Klei Aê Diê Blŭ: Klei Kbiă 23:1-9.
Êlan kliăng: “Đăm mčeh luar kơ pô riêng gah ih ôh” (Klei Kbiă 20:16).
Klei êmuh ksiêm mĭn: Phung ƀuôn sang Aê Diê brei hdĭp jăk hŏng hlei pô leh anăn mơ̆ng ya bruă ngă? Ya hdră Klei Aê Diê Blŭ bi hriăm čiăng đru kơ phung ƀuôn sang Aê Diê hdĭp jăk? Ya klei bhiăn hlăm klei hdĭp drei mâo mơ̆ng klei hriăm hruê anei?
Hdĭp jăk bi êdah mơ̆ng klei bi mklă kpă ênuah leh anăn bruă ngă klei khăp. Phung ƀuôn sang Aê Diê brei blŭ sĭt, amâo blŭ mčeh luar, dôk kbưi hŏng klei kčŭt mčeh (êlan 1,7), hưn bi mklă klei sĭt nik hlăm kđi klei (êlan 2a,6). Bruă ngă klei khăp dưi bi êdah sĭt hdĭp mtăp mđơr hŏng grăp čô mnuih: Đăm bi mtah ôh klei năng hlăm kđi mnuih ƀun leh anăn ktư̆ juă phung tue (êlan 3, 6, 9), amâo mdjiê mnuih amâo klei soh leh anăn phung knă ênô (êlan 1,7), Tơdah ih tuôm hŏng êmô pô roh ih amâodah aseh dliê ñu wơr dliê, brei ih atăt ba wĭt kơ pô gơ̆ (êlan 4), Tơdah ih ƀuh aseh dliê pô roh ih lĕ buh kyua ktrŏ đei mdiăng, đăm lui gơ̆ ôh, ƀiădah brei ih đru gơ̆ hrŏng mnơ̆ng mơ̆ng aseh dliê anăn (êlan 5). Bruă ngă klei khăp amâo djŏ knŏng kăm ngă klei jhat đuč ôh ƀiădah lŏ gĭr ngă klei jăk kơ phung riêng gah. Klei Aê Diê Blŭ brei thâo phung riêng gah mâo phung Aê Diê mdưn riêng gah pô, anăn jing phung ƀin ƀin, phung tue, boh nik phung roh hŏng pô (êlan 3-6,9). Khua Yang Yêsu ăt mtă kơ phung ƀĭng kna Ñu: “27Ƀiădah kâo lač kơ diih phung dôk hmư̆, khăp bĕ kơ phung roh diih, ngă jăk bĕ kơ phung bi êmut kơ diih. 28Hơêč hmưi klei jăk jĭn bĕ kơ phung tăm pah kơ diih; wah lač brei bĕ kơ phung ngă jhat kơ diih.” (Y-Luk 6:27-28).
Ti krah ala ƀuôn mâo lu mnuih mâo klei mĭn ktư̆ juă phung êdu awăt, mgang kơ phung mdrŏng sah, dôk tĭng phung mâo klei dưi čiăng duah klei tŭ dưn kơ pô, snăn phung ƀuôn sang Aê Diê ruah brei thâo săng hdĭp jăk kpă ênuah jing sa klei Aê Diê mtă, kyua knuih mơ̆ng Aê Diê jing kpă ênuah, amâo lui hlei pô ôh leh anăn ênuah ênô. Khua Yang mñă phung ƀuôn sang Ñu brei răng mgang klei kpă kơ phung ƀun ƀin leh anăn phung tuê (êlan 3, 6, 9).
Čiăng đru kơ phung ƀuôn sang Aê Diê hdĭp kpă ênuah, Aê Diê bi hriăm dŭm mta snei: Tal êlâo, grăp cô mnuih brei huĭ mpŭ kơ Aê Diê, hdĭp kpă ênuah čiăng bi mơak kơ Aê Diê, leh anăn thâo săng Khua Yang amâo pap brei ôh kơ phung ƀai (êlan 7). Tal dua, amâo brei pô lĕ hlăm klei mplư hưn klei amâo sĭt hlăm bruă mguôp hŏng phung ƀai amâo dah hluê phung lu ngă klei amâo kpă (êlan 1-2). Tal tlâo, đăm mă ôh mnơ̆ng sun ngăn kyua mnơ̆ng sun ngăn bi bum ală phung khua leh anăn bi mtah klei kđi phung kpă (êlan 8). Knhal tuč, dưm pô hlăm klei hdĭp pô mkăn, thâo săng kơ klei dleh dlan mơ̆ng phung tue leh anăn amâo ktư̆ juă ôh digơ̆ (êlan 9).
Čiăng hdĭp djŏ hŏng anăn pia jing Phung đaŏ kơ Krist, brei drei hdĭp msĕ si kan luê mklăk hŏng êlan êa đoh, srăng ngă mklăk hŏng klei mĭn hdĭp mơ̆ng yang ƀuôn čiăng hdĭp djŏ si klei Aê Diê čuăn, lăm lui knuih jhat pô čiăng hdĭp jăk kpă ênuah.
Drei srăng hdĭp jăk kpă ênuah čiăng jing hra kơ lăn ala ti krah yang ƀuôn mơ̆?
Ơ Khua Yang kpă ênô leh anăn bŏ hŏng klei khăp! Akâo kơ Ih brei kơ kâo thâo huĭ mpŭ kơ Khua Yang, mâo ai tiê thâo khăp leh anăn kpă ênô čiăng kâo dưi hdĭp jăk kpă ênuah ti anăp Khua Yang leh anăn phung riêng gah kâo tui si Klei Aê Diê Blŭ mtô.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Klei Yap 19
Kênh Youtube BHKTHN:
