Klei Aê Diê Blŭ: Y‑Yêrêmi 29:10-13
Êlan kliăng: “Hlăk anăn diih srăng iêô anăn Kâo leh anăn hriê wah lač kơ Kâo, leh anăn Kâo srăng hmư̆ diih. Diih srăng duah Kâo leh anăn bi tuôm hŏng Kâo tơdah diih tui duah Kâo hŏng jih ai tiê diih.” (Y‑Yêrêmi 29:12-13).
Klei êmuh ksiêm mĭn: Yêhôwa lač hbĭl Ñu srăng bi sĭt klei Ñu ƀuăn srăng atăt ba wĭt phung ƀuôn sang Ñu? Si klei brei ngă čiăng phung ƀuôn sang Aê Diê dưi bi tuôm hŏng Khua Yang leh anăn Ñu hmư̆ klei wah lač? Ya klei bi kgăn phung drei tui duah Aê Diê hŏng jih ai tiê?
Klei jing hlŭn mơ̆ng Khua pô hưn êlâo Y‑Yêrêmi hưn brei bi kdung truh kjuh pluh thŭn. Ƀiădah Aê Diê amâo wơr bĭt phung ƀuôn sang Ñu ôh, leh wưng kčah kjuh pluh thŭn jing hlŭn ti Ƀaƀilon mjưh ruĕ, Yêhôwa Aê Diê srăng nao čuă phung ƀuôn sang Ñu leh anăn ngă ya klei Ñu ƀuăn leh (êlan 10). Klei Aê Diê Blŭ lač anei jing sa hdră êđăp ênang mdrŏng sah amâo djŏ jing klei bi djiê mjih tuč ôh. Anăn jing klei čang hmăng kơ phung ƀuôn sang Ñu sĭt hdĭp hlăm klei jing hlŭn (êlan 11). Wăt tơdah snăn, brei diñu wah lač leh anăn tui duah Aê Diê hŏng jih ai tiê, Ñu srăng mđing hmư̆ leh anăn wĭt lač klei diñu kwưh akâo (êlan 12). Aê Diê čiăng ƀuh ai tiê phung ƀuôn sang Israel klă sĭt kmhal klei soh dưi bi êdah hlăm klei hdĭp tui duah Aê Diê, amâo djŏ tui duah tui si klei bhiăn diñu khăng ngă êlâo dih ôh, ƀiădah jih ai tiê klei mĭn tui duah Yêhôwa Aê Diê čiăng kkuh mpŭ leh anăn gưt hluê si Klei Aê Diê Blŭ mtô (Klei Mtô Mñă Klei Bhiăn 4:30). Aê Diê ƀuăn srăng atăt ba phung ƀuôn sang Ñu wĭt, ƀiădah brei diñu kwưh akâo; Aê Diê srăng bi sĭt klei ƀuăn ƀiădah brei diñu jih ai tiê tui duah Aê Diê (êlan 12-13).
Yêhôwa Aê Diê hưn brei răng mơ̆ng êlâo leh čiăng kơ phung ƀuôn sang Ñu djăl kmhal klei soh, ƀiădah kyua diñu khăng ai tiê, snăn brei diñu tŭ klei bi kmhal jing hlŭn. Aê Diê kăn lui diñu rei, Ñu ƀuh brei digơ̆ găn tŭ gưl hriăm mjuăt lông dlăng anei čiăng “Yêhôwa, Aê Diê diih srăng khăt klĭt ai tiê diih leh anăn ai tiê phung anak diih, snăn kơh diih srăng khăp kơ Yêhôwa, Aê Diê diih hŏng jih ai tiê diih leh anăn jih mngăt diih, čiăng kơ diih dưi hdĭp” (Klei Mtô Mñă Klei Bhiăn 30:6). Klei bi kmhal jing hlŭn ti Ƀaƀilon đru kơ phung ƀuôn sang Aê Diê hriê giăm Aê Diê hĭn, jih ai tiê kwưh akâo kơ Aê Diê bi sĭt klei Ñu ƀuăn leh, brei diñu wĭt ti ƀuôn sang. Kjuh pluh thŭn djăp kơ diñu thâo kơ klei dleh dlan leh, amâo dưi kkuh mpŭ kơ Aê Diê Kpă Ênô, ăt msĕ mơh lŏ ksiêm dlăng asei pô kơ klei ngă soh hŏng Aê Diê êlâo dih. “Kyuadah Khua Yang mkra mjuăt hlei pô Ñu khăp, leh anăn čăm hŏng giê grăp čô anak Ñu jum.” (Hêbrơ 12:6).
Wăt tơdah thâo klei mĭn êđăp ênang mơ̆ng Yêhôwa Aê Diê hŏng phung ƀuôn sang Israel ăt msĕ hŏng drei mơh ƀiădah lu blư̆ hlăm klei hdĭp, drei ăt ka klă sĭt tui duah Aê Diê hŏng jih ai tiê msĕ si Klei Aê Diê Blŭ lač leh ôh. Djŏ mơ̆ kyua klei čiăng hlăm klei hdĭp gĭt gai amâodah kyua klei hdĭp soh jhat ăt ngă kơ drei amâo jih ai tiê kkuh mpŭ kơ Aê Diê leh anăn gưt Klei Aê Diê Blŭ bi hriăm. Brei mđing hmư̆ Klei Aê Diê mtă “Diih srăng duah Kâo leh anăn bi tuôm hŏng Kâo tơdah diih tui duah Kâo hŏng jih ai tiê diih”
Drei tui duah Aê Diê hŏng jih ai tiê leh mơ̆?
Wah lač: Ơ Khua Yang Aê Diê bŏ hŏng klei myang leh anăn klei khăp! Kâo bi mni lač jăk kơ Ih kyua Ih brei leh kâo thâo klei khăp jăk leh anăn êlam Ih brei leh kơ phung ƀuôn sang Aê Diê wăt tơdah Ih bi kmhal diñu. Akâo kơ Aê Diê mă hĕ jih klei amâo năng hlăm ai tiê kâo čiăng kâo tui duah nanao Aê Diê hŏng jih ai tiê grăp hruê.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: I Bruă Mtao 1:26-12:11
Kênh Youtube BHKTHN:
