Klei Aê Diê Blŭ: Klei Bi Hriêng 11:15
Êlan kliăng: “Hlei pô rơ̆ng kơ sa čô tue srăng mâo klei luh liê kyua klei anăn,
ƀiădah hlei pô bi êmut kơ klei rơ̆ng anăn mâo klei hnŭk ênang.”( Klei Bi Hriêng 11:15)
Klei êmuh ksiêm mĭn: Si ngă mtao Y-Salômôn mtô kơ anak ñu hlăm bruă rơ̆ng kơ phung tue? Si ngă bruă klam kơ pô rơ̆ng anăn? Si ngă drei srăng ngă tơdah mâo tue yua drei rơ̆ng?
Rơ̆ng jing bruă mnuih tal tlâo ƀuăn rơ̆ng srăng ngă hrô dŭm bruă kơ mnuih mâo bruă klam tơdah digơ̆ amâo dưi bi leh bruă ƀuăn leh ôh. Mtao Y-Salômôn mtô kơ anak ñu mâo klei răng tơdah čiăng rơ̆ng kơ sa čô mnuih. Klei amâo răng hlăm bruă rơ̆ng kơ sa čô mnuih srăng ênưih ba klei amâo jăk, mklăk hŏng anăn răng amâo rơ̆ng kơ sa čô tue srăng ba klei êđăp ênang kơ anak. Hlăm Klei bi hriêng 6:1-5, mtao Y-Salômôn mtô kơ anak ñu hŏng wăt kơ mnuih riêng gah, tơdah ih rơ̆ng kơ sa čô mnuih, jing ai đuôm nư leh hŏng pô ih rơ̆ng anăn; tơdah mâo klei amâo jăk snăn ih srăng luă gŭ, akâo čiăng tlaih kơ klei amâo jăk. Kyuanăn ti anei rơ̆ng kơ sa čô tač êngao mâo dah sa čô tue lŏ mâo klei amâo jăk kjham hĭn.
Tơdah tŭ ư rơ̆ng kơ sa čô čan prăk jing tŭ ư gui bruă klam ngăn prăk kơ pô anăn, jing tŭ ư gui jih klei amâo jăk tơdah mâo klei truh ngă kơ pô čan amâo mâo dưi tla ôh. Pô rơ̆ng srăng hdĭp hlăm klei huĭ hyưt kyua bruă anei amâo djŏ knŏng hmaĭ kơ ngăn prăk đuič ôh, ƀiădah lŏ hmaĭ kơ k’hưm leh anăn klei đăo knang.
Amâo mâo ôh sa čô mnuih čiăng amĭ ama pô tŭ klei hêñ kyua ñu đuôm nư arăng. Klei đuôm nư mơ̆ng phung ƀuôn sang Aê Diê amâo djŏ knŏng hmaĭ kơ gŏ sang đuič ôh ƀiădah lŏ hmaĭ kơ Sang Aê Diê leh anăn anăn Khua Yang. Anăn jing boh phŭn kơ klei drei răng hlăm bruă đuôm nư, ăt msĕ mơh bruă rơ̆ng kơ sa čô tue. Khădah klei răng hlăm bruă rơ̆ng kơ mnuih mkăn amâo djŏ ôh ngă ngơi mang kơ dŭm klei dleh dlan, knap mñai pô mkăn. Khua Yang Yêsu tŭ lu klei knap mñai, klei arăng čăm biêng, leh anăn djiê ti kyâo bi kal čiăng kơ drei dưi hdĭp leh anăn mâo klei hdĭp êđăp ênang (dlăng hlăm I Pêtrôs 2:21-24), phung drei srăng bi đru gui dŭm klei ktrŏ (Galati 6:2). Lu mnuih hlăm phung drei tuôm leh hŏng lu klei ênguôt hnĭng, klei kƀah kyua đru kơ ayŏng amai adei pô. Ƀiădah brei drei mâo ai tiê êđăp ênang kyua Khua Yang thâo dŭm klei dleh dlan, knap mñai anăn drei ngă leh kyua anăn Aê Diê. Brei drei srăng bi mđĭ ai hdơ̆ng drei msĕ si hlăm Klei Aê Diê Blŭ: “8Kyuadah hlei pô rah kơ kđeh ñu pô srăng wiă mơ̆ng kđeh ñu klei rai tuč; ƀiădah hlei pô rah kơ Yang Mngăt jăk srăng wiă mơ̆ng Yang Mngăt Jăk klei hdĭp hlŏng lar. 9Đăm brei drei jing êmăn ôh hlăm klei ngă jăk, kyuadah tơdah drei amâo êdu ai ôh drei srăng wiă tơdah truh djŏ yan. 10Snăn êjai hruê găl, brei drei ngă jăk kơ jih jang mnuih, boh nik nak kơ phung ayŏng adei hlăm klei đăo.” (Galati 6:8-10). Akâo kơ Yang Mngăt Jăk brei klei thâo săng čiăng phung drei thâo klei djŏ, ya klei amâo năng ngă čiăng mâo klei hdĭp bŏ hŏng klei khăp msĕ si Klei Aê Diê Blŭ mtô.
Ya drei srăng ngă tơdah mâo mnuih yua drei đru kơ ngăn prăk?
Ơ Khua Yang, kâo bi mni lač jăk kơ Ih kyua Ih khăp, pap kơ klei soh kâo leh anăn brei klei hơêč hmưi kơ kâo hlăm grăp hruê. Akâo kơ Ih lŏ brei kơ kâo klei thâo mĭn hlăm klei dôk dơ̆ng ƀơ̆ng huă hŏng phung riêng gah čiăng kơ kâo dưi bi êdah klei kpă ênô leh anăn klei Ih khăp hlăm klei hdĭp kâo.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Klei Yap 14:39-15:21
Kênh Youtube BHKTHN:
