob hauv Vajtswv Txojlus. Cov tub txhais Vajluskub txhais ntau seem rau qhov xwmtxheej no. Txawm li ntawd los cov txhais Vajluskub puavleej pom zoo hais tias xya caum lub limtiam yog ntu sijhawm Vajtswv txhim kho cov neeg Yixalayees dua tshiab ntawm sab nqaij tawv thiab ntsujplig huvsi. Hauv lub sijhawm “xya caum lub limtiam” lossis “xya zaus xya caum” uas yog 490 xyoo no, qee yam yuav muaj tiav: Lub Tuamtsev tau txhim kho dua thiab kuj yuav puastsuaj mus (nqe 25-26), tus Tswv haivneeg yuav tsis ua txhaum ntxiv, tsis muaj kev txhaum lawm, txojkev ncaj ncees yuav nyob mus ibtxhis (nqe 24).
Vim li cas qhov kev qhia tshwm no nws yog “kev totaub” rau tus cevlus Daniyees (nqe 22)? Vim qhov ntawd yog kev qhia tshwm ntau tshaj qhov uas Daniyees thov thiab xav (txhais tau hais tias yuav txhim kho dua cov neeg Yixalayees), kom lawv muaj kev cia siab rau lub neej sab ntsujplig ruaj khov dua, txhais tau hais tias yog txhim kho dua Vajtswv lub nroog dawbhuv. Vim tus Tswv “hlub” Dainyees (nqe 23), yog li Nws qhia tshwm lub homphiaj loj no rau Daniyees paub. Phau ntawv Amaus 3:7 hais khov kho hais tias: “Tus Tswv uas kav ib puas tsav yam yuav ua ib yam dabtsi, Nws yeej xub qhia rau Nws cov tubtxib uas yog cov cevlus paub ua ntej Nws mam ua”. Zoo ib yam li tus phoojywg zoo, Vajtswv qhia tawm yam uas tsis tau muaj neeg paub, Nws lub siab npaj tseg rau yav tom ntej rau Daniyees paub, thiab Nws kuj zoo siab qhia tawm Nws lub siab nyiam, txojkev pab rau cov neeg uas “nws hlub” yog peb txhua tus.
Thov Vajtswv,
Tus Tswv, ua Koj tsaug vim Koj zoo siab hlo qhia yam uas tsis tau muaj neeg paub, tej haujlwm Koj ua rau Koj haivneeg. Thov Koj pab kom nyuam yaus niaj hnub kub siab lug nrog Koj sib txuas lus, mloog Koj qhia txhua hnub. Amees.
Yuav ua li cas kom peb koom ntsia tau mus rau ib seem, koom ib txojkev cia siab rau tus Tswv? Peb puas tau yog ib tug tubtxib, ib tug phoojywg zoo nrog tus Tswv lawm?
Nyeem Vajluskub hauv peb lub xyoos: Yaxayas 3:16-5:7
Kênh Youtube BHKTHN:
