Pajlug 14:25-27
Nqe cim:
“Hwm tus Tswv koj thiaj muaj chaw cia siab, thiab koj cov xeebntxwv thiaj tau chaw vamkhom” (Pajlug 14:26).
Lus nug rau sawvdaws xav:
- Lub tswvyim pab tseg tau koob hmoov rau tej xeebntxwv yog dabtsi?
- Zaj xwm hais txog vajntxwv Ahaj txeeb lwm tus lub vaj txiv hmab nyob hauv Vajntxwv 21 qhia peb txog yam dabtsi?
- Tej yam tseemceeb twg uas peb xav khaws cia rau tej xeebntxwv?
Leejtwg los xav kom yus tej xeebntxwv tau koob hmoov, tiamsis raws li kev ua neej dhau los, cov uas tseg tau koobhmoov rau tej xeebntxwv mas tsawg heev, tsuas yog tseg kev puastsuaj ntau xwb. Txawm paub hais tias yuavtsum qhia tej menyuam kom ua neeg zoo, muaj txawj ntse thiab ua lub neej ntseeg zoo, los ntau zaug vim yog kev ntshaw nyiaj, thiaj ua rau coob tug saib tsis taus qhov uas qhia kom ua zoo. Txawm yog paub hais tias lub neej sab ntsujplig tseemceeb dua tej khoom ntiajteb, los tibneeg pheej siv zog nqis peev rau sab nqaij tawv heev dua li rau sab ntsujplig. Thiab yam txaus tu siab tshaj yog qhov uas cov ua niam ua txiv tej kev txhaum, kev tsis hwm Vajtswv tau ua hiam rau tej menyuam thiab tej xeebntxwv lub neej, thiaj coj kev puastsuaj los raug rau yus cajces.
Lub tswvyim rau tus neeg xav tseg tau koob hmoov rau lawv tej xeebntxwv, yog qhia tej xeebntxwv paub hwm tus Tswv dhau los ntawm yus tus kheej tej lus hais tseeb thiab tej haujlwm ncajncees. Vim “hwm tus Tswv koj thiaj muaj chaw cia siab”, thiab “kev hwm tus Tswv yog lub qhovdej cawm txojsia” (nqe 26-27). Tus Tswv yog lub pobzeb ruaj khov rau peb thiab peb tej xeebntxwv ua chaw nkaum thaum muaj nagxob nagcua los raug lub neej thiab pab dim txojkev tuag. Hwm tus Tswv ua rau peb lub neej tamsim no muaj kev kaj siab thiab yav tom ntej tau txais koob hmoov uas nyob mus ibtxhis.
Peb muaj ntau leej xav hais tias, tej kev txhaum uas yus ua yog ua zais ntshis tsis muaj leejtwg paub, yuav ua licas thiaj hiam tau rau tej xeebntxwv? Nyob hauv I.Vajntxwv 21 piav txog zaj xwm uas vajntxwv Ahaj mus txeeb Nanpaus lub vaj txiv hmab. Vim vajntxwv ntshaw Nanpaus lub vaj txiv hmab dhau lawm, niam vajntxwv Yexanpees thiaj tawm lub tswvyim siv ob tug neeg dag los ua timkhawv cuav hais tias: “Nanpaus tau foom Vajtswv thiab vajntxwv” (I.Vajntxwv 21:13), yog li ntawd lawv thiaj coj Nanpaus mus muab pobzeb txawb kom tuag thiab txeeb yuav nws lub vaj txiv hmab. Txawm hais tias vajntxwv Ahaj siv hwjchim tua neeg txeeb luag tug, yeej tsis muaj leejtwg txiav txim tau rau nws tiamsis nws, los nws tus kheej thiab tej xeebntxwv yuav khiav tsis dim Vajtswv txojkev txiav txim. Tus cevlus Eliyas hais rau vajntxwv hais tias: “Yog; kuv tuaj ntsib koj. Koj tau muab tagnrho koj lub cev muag mus ua txhaum tabmeeg tus Tswv. Yog li ntawd, tus Tswv hais rau koj hais tias, Kuv yuav tso sub tawg sub ntsha los rau koj. Kuv yuav sau zog koj thiab koj tsevneeg txhua tus txivneej laus thiab hluas kom tas dulug” (I.Vajntxwv 21:20-21). Vim tsis hwm tus Tswv, vajntxwv Ahaj nkawd ob niam txiv tau ua txhaum rau tus Tswv thiab nkawd tau raug txim hnyav heev. Thov Vajtswv pab kom peb txhua tus nco ntsoov tej lus uas vajntxwv Xalumoos qhia thiab pom tej kev puastsuaj uas vajntxwv Ahaj ua los hiam rau nws tej xeebntxwv, kom xwv peb paub ua lub neej ncaj ncees, hwm tus Tswv, ua qauv zoo, qhia tej menyuam ua neej hwm tus Tswv kom xwv peb tsevneeg thiaj nyob kaj siab lug, tau txais txoj koob hmoov uas tus Tswv pub.
Peb xav kom tej xeebntxwv tau txais qub txeeg qub teg sab ntsujplig los yog qub txeeg qub teg sab nqaij tawv?
Thov Vajtswv:
Tus Tswv, nyuam yaus ua Koj tsaug vim Koj Txojlus qhia nyuam yaus yuav tsum niaj hnub ua neeg ncaj ncees, hwm Koj thiaj yog ua qauv zoo pub rau tej xeebntxwv xyaum. Thov Koj pab nyuam yaus thiab nyuam yaus tej xeebntxwv tau txais txoj koob hmoov uas Koj pub mus ibtxhis. Amees.
Nyeem Vajluskub hauv peb lub xyoo: II.Xwmtxheej Vajntxwv 5:2-6:11
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
