I-Xamuyees 1:9-18
Nqe cim:
“Tus Tswv kom kuv nco ntsoov thov Nws tsis tseg pab nej, yog kuv tsis thov Nws pab nej, ces yog kuv ua txhaum rau Nws lawm. Kuv yuav qhia kom nej paub qhov zoo thiab qhov uas tsimnyog nej ua” (I-Xamuyees 12:23).
Lus nug rau sawvdaws xav:
- Hanas daws nws tej kev nyuaj siab li cas?
- Xamuyees teev tiam tus Tswv zoo li cas?
- Peb kawm tau dab tsi ntawm Hanas thiab Xamuyees yoog cai ruaj siab thov Vajtswv?
Xamuyees yog ib tug neeg Levis, nws niam hu ua Hanas tus xeeb tsis tau me nyuam. Hanas thov Vajtswv kawg siab ntsws kom pub rau nws muaj ib tug tub thiab coglus rau Vajtswv hais tias yuav fij tus tub ntawd ua neeg Naxis cia ua tus Tswv tes haujlwm mus tas nws tiam neej (nqe 10-11). Tus Tswv hlub Hanas, pub nws xeeb tub thiab yug tau ib tug tub muab tis npe hu ua Xamuyees uas txhais hais tias; “thov tau tus Tswv pub”. Hanas ua raws li nws coglus tseg, thaum Xamuyees cais taus mis lawd, nws coj mus rau ntawm tus Tswv lub tsev thiab muab cob rau tus povthawj Elis kom pib tag xyaum ua tus Tswv tes haujlwm. Xamuyees tau tus Tswv siv ua tus Tswv tes haujlwm mus tas nws simneej los ntawm lub meejmom: tus povthawj, tus cev lus thiab tus thawjtswj. Thaum cov Yixalayees tus vajntxwv xub thawj uas yog Xa-ules sawv kav tebchaws, Xamuyees hais rau cov Yixalayees hauv nws cov lus thaum kawg hais tias: “Tus Tswv kom kuv nco ntsoov thov Nws tsis tseg pab nej, yog kuv tsis thov Nws pab nej, ces yog kuv ua txhaum rau Nws lawm. Kuv yuav qhia kom nej paub qhov zoo thiab qhov uas tsimnyog nej ua” (I-Xamuyees 12:23).
Hanas thiab Xamuyees nkawd ob niam tub tau ua qauv zoo ntawm kev tswj lub siab, ruaj siab thov Vajtswv yog ib qhov uas tsimnyog txaus fwm. Ncua caij nyoog uas tsis muaj taus me nyuam, Hanas raug lwm tus ua saib tsis taus, muaj kev tawm tsam hauv sab siab ntsws, los ntawm tej neeg sab nraud thiab hauv yus tsev neeg uas yog Peninas. Hanas daws nws tej kev nyuaj siab los ntawm kev quaj ntsuag, kev ruaj siab taij thov tus Tswv… “ nyuaj siab heev, nws txawm sawv tsees, nws thiaj thov tus Tswv thiab quaj ncia heev…Hanas thov tus Tswv ntev loo, Elis saib ntsoov Hanas lub qhov ncauj” (nqe 10, 12). Xamuyees ua tus Tswv haujlwm hauv ncua sijhawm uas muaj cov thawjtswj, uas yog ncua sijhawm ntsib kev tsaus ntuj hauv Vajtswv haiv neeg uas: “lawv txhua tus nyias ua raws li nyias lub siab nyiam xwb” (Cov Thawjtswj 21:25b). Ntawm sab ntsujplig ces lawv muaj lub neej tsis zoo, tus Povthawj Elis ces ua tsis taus tawv, Elis ob tug tub tawv ncauj thiab ua kev phem qias. Tiamsis Xamuyees ruaj siab thov Vajtswv thiab ua tus Tswv tes haujlwm. Thaum kawg uas yuav cob lub meej mom rau cov Yixalayees tus vajntxwv Xa-ules sawv los kav, nws tseem nco ntsoov nws lub nra uas yog thov tus Tswv, nws hais ib nqe lus qhia paub txog nws kev ruaj siab thov tus Tswv uas muaj nqis kawg. Xamuyees hais meej rau cov Yixalayees hais tias, txawm nws tsis ua tus thawjtswj lawm los nws yeej nco ntsoov thov tus Tswv pab lawv. Thiab nws suav hais tias, qhov uas tsis thov tus Tswv pab tus Tswv haiv neeg yog ua txhaum rau tus Tswv lawm “Tus Tswv kom kuv nco ntsoov thov Nws pab nej tsis tseg, yog kuv tsis thov Nws pab nej, ces yog kuv ua txhaum rau Nws lawm…” (I-Xamuyees 12:23)
Kev ruaj siab taij thov Vajtswv thiab thov pab rau lwm tus ib yam li Hanas thiab Xamuyees yog ib tug qauv zoo rau peb sawvdaws xyaum ntawm kev thov Vajtswv. Tsimnyog cov ntseeg txhua tus yuav tsum muaj lub siab thov Vajtswv li ntawd, txawm peb yuav nyob rau lub tsamthawj zoo li cas los xij.
Puas muaj tej zaum peb tsis nco taij thov tus Tswv, thiab pheej thov Vajtswv pab rau lwm tus?
Thov Vajtswv,
Tus Tswv, thov pab nyuam yaus xyaum raws Hanas thiab Xamuyees nkawd tus qauv yoog cai ntawm sab ntsujplig, ruaj siab rau kev taij thov Koj pab, tshwjxeeb yog lub tsamthawj uas muaj kev nyuaj siab li thaum no. Amees.
T Nyeem Vajluskub hauv peb lub xyoo: II.Xwmtxheej Vajntxwv 16:1-17:19
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
