Klei Aê Diê Blŭ: Klei Mtô Mñă Klei Bhiăn 12:5-14
Êlan kliăng: “Đăm ngă ôh msĕ si jih jang klei drei dôk ngă tinei hruê anei, grăp čô ngă tui si klei ñu pô mĭn jăk” (Klei Mtô Mñă Klei Bhiăn 12:8).
Klei êmuh ksiêm mĭn: Ti anôk brei phung ƀuôn sang Israel bi kƀĭn čiăng kkuh mpŭ kơ Aê Diê? Knŏng ti anôk phung ƀuôn sang Aê Diê dưi myơr mnơ̆ng ngă yang? Ya čiăng mblang kơ klei anăn? Ya klei drei hriăm tơdah kkuh mpŭ kơ Aê Diê?
Leh kăm ghă ktang tĭt phung ƀuôn sang Israel amâo dưi tui hdră êlan phung ƀuôn sang Kanaan kkuh mpŭ kơ rup yang diñu, Y‑Môis ktrâo atăt phung ƀuôn sang Aê Diê anôk kkuh mpŭ kơ Aê Diê leh anăn myơr mnơ̆ng ngă yang kơ Ñu hlăm čar Kanaan. Anăn jing hlăk dưi mŭt hlăm Čar Aê Diê Ƀuăn, Aê Diê srăng ruah hjăn sa anôk čiăng dưm Anăn Ñu – čiăng lač anôk Ñu dôk (êlan 5). Tinăn, phung ƀuôn sang Aê Diê srăng mđrăm mbĭt kkuh mpŭ leh anăn myơr mnơ̆ng ngă yang kơ Aê Diê.
Anei jing klei mdê kluôm dhuôm hŏng klei phung Kanaan kkuh mpŭ kơ rup yang diñu kyuadah phung Kanaan brei phung ƀuôn sang diñu dưi myơr mnơ̆ng ngă yang tui si diñu pô čiăng, leh anăn tui si anôk diñu ruah, ƀiădah bi hŏng phung ƀuôn sang Israel knŏng sa anôk doh jăk leh anăn knŏng sa knưl kkuh mpŭ. Phung ƀuôn sang Aê Diê knŏng dưi kkuh mpŭ kơ Ñu tui si anôk Aê Diê ruah. Aê Diê knŏng mă tŭ mnơ̆ng myơr ngă yang kơ Aê Diê ti knưl hlăm anôk doh jăk Ñu. Leh anăn knŏng phung khua ngă yang Aê Diê ruah dưi bi ala myơr mnơ̆ng ngă yang. Bruă ngă brei mâo knŏng sa anôk doh jăk kơ phung ƀuôn sang Aê Diê kkuh mpŭ kơ Ñu mblang jing knŏng mâo sa Aê Diê, sa klei kkuh mpŭ leh anăn sa phung ƀuôn sang doh jăk. Anăn jing phŭn knhal si ngă Aê Diê amâo brei ôh phung ƀuôn sang mkra hdră bhiăn klei đăo tui msĕ hŏng klei bhiăn ngă phung kkuh kơ rup yang, ƀiădah brei diñu ngă bi djŏ klă tui si klei Aê Diê mtô mtă kơ klei kkuh mpŭ kơ Ñu. Mơ̆ng klei ngă anăn yơh phung găp djuê mkăn thâo kral klei mâo knŏng hjăn sa Aê Diê leh anăn si klei mdê phung ƀuôn sang doh jăk jing.
Sa klei sĭt hruê anei năng ênguôt êdi, lu blư̆ drei tăm mjing hĕ anôk kkuh mpŭ kơ Aê Diê jing knưl kdŏ mmuñ. Drei čŏng bi mlih mă pô hdră kkuh mpŭ kơ Aê Diê tui msĕ si lăn ala, bi lŭk klei hlăp lêñ lăn ala mŭt hlăm anôk kkuh mpŭ kơ Aê Diê ƀiădah amâo ksiêm bi nik ôh ya klei phŭn Aê Diê čiăng kơ phung ƀuôn sang Ñu hlăm klei kkuh mpŭ. Brei drei hdơr, klei kkuh mpŭ kơ Aê Diê djŏ, êlâo hĭn brei kyua Aê Diê leh anăn tui si Aê Diê čiăng amâo djŏ bi hrăp ai klei phung đăo čiăng ôh. Kyuanăn, êlâo kơ čiăng bi mlih amâodah lŏ thiăm ya mta klei hlăm klei kkuh mpŭ kơ Aê Diê, brei drei êmuh drei pô si ngă mta klei anăn djŏ hŏng klei bhiăn kkuh mpŭ kơ Aê Diê tui si Ñu čiăng mơ̆? Amâodah drei knŏng bi mŭt hdră lăn ala hlăm klei kkuh mpŭ?
Si ngă drei dôk kkuh mpŭ kơ Khua Yang tui si klei Khua Yang čiăng amâodah bi hrăp klei drei pô čiăng?
Wah lač: Ơ Khua Yang, bi mni kơ Khua Yang mtô leh kâo klei hriăm mơ̆ng hƀuê ênuk. Akâo kơ Ih brei kâo thâo săng klei kkuh mpŭ kơ Ih djŏ êlâo hĭn kyua Khua Yang leh anăn djŏ tui si Khua Yang čiăng. Akâo kơ Ih brei klei kâo kkuh mpŭ kơ Ih bi mơak kơ Ih nanao.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Y‑Nêhêmi 6:1-7:3
Kênh Youtube BHKTHN:
