Klei Aê Diê Blŭ: Klei Bi Hriêng 14:25-27
Êlan kliăng: “Hlei pô huĭ mpŭ kơ Yêhôwa mâo klei knang kjăp, klei anăn srăng jing anôk kđap kơ phung anak Ñu” (Klei Bi Hriêng 14:26)
Klei êmuh ksiêm mĭn: Ya klei ngă čiăng lui klei jăk kơ anak čô? Ya klei bi hriăm drei mơ̆ng klei yăl dliê kơ Mtao Y‑Ahap plah mmiă đang boh kriăk ƀâo hlăm I Bruă Mtao 21? Ya klei yuôm bhăn drei čiăng lui kơ anak čô?
Grăp čô hlăm phung drei čiăng lui klei jăk sơăi kơ anak čô, ƀiădah hlăm boh sĭt, ênoh mnuih lui klei jăk kơ anak čô snăn ƀiă snăk, bi mnuih lui klei jhat snăn lu. Wăt tơdah brei bi hriăm anak knuih hdĭp jăk, thâo mĭn leh anăn bi hriăm anak kơ klei hdĭp mngăt, ƀiădah lu mông kyua khăp kơ prăk mah lu hĭn mâo mnuih dlăng hơaĭ mang ênoh yuôm knuih hdĭp jăk. Wăt tơdah ênoh yuôm hlăm mngăt yuôm bhăn hĭn ênoh yuôm mnơ̆ng dhơ̆ng hlăm kđeh, ƀiădah anak mnuih khăng duh kơ mnơ̆ng dhơ̆ng hlăm kđeh lu hĭn hlăm mngăt. Leh anăn klei năng ênguôt jing kyua klei soh, amâo huĭ mpŭ kơ Aê Diê mơ̆ng phung amĭ ama hmăi truh kơ knuih hdĭp anak čô leh anăn ba klei truh kơ djuê ana pô.
Klei thâo mơ̆ng pô lui klei jăk kơ anak čô jing bi hriăm anak čô huĭ mpŭ kơ Aê Diê jing klei blŭ sĭt nĭk, bruă pô ngă kpă ênô. Kyua “klei anăn srăng jing anôk kđap kơ phung anak Ñu”, leh anăn “Klei huĭ mpŭ kơ Yêhôwa jing akŏ êa kơ klei hdĭp” (êlan 26-27). Aê Diê srăng jing Boh Tâo Kjăp čiăng kơ grăp čô drei leh anăn anak čô drei kđap hlăk angĭn êbŭ thut ktang hlăm klei hdĭp leh anăn ñĕ kơ klei djiê. Huĭ mpŭ kơ Yêhôwa srăng ba klei êđăp ênang hlăm klei hdĭp anei leh anăn dưi dưn klei jăk mơak hlăm Ƀuôn Ala Mtao.
Năng ai lu hlăm phung drei bi mĭn pô mdăp klei soh amâo mâo hlei pô thâo ôh, si dưi hmăi hĕ kơ anak čô pô? Hlăm I Bruă Mtao 21 yăl dliê kơ klei Mtao Y‑Ahap plah mmiă đang boh kriăk ƀâo pô mkăn. Kyua tluh čiăng đei kơ đang boh kriăk ƀâo Y‑Naƀôt, mô̆ mtao H’Jêsêbel lač yua dua čô êkei nao kčŭt mčeh snei: “Y‑Nabôt tăm pah leh kơ Aê Diê leh anăn kơ mtao” (I Bruă Mtao 21:13), leh anăn diñu mă gơ̆ kơ tač ƀuôn leh anăn bhĭr boh tâo bi mdjiê gơ̆, mă đang boh kriăk ƀâo gơ̆. Mtao Y‑Ahap mjhua hŏng klei dưi mdjiê mnuih mă ngăn, amâo mâo ôh pô dưi bi kmhal ñu ƀiădah ñu hŏng anak čô ñu amâo dưi ñĕ đuĕ ôh kơ klei Aê Diê bi kmhal. Khua pô hưn êlâo Y‑Êli lač leh hŏng mtao: “Kâo ƀuh leh ih, kyuadah ih čhĭ leh ih pô čiăng ngă klei jhat ti anăp ală Yêhôwa. Nĕ anei, kâo srăng bi truh klei jhat kơ ih. Kâo srăng bi luč hĕ ih, leh anăn bi rai hĕ mơ̆ng sang Y‑Ahap jih jang phung êkei, hlŭn amâodah êngiê, hlăm čar Israel” (I Bruă Mtao 21:20-21). Kyua amâo huĭ mpŭ kơ Aê Diê, ung mô̆ Mtao Y‑Ahap ngă soh leh hŏng Aê Diê, hŏng pô mkăn, ngă mâo klei truh jhat jing tŭ klei bi kmhal kjham. Akâo kơ Aê Diê đru grăp čô drei hdơr klei Mtao Y‑Salômôn bi hriăm leh anăn ƀuh klei truh jhat Mtao Y‑Ahap lui kơ anak čô ñu čiăng drei thâo hdĭp kpă ênô, huĭ mpŭ kơ Aê Diê, bi hmô jăk, bi hriăm anak čô pô hdĭp huĭ mpŭ kơ Aê Diê čiăng gŏ sang mơak dưn klei jăk Aê Diê brei.
Drei mđing lui brei kơ anak čô pô mnơ̆ng yuôm hlăm mngăt amâodah mnơ̆ng yuôm hlăm kđeh?
Wah lač: Ơ Khua Yang, kâo bi mni lač jăk kơ Ih kyua Klei Aê Diê Blŭ bi hriăm kâo brei hdĭp kpă ênô, huĭ mpŭ kơ Aê Diê leh anăn mđing lui brei mnơ̆ng yuôm hlăm mngăt kơ anak čô. Akâo kơ Ih đru kâo leh anăn anak čô kâo dưi dưn klei jăk mơak Aê Diê brei.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: II Klei Yăl Dliê 5:2 – 6:11
Kênh Youtube BHKTHN:
