Klei Aê Diê Blŭ: Klei Kbiă 22:31.
Êlan kliăng: “Brei diih jing mnuih doh jăk pioh brei kơ kâo; kyuanăn đăm ƀơ̆ng ôh kđeh mnơ̆ng mkăn kĕ hiêk hlăm hma; brei diih hwiê dŏ anăn kơ asâo.” (Klei Kbiă 22:31)
Klei êmuh ksiêm mĭn: Si jing mnuih doh jăk kơ Aê Diê? Ya ngă Khua Yang kăm đăm ƀơ̆ng ôh kđeh mnơ̆ng mkăn kĕ hiêk hlăm hma? Ya klei hriăm drei mâo kơ Aê Diê leh anăn klei bi mguôp Aê Diê hŏng phung ƀuôn sang Israel? Ya klei mñă kơ drei mơ̆ng klei hriăm anei?
Hlăm pruê̆ knhal tuč kdrêč 22, Aê Diê bi mklă phung ƀuôn sang Aê Diê “srăng jing mnuih doh jăk” kơ Ñu. Boh blŭ “doh jăk” jing pioh hjăn kơ sa mta kñăm. Israel jing djuê ana dưi ruah, dưi pioh hjăn čiăng ngă bruă kơ Aê Diê doh jăk. Diñu dưi pia jing phung anak êkei kkiêng tal êlâo mơ̆ng Aê Diê (Klei Kbiă 4:22), jing sa djuê ana phung khua ngă yang (Klei Kbiă 19:5-6) anăn phung ƀuôn sang Aê Diê ăt brei hluê ngă klei bhiăn msĕ si klei bhiăn kơ phung khua ngă yang djuê ana Y-Arôn (êlan 31b, Bruă Lêwi 22:8)
Phung ƀuôn sang Aê Diê ruah amâo djŏ jing phung doh jăk kơ Aê Diê čiăng hdĭp doh jăk hlăm knhuah hdĭp đuč ôh ƀiădah brei doh jăk hlăm kđeh, anăn phung ƀuôn sang Aê Diê amâo dưi ƀơ̆ng ôh kđeh čĭm mnơ̆ng mkăn kĕ hiêk hlăm hma kyua cĭm anăn amâo doh jăk ôh kyua mnơ̆ng ƀơ̆ng kđeh čĭm leh anăn mač hdăm. Êngao anăn, kđeh mnơ̆ng anăn amâo dưi mă jih êrah djŏ tui si klei Aê Diê kčah kơ bruă kăm amâo ƀơ̆ng êrah. Čiăng kơ phung kăn amâo tuôm hŏng klei mplư ƀơ̆ng kđeh čĭm mnơ̆ng mkăn kĕ hiêk, phung ƀuôn sang hwiê dŏ anăn kơ asâo (êlan 31c). Hruê anei, drei dưi thâo săng klă êrah jing anôk jăk kơ lu mta kman lêč lar. Kđeh čĭm mnơ̆ng mkăn kĕ hiêk hlăm hma năng ai mâo mta mnơ̆ng ruă ba klei ruă huĭ hyưt kơ anak mnuih.
Klei Aê Diê ƀuăn hlăm Y-Êsai 1:19 snei: “Tơdah diih čiăng gưt asăp, diih srăng ƀơ̆ng boh jăk hĭn hlăm čar.” Aê Diê jing Pô mkăp djăp mta mnơ̆ng phung ƀuôn sang Ñu čiăng. Phung ƀuôn sang Aê Diê ruah amâo guôn yua mnơ̆ng ƀơ̆ng mơ̆ng hlô mnơ̆ng djŏ mta ruă anăn ôh. Bi mni lač jăk kơ Aê Diê kyua klei khăp leh anăn klei Aê Diê kiă kriê kơ phung ƀuôn sang Ñu đưm dih ăt msĕ mơh kơ phung đaŏ kơ Ñu hruê anei. “Jăk mơak yơh pô ih ruah leh anăn brei gơ̆ nao giăm ih, čiăng brei gơ̆ dôk hlăm wăl sang ih! Hmei srăng trei hŏng klei jăk sang ih, sang yang doh jăk ih.” (Klei Mmuiñ Hđăp 65:4)
Klei Bhiăn Aê Diê ba klei jăk hĭn leh anăn klei tŭ kơ phung ƀuôn sang Aê Diê. Phung ƀuôn sang Aê Diê ruah đưm dih amâo mâo klei pia kơ kman ôh ƀiădah hlei pô tui hluê djăp mta klei Aê Diê mtă jing phung thâo mĭn. Aê Diê iêu mthưr phung ƀuôn sang Ñu hruê anei brei hdĭp doh jăk hlăm kđeh, ai tiê leh anăn mngăt. Phung ƀuôn sang Aê Diê ăt brei lui jih klei čhŏ mrŏ ngă jhat kơ pô leh anăn mtưp kơ pô mkăn.
Ya bruă drei ngă čiăng răng kriê asei mlei pô jing sang yang kơ Aê Diê jing doh jăk?
Ơ Khua Yang, kâo bi mni lač jăk kơ Ih kyua Ih pioh hjăn kâo jing mnuih doh jăk kơ Ih. Bi mni lač jăk kơ Ih brei leh klei bhiăn jăk leh anăn kriê dlăng kâo hlăm djăp mta bruă! Kâo ƀuăn dlăng kơ Khua Yang doh jăk, đaŏ knang leh anăn gưt asăp Ih čiăng grăp hruê ƀrư̆ jing msĕ Ama hlăm adiê hĭn.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Klei Yap 18:8-32
Kênh Youtube BHKTHN:
