Klei Aê Diê Blŭ: I Y‑Samuel 1:9-18
Êlan kliăng: “Bi kâo dê, êbeh kơ anăn, hơăi kâo amâo srăng ngă soh ôh hŏng Yêhôwa tơdah mdei hĕ wah lač kyua diih. Kâo srăng mtô kơ diih êlan jăk leh anăn êlan kpă.” (I Y‑Samuel 12:23).
Klei êmuh ksiêm mĭn: Hŏng si êlan H’An êghaih mkra klei rŭng răng ñu? Si ngă Y‑Samuel mă bruă leh kơ Aê Diê? Ya mta klei drei hriăm mơ̆ng H’An leh anăn Y‑Samuel hlăm klei kpĭ mjuăt diñu pô hlăm klei wah lač leh anăn wah lač brei?
Y‑Samuel jing sa čô Lêwi. Amĭ ñu, jing sa čô mniê plao, gơ̆ kwưh akâo kơ Aê Diê hŏng jih ai tiê čiăng mâo anak. Gơ̆ ƀuăn tơdah Aê Diê wĭt lač kơ klei gơ̆ akâo, gơ̆ srăng myơr anak anăn jing sa čô Nasirê čiăng kơ anak gơ̆ dưi mă bruă kơ Aê Diê tơl jih klei hdĭp (êlan 10-11). Aê Diê mâo klei pap kơ gơ̆ brei gơ̆ ba tian leh anăn kkiêng sa čô anak êkei, bi anăn Y‑Samuel mblang jing “Aê Diê wĭt lač”. H’An bi sĭt klei gơ̆ ƀuăn rơ̆ng, hlăk Y‑Samuel adôk hđeh điêt, gơ̆ ba anak kơ Sang Yang leh anăn jao kơ khua ngă yang Y‑Hêli brei bi hriăm hđeh điêt anăn mă bruă kơ Aê Diê. Aê Diê yua Y‑Samuel mă bruă kơ Ñu tơl jih klei hdĭp hlăm bruă jing khua ngă yang, khua pô hưn êlâo leh anăn khua phat kđi. Hlăk mtao tal êlâo hĭn Y‑Sôl jing mtao, Y‑Samuel lač kơ phung ƀuôn sang Israel hlăm klei ñu mtô knhal tuč: “Bi kâo dê, êbeh kơ anăn, hơăi kâo amâo srăng ngă soh ôh hŏng Yêhôwa tơdah mdei hĕ wah lač kyua diih. Kâo srăng mtô kơ diih êlan jăk leh anăn êlan kpă.” (I Y‑Samuel 12:23).
Jih dua amĭ anak H’An leh anăn Y‑Samuel bi êdah rup bi hmô kơ klei kpĭ mjuăt diñu pô hlăm klei dôk gĭr wah lač năng mpŭ snăk. Hlăk êjai dŭm thŭn mlan dôk plao, H’An tŭ klei arăng bi kdơ̆ng kơ ai tiê klei mĭn ñu amâo tuôm mdei ôh, amâo djŏ knŏng ƀuôn sang mơ̆ng êngao ôh ƀiădah wăt mbĭt hŏng phung hlăm sang mơh jing H’Pênina. Ƀiădah ñu knŏng êghaih mkra klei rŭng ênguôt ñu hŏng êa ală, wah lač leh anăn dôk gĭr wah lač, “H’An rŭng răng êdi leh anăn wah lač kơ Yêhôwa leh anăn hia ênguôt… ñu ăt dôk wah lač ti anăp Yêhôwa” (êlan 10, 12). Y‑Samuel mă bruă kơ Aê Diê hlăm ênuk phung khua phat kđi, jing gưl ênuk mmăt tĭt hĭn hlăm hƀuê ênuk phung ƀuôn sang Aê Diê ruah, “grăp čô ngă tui si ñu mĭn djŏ” (Phung Khua Phat Kđi 21:25b). Tĭng kơ klei hdĭp mngăt, ai tiê kpă mnuih trŭn hrŏ kjham, khua ngă yang Y‑Hêli êdu awăt, dua čô anak êkei khua ngă yang jhat ƀai, ngă klei knhông. Ƀiădah Y‑Samuel ăt dôk gĭr wah lač nanao leh anăn jih ai tiê mă bruă kơ Aê Diê. Tơl truh hlăk ñu mdei bruă khua phat kđi kyua jao kơ mtao mrâo jing Y‑Sôl, Y‑Samuel kăn tuôm wơr bĭt rei bruă klam kơ ñu jing klei wah lač brei, klei ñu hưn lač bi êdah kơ ai tiê klei mĭn kpĭ mjuăt ñu pô dôk gĭr wah lač jing yuôm bhăn êdi. Ñu hưn klă hŏng phung ƀuôn sang Aê Diê wăt tơdah ñu amâo adôk jing khua phat kđi ôh ƀiădah ñu amâo wơr bĭt ôh wah lač brei kơ diñu. Leh anăn ñu yap klei amâo mđing uêñ wah lač brei kơ phung ƀuôn sang Aê Diê jing klei soh prŏng hŏng Yêhôwa. “Bi kâo dê, êbeh kơ anăn, hơăi kâo amâo srăng ngă soh ôh hŏng Yêhôwa tơdah mdei hĕ wah lač kyua diih” (I Y‑Samuel 12:23a).
Ai tiê klei mĭn kpĭ mjuăt diñu pô hlăm klei wah lač leh anăn wah lač brei mơ̆ng H’An leh anăn Y‑Samuel brei kơ drei rup bi hmô jăk siam hlăm klei hdĭp wah lač. Anei jing ai tiê klei mĭn grăp čô phung đăo brei mâo thâodah dôk găn hlăm ya mta klei truh dưn.
Si ngă tuôm mâo mơ̆ đa blư̆ drei mdei klei wah lač leh anăn wah lač brei?
Wah lač: Ơ Khua Yang, akâo kơ Ih đru kâo tui rup bi hmô mơ̆ng H’An leh anăn Y‑Samuel, thâo kpĭ mjuăt klei hdĭp mngăt, dôk gĭr hlăm klei wah lač leh anăn wah lač brei, boh nik hlăm klei truh dleh dlan ară anei.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: II Klei Yăl Dliê 16:1 – 17:19
Kênh Youtube BHKTHN:
