Klei Aê Diê Blŭ: Y‑Mathiơ 9:20-22
Êlan kliăng: “Kyuadah amâo mâo sa mta mnơ̆ng Aê Diê amâo dưi ngă ôh” (Y‑Luk 1:37).
Klei êmuh ksiêm mĭn: Ya ngă mniê mâo klei ruă hriê duah Khua Yang? Si klei truh pap mñai kơ ñu? Si klei jhŏng ñu tơdah ñu hriê duah Khua Yang leh anăn ruêh ti ao Ñu? Si boh tŭ dưn? Ya klei hriăm kơ drei mơ̆ng ai tiê tui duah Khua Yang mniê anei?
Klei yăl dliê anei truh hlăk êjai Khua Yang Yêsu êbat nao kơ sang khua kiă kriê sang kƀĭn čiăng bi hlao anak mniê ñu. Êjai ti êlan nao, mâo sa čô mniê luă mŭt hlăm phung lu leh anăn hriê ruêh ti knhal ao Khua Yang Yêsu mơ̆ng rŏng. Ya ngă ñu amâo jhŏng bi êdah ôh ƀô̆ mta čiăng akâo kơ Khua Yang bi hlao klei ruă ñu? Tui si Bruă Lêwi 15:19-30, mta klei ruă ñu ngă kơ ñu jing sa čô mnuih čhŏ mrŏ, brei ñu dôk hjăn, tŭ klei arăng mưč, arăng suôt đuĕ leh anăn amâo dưi mŭt hlăm Sang Yang čiăng kkuh mpŭ kơ Aê Diê ôh. Ñu dôk hlăm klei knap mñai anăn êjai pluh dua thŭn. Ară anei ñu jing ƀun ƀin rin tap knap mñai amâo adôk mnơ̆ng mnuă ôh, luč klei čang hmăng kyua klei ruă leh anăn nao yư̆ yơ̆ng giăm kơ klei djiê (Y‑Markôs 5:26). Drei ƀuh klei mniê anei jhŏng tơdah ñu amâo lŏ yap yuôm ôh klei bi kmhal jhat truh kyuadah ñu čŏng čiăng sô̆ mnuih mkăn êjai ñu dôk hlăm klei čhŏ mrŏ.
Ñu hriê duah khua Yang jing klei čang hmăng knhal tuč, kyua huĭ leh anăn hêñ snăn ñu ruah ruêh ti ao Khua Yang mơ̆ng rŏng, hrô kơ klei êran nao klăm ti jơ̆ng Khua Yang čiăng kwưh akâo. Wăt tơdah snăn dưn, drei mâo klei hriăm mơ̆ng klei đăo mniê anei tơdah ñu đăo knŏng dưi sô̆ kơ ao Khua Yang ñu srăng hlao mơh. Klei anei jing sa klei bi knal mrâo mrang snăk, sa klei lông dlăng sĭt hlăm klei đăo, ƀiădah ñu mâo klei đăo ktang tĭt srăng dưi mă tŭ klei bi hlao mơ̆ng Khua Yang. Tui si ênhă khua ƀĭng kna Y‑Mathiơ čih, mniê anăn dôk bi mĭn nanao knŏng khă bi dưi ruêh Khua Yang ñu srăng hlao. Leh anăn ñu ƀuh klei anăn jing sĭt mtam, klei ruă ñu dưi bi hlao (Y‑Markôs 5:29).
Êjai ñu ruêh ao Khua Yang hŏng klei đăo prŏng snăn Khua Yang Yêsu wir dlăng kơ ñu, Khua Yang amâo ƀuah amâodah phat kđi ñu ôh ƀiădah Ñu čiăng kơ mniê anăn mâo klei bi knal kơ sa klei bi hlao mơ̆ng adiê dlông. Boh blŭ “klei đăo” Khua Yang Yêsu yua jing klei đăo bi mtlaih, Ñu čiăng bi êdah kơ mniê anăn thâo amâo djŏ knŏng klei ruă ñu mâo klei bi hlao ƀiădah wăt mngăt ai tiê ñu Khua Yang bi hlao msĕ mơh.
Boh blŭ “mơak bĕ ih” čiăng lač êđăp ênang bĕ, ară anei ñu êđăp ênang amâo djŏ knŏng hlăm asei mlei ôh ƀiădah wăt êđăp ênang kyua lŏ dưi bi mguôp hŏng Aê Diê. Khua Yang Yêsu ba hriê sa klei bi hlao kluôm dhuôm kơ mniê anei.
Hruê anei Khua Yang ăt dôk iêu mthưr drei brei jhŏng hriê kơ Khua Yang, đăm rŭng răng, đăm huĭ ôh, kăn hêñ rei wăt tơdah drei hlăk dôk hlăm klei čhŏ mrŏ dưn Khua Yang ăt dưi bi hlao drei mơh. “Wăt tơdah klei soh diih jing hrah huč, diñu srăng jing kô̆ msĕ si pliêr; wăt tơdah diñu jing hrah jŭ, diñu srăng jing kô̆ msĕ si mlâo biăp” (Y‑Êsai 1:18b).
Si ngă drei jhŏng hưn mdah klei soh jŭ jhat drei kơ Khua Yang čiăng kơ Ñu bi hlao brei mơ̆?
Wah lač: Ơ Khua Yang, kâo thâo kral kâo knŏng jing sa čô mnuih čhŏ mrŏ bŏ hŏng klei soh, akâo kơ Khua Yang bi doh klei soh kâo mmông anei mtam hŏng êrah Khua Yang Yêsu Anak Aê Diê.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: II Klei Yăl Dliê 23:16 – 24:22
Kênh Youtube BHKTHN:
