Klei Aê Diê Blŭ: Klei Mmuñ Hđăp 51:1-5
Êlan kliăng: “Hlei pô mdăp klei soh ñu amâo srăng mâo klei đĭ kyar ôh, ƀiădah hlei pô hưn leh anăn lui klei soh anăn srăng mâo klei pap.” (Klei Bi Hriêng 28:13).
Klei êmuh ksiêm mĭn: Si klei mtao Y‑Đawit hưn klei soh ñu? Ya klei ñu akâo kơ Khua Yang ngă brei kơ ñu? Ya klei hưn bi sĭt brei ƀuh ñu kmhal sĭt kơ klei soh? Si drei bi knal kơ klei Khua Yang pap brei mơ̆ng klei drei hưn klei soh drei hŏng Ñu?
Klei Mmuñ Hđăp 51 hing ang jing Klei Mmuñ Hđăp mtao Y‑Đawit kmhal kơ klei soh, hlăk leh khua pô hưn êlâo Y‑Nathan nao ktrâo brei ñu ƀuh klei soh ñu ngă leh hŏng H’Batsêba leh anăn hŏng Y‑Uri (II Y‑Samuel 11-12). Mtao Y‑Đawit thâo kral klei soh prŏng ñu ngă leh amâo djŏ knŏng hjăn hŏng mnuih ôh ƀiădah wăt hŏng Aê Diê, Pô ñu dôk kkuh mpŭ. Mtao amâo hngah kơ klei soh ñu ôh, ñu amâo mgang, amâo dêč đuĕ amâodah mplĕ klei soh ñu kơ ya klei ôh… ƀiădah ñu thâo kral sĭt êmĭt klei soh ñu (êlan 3). Leh anăn ñu hưn klei soh, “Kâo ngă soh hŏng Ih, knŏng hŏng Ih yơh, leh anăn kâo ngă leh klei jhat ƀai ti anăp ală Ih;” (êlan 4a). Ñu ăt thâo kral wăt klei soh phŭn mơh, “Nĕ anei, arăng kkiêng kơ kâo leh hlăm klei wê, leh anăn amĭ kâo ba tian kơ kâo leh hlăm klei soh” (êlan 5).
Klă sĭt mtao Y‑Đawit thâo kral klei jhat ƀai ñu ngă leh jing klei ngă soh ti anăp Aê Diê leh anăn ñu ăt thâo săng mơh Aê Diê jing Pô kpă ênô ƀiădah ăt jing Pô bŏ hŏng klei jăk, klei pap. Kyuanăn, ñu akâo kơ Aê Diê pap brei kơ klei soh ñu tui si klei pap Aê Diê. Ñu amâo mdăp ôh klei soh ñu ti anăp Aê Diê kyuadah ñu thâo săng klă “Êlâo kơ êlah kâo blŭ, nĕ anei, Ơ Yêhôwa, Ih thâo leh klei kâo srăng blŭ anăn” (Klei Mmuñ Hđăp139:4). Klei Mmuñ Hđăp anei jing klei blŭ mtao Y‑Đawit kmhal kơ klei soh sĭt myơr kơ Khua Yang, wăt jing Klei Mmuñ Hđăp mkra brei kơ “khua mtô mmuñ” čiăng lač pô gĭt gai mmuñ, čiăng kơ dơ̆ng mơ̆ng mmông anăn hưn mdah klă kơ jih jang mnuih thâo klei soh leh anăn ai tiê mtao kmhal sĭt kơ klei soh. Kyua mơ̆ng klei anăn yơh Aê Diê pap kơ ñu leh anăn pap brei kơ klei soh ñu.
Aê Diê jing Pô thâo jih, Ñu thâo jih djăp mta klei thâodah drei hưn amâodah hơăi. Ƀiădah lĕ, Khua Yang čiăng drei hưn klei soh drei ti anăp Khua Yang hŏng ai tiê thâo kmhal sĭt leh anăn ƀuăn rơ̆ng lui klei soh čiăng mâo klei pap brei kơ klei soh. Ƀiădah klei jing anak mnuih khăng mdăp amâodah amâo mđing ôh kơ klei soh pô ngă, amâo jhŏng hưn klă leh anăn kăn akâo klei pap brei klei soh mơh. Sa čô mtao thâo mĭn hĭn kơ jih jang mnuih ti rŏng lăn ala anei brei thâo, knŏng hlei pô jhŏng hưn klei soh ñu kơh dưi mâo klei pap brei, bi hlei pô mdăp klei soh ñu amâo srăng mâo klei đĭ kyar ôh (Klei Bi Hriêng 28:13).
Yang Mngăt Jăk yơh jing Pô srăng kčŭt ƀuah, mñă brei drei thâo kral klei soh drei, brei jhŏng hưn klei soh ti anăp Khua Yang amâodah wăt ti anăp hŏng pô drei ngă soh. Khua ƀĭng kna Y‑Yôhan brei thâo klă snăk: “Tơdah drei hưn klei soh drei, Ñu jing sĭt suôr leh anăn kpă, srăng pap brei klei soh drei leh anăn bi doh hĕ drei mơ̆ng jih jang klei wê” (I Y‑Yôhan 1:9).
Si ngă drei jhŏng hưn klei soh drei leh anăn akâo kơ Khua Yang pap brei klei soh mơ̆?
Wah lač: Ơ Khua Yang, akâo kơ Ih đăm brei kâo mdăp klei soh kâo ôh, kăn dêč đuĕ amâodah bi lĕ kơ ya klei rei, ƀiădah thâo hưn klei soh nanao grăp blư̆ kâo ngă soh akâo kơ Khua Yang pap mñai leh anăn pap brei klei soh.
Dlăng Klei Aê Diê Blŭ hlăm tlâo thŭn: Y‑Êsra 2:43-3:7
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
