Mathais 9:20-22
Nqe cim:
“rau qhov yeej tsis muaj ib yam dab tsi uas Vajtswv yuav ua tsis tau” (Lukas 1:37).
Lus nug rau sawvdaws xav:
- Vim li cas tus pojniam coj khaubncaws thiaj tuaj cuag tus Tswv?
- Tus pojniam ntawd muaj lub neej uas ntxim hlub zoo li cas?
- Qhov uas tus pojniam ntawd tuaj kov Yexus lub tw tsho qhia tias nws yog tus zoo li cas? Thiab thaum kawg nws tau dab tsi?
- Peb kawm tau yam dab tsi ntawm tus pojniam kev tuaj cuag tus Tswv?
Muaj ib zaj xwm tshwm rau thaum Tswv Yexus tab tom taug kev tuaj mus kho Yailus tus ntxhais. Thaum sawvdaws tab tom taug kev sib txiv qev, muaj ib tug pojniam raug mob nchuav cev txiv los nyiag kov Yexus lub tw tsho. Vim li cas tus pojniam ntawd thiaj tsis kam tshwm ntsejmuag thov Yexus kho nws tus mob? Raws li hauv Levis Kevcai 15:19-30, tus pojniam ntawd tus mob yog ua rau nws yog neeg tsis huv li kevcai lawm, nws raug cai tawm, raug saib tsis taus thiab raug txwv tsis tau mus pehawm Vajtswv hauv lub Tuamtsev. Tus pojniam ntawd tiv kev txomnyem tau kaum ob lub xyoos lawm, nws muab cuab tam muag ua nyiaj mus kho mob tsis tshuav dab tsi lawm thiab kho kawg kev yeej tsis zoo mob, tsuas nyob tos txog hnub tuag xwb (Malakaus 5:26). Peb pom tau tus pojniam ntawd muaj lub siab loj txaus, hla dhau kev ntshai txawm paub hais tias yuav raug luag rau txim thaum nws yog tus neeg tsis huv mus chwv lwm tus uas dawbhuv.
Tus pojniam ntawd tuaj cuag Tswv Yexus yog qhov kawg ntawm nws kev cia siab, vim ntshai lwm tus pom, nws thiaj nyiag kov Yexus lub tw tsho twjywm tsis pub leejtwg paub. Tiamsis peb kawm tau ib yam muaj nqis uas tus pojniam ntawd muaj yog kev ntseeg, nws ntseeg hais tias yog kov txog Yexus lub tw tsho xwb, ces tus Tswv yuav kho nws zoo mob. Qhov ntawd yog tau txais yam tshiab uas tus Tswv muab pub rau los ntawm kev ntseeg. Tus pojniam ntawd muaj kev ntseeg loj thiaj tau txais tus Tswv kho nws zoo mob. Raws li Mathais sau hais txog tus pojniam ntawd kev ntseeg, nws pheej xav hais tias tsuas yog chwv tus Tswv xwb ces nws yuav zoo mob. Thiab nws ua li nws xav, ces tamsim ntawd nws zoo mob lawm tiag (Malakaus 5:29).
Thaum kov txog tus Tswv lub tw tsho los ntawm kev ntseeg loj, ces ua rau Tswv Yexus tig los nug thiab saib tus pojniam ntawd. Tswv Yexus tsis cem thiab tsis yws tus pojniam ntawd, tiamsis Tswv Yexus xav kom nws paub hais tias, nws twb tau Vajtswv kho zoo mob lawm. Lo lus uas hais tias“koj kev ntseeg” thaum Tswv Yexus hais rau tus pojniam yog hais txog kev ntseeg uas pab dim txim. Tswv Yexus xav qhia rau tus pojniam ntawd paub hais tias, tsis yog kho nws zoo mob xwb, tiamsis nws sab ntsujplig los twb kho zoo lawm thiab. Cov lus “tsis txhob nyuaj siab” yog xav hais txog kev kaj siab, tsis yog tus pojniam ntawd tau kaj siab vim zoo mob lawm xwb, tiamsis tseem txais kev kaj siab vim tau los sib raug zoo nrog Vajtswv lawm. Tswv Yexus kho tau tus pojniam ntawd txoj mob sab nqaij tawv thiab mob sab ntsujplig huv tibsi.
Niaj hnub nimno tus Tswv yeej nqua hu peb txhua tus kom muaj lub siab loj txav los cuag Nws, txhob nyuaj siab, txhob txhawj ntshai thiab txhob txajmuag, txawm hais tias peb lub neej yav tas los phem npaum twg los xij, tus Tswv yeej yuav pab peb. “Txawm yog nej tej kev txhaum yuav liab cuag ntshav los kuv yuav ua kom dawb paug li daus, txawm yog nej tej kev txhaum dub doog los kuv yuav ua kom dawb paug li tej plaub yaj” (Yaxayas 1:18b).
Peb puas muaj lub siab loj, ua siab tawv qhawv los qhia peb tej kev txhaum rau tus Tswv, kom tau Nws kho peb zoo?
Thov Vajtswv,
Tus Tswv, nyuam yaus paub hais tias nyuam yaus yog tus neeg phem qias puv nkaus kev txhaum, thov Koj muab Yexus Khetos uas yog Vajtswv Leejtub cov ntshav tsimtxiaj ntxuav kom nyuam yaus dawb huv lub sijhawm no mus. Amees.
T Nyeem Vajluskub hauv peb lub xyoo: II.Xwmtxheej Vajntxwv 23:16-24:22
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
