Klei Aê Diê Blŭ: Klei Mmuñ Hđăp 37:7-11
Êlan kliăng: “Jăk mơak yơh phung thâo luă gŭ, kyuadah diñu srăng dưn ya klei Aê Diê ƀuăn leh.” (Y-Mathiơ 5:5).
Klei êmuh ksiêm mĭn: Ya klei jăk mơak kơ phung luă gŭ dưi mă tŭ? Si klei bi mđĭ ai drei mơ̆ng klei hriăm kơ dŭm klei jăk mơak anei?
Năng ai klei hdĭp brei ƀuh phung luă gŭ yơh arăng kreh ktư̆ juă leh anăn tŭ klei luč liê, bi phung jhat ƀai “dưi hlăm klei ñu ngă” amâodah “dưi ngă klei jhat ñu čiăng” (êlan 7). Lu bliư̆ ai tiê drei rŭng ênguôt kyua dôk hdĭp mbĭt hŏng phung amâo mâo luă gŭ ôh, yap klei diñu mĭn yơh jing djŏ hĭn nanao, diñu pô yơh jing jăk hĭn kơ arăng, ăl krêñ tui si diñu čiăng…, boh sĭt gơ̆, phung mnuih anăn jing phung năng pap mñai snăk, kyuadah diñu bi luč klei hơ̆k mơak, êđăp ênang, bi luč wăt klei bi mguôp hŏng phung riêng gah.
Khua Yang Yêsu hưn kñăm phung thâo luă gŭ srăng dưn ya klei Aê Diê ƀuăn leh (Y-Mathiơ 5:5), “srăng dôk hơ̆k mơak kyua mâo mnơ̆ng êbeh dlai” (êlan 11). Êngao tinăn, phung luă gŭ lŏ mâo klei jăk mơak kyua thâo kral klei bi hriăm leh anăn klei Aê Diê čiăng kơ klei hdĭp diñu pô, leh anăn mâo klei bi knal kơ klei Aê Diê răng mgang (Klei Mmuñ Hđăp 25:9). Phung luă gŭ mdưm ñu pô nanao hlăm klei Aê Diê răng mgang, bi phung kƀah klei luă gŭ khăng krưh mgao, ênưih bi kdơ̆ng, ênưih ngă soh, ênưih bi têč hnêč arăng, mgang ñu pô nanao yơh ƀiădah amâo thâo ƀuh ôh diñu knŏng jing “msĕ si sa boh ƀuôn prŏng arăng bi klưh leh mnư̆” (Klei Bi Hriêng 25:28), čiăng lač kơ sa klei hdĭp klei jhat ƀai mŭt kbiă ênưih pưih.
Amâo djŏ knŏng dŭm năn ôh, phung thâo luă gŭ mâo klei hơ̆k mơak “kyuadah diñu srăng dưn ya klei Aê Diê ƀuăn leh” (Y-Mathiơ 5:5). Mtao Y-Đawit lač msĕ mơh, mâo đa bliư̆ phung jhat ƀai msĕ si mâo klei myun leh anăn đĭ kyar, ƀiădah êdei kơnăn diñu “arăng srăng bi rai hĕ” leh anăn “amâo srăng lŏ ƀuh phung ƀai ôh”, ƀiădah bi phung luă gŭ “srăng mă bha lăn čar” (êlan 9-11). “Srăng dưn lăn ala” mâo dua klei mblang. Tal sa, kyuadah phung luă gŭ đăo knang nanao kơ Aê Diê, thâo kral kơ ñu pô amâo mâo klei năng ôh, kyuanăn yơh diñu mơak hŏng ya mta klei Aê Diê thiê brei. Mnuih luă gŭ thâo săng ñu mâo djăp mta mnơ̆ng tơdah ñu jing dŏ Aê Diê, leh anăn srăng dưi dưn sĭt nik jih jang mnơ̆ng Aê Diê brei, hrô kơ klei jing hlŭn kơ ya mta mnơ̆ng ñu mâo. Msĕ si khua ƀĭng kna Y-Pôl lač kơ klei ñu bi knal snei, “msĕ si ênguôt, ƀiădah hmei hơ̆k mơak nanao, msĕ si ƀun ƀin, ƀiădah hmei bi mdrŏng lu mnuih, msĕ si amâo mâo mnơ̆ng ôh, ƀiădah hmei mâo djăp mta mnơ̆ng.” (II Kôrantô 6:10b). Tal dua, “lăn čar” diñu dưi dưn amâo djŏ mblang tui si êngal anei ôh ƀiădah čiăng lač kơ Ƀuôn Jăk. Phung anak Aê Diê jing “phung dưn ngăn Aê Diê, leh anăn phung dưn ngăn mbĭt hŏng Krist” (Rôm 8:17); hĭn kơnăn mơh, diñu srăng mbĭt hŏng Yang Krist “phat kđi lăn ala” (I Kôrantô 6:2).
Thâo săng klei hơ̆k mơak phung luă gŭ mâo, đru drei amâo lŏ êdu ai kyua phung ngă ƀai ôh, ƀiădah hŏng jih ai tiê knang kơ Khua Yang, dưm kluôm dhuôm klei đăo drei kơ klei Ñu ƀuăn, dôk hdĭp luă gŭ tui si Klei Blŭ Khua Yang mtô čiăng dưi mă tŭ klei hơ̆k mơak Aê Diê brei, leh anăn srăng dưi “dưn lăn čar” hlăk mbĭt hŏng Yang Krist kiă kriê sa êbâo thŭn êđăp ênang ti lăn ala leh anăn hlăm adiê mrâo leh anăn lăn ala mrâo.
Si ngă drei kreh mâo klei nač, êdu ai mơ̆ tơdah ƀuh phung ƀai mâo klei hdĭp đĭ kyar hĭn kơ drei?
Halêluya, hơêč hmưi bi mni kơ Aê Diê kyua klei Ih ƀuăn brei klei hơ̆k mơak kơ kâo. Akâo Ih đru kâo sĭt suôr êbat hlăm êlan Ih grăp hruê, leh anăn bi knal bruă Yang Mngăt Jăk bi doh kâo čiăng dưi jing sa čô thâo luă gŭ.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Phung Khua Phat Kđi 19
Kênh Youtube BHKTHN:
