Klei Aê Diê Blŭ: I Kôrantô 13:8-10.
Êlan kliăng:
“Klei khăp amâo tuôm tuč ôh; ƀiădah klei hưn êlâo srăng tuč. Klei blŭ klei tue mdê mdê srăng ruê̆; klei thâo săng srăng êgao tuč” (I Kôrantô 13:8).
Klei êmuh ksiêm mĭn: Ya ngă klei thâo hlăm mngăt blŭ klei hưn êlâo, klei tue, klei thâo srăng tuč? Ya ngă knŏng klei khăp dôk lă lar? Ya klei khua ƀĭng kna Y-Pôl čiăng bi hriăm Sang Aê Diê Kôrantô leh anăn phung drei?
“Srăng tuč”, “srăng ruê̆”, “srăng êgao” jing dŭm boh blŭ Y-Pôl yua lač kơ klei bi kdriêl mơ̆ng klei hưn êlâo, blŭ klei tue, klei thâo (êlan 8). Leh anăn čiăng lač kơ klei jing êjai mơ̆ng klei mrâo lač anei, khua ƀĭng kna Y-Pôl hưn mthâo sa klei dôk lă lar, amâo rai tuč, anăn jing klei khăp. Ñu brei thâo tơdah drei dôk čang guôn klei jăk mơak srăng truh snăn klei ka jăk mơak msĕ si klei thâo, klei hưn êlâo ăt tŭ dưn, khă gơ̆ dŭm klei anăn amâo srăng dôk lă lar ôh, kyua hlăm ƀuôn jăk, drei mâo Aê Diê mjing klei ka kluôm ênŭm srăng kluôm ênŭm, leh anăn dưi hdĭp hlăm klei Khua Yang kiă kriê anăn amâo lŏ čiăng ôh klei thâo amâo dah klei hưn êlâo. Leh anăn hlăm ƀuôn jăk knŏng mâo klei blŭ hlăm ƀuôn jăk kyua anăn amâo lŏ čiăng ôh klei thâo blŭ klei tue. Kyua anăn dŭm klei anăn srăng amâo dôk lă lar ôh, knŏng klei khăp dôk lă lar, kyua Aê Diê jing klei khăp (I Y-Yôhan 4:8,16).
Tinei, amâo djŏ khua ƀĭng kna Y-Pôl dlăng hơaĭ mang klei hưn êlâo, klei thâo blŭ klei tue, amâo dah klei thâo. Klei bi mklă jing ñu tuôm bi mklă klei tŭ mơ̆ng klei brei mơ̆ng Yang Mngăt Jăk kơ phung đaŏ hlăm dŭm kdrêč êlâo. Khădah, ñu čiăng kơ grăp čô mnuih ƀuh klei thâo anăn knŏng jing êjai anăn ñu srăng êgao tuč. Mbĭt anăn ñu ăt lač kơ ênoh yuôm mbĭt hŏng klei tŭ mơ̆ng klei khăp jing yuôm bhăn leh anăn lă lar, leh anăn anei ăt jing klei mơ̆ng grăp cô mnuih čang hmăng, tui duah čiăng dưi mâo hlăm klei hdĭp pô. Anăn jing mta phŭn knhal jih kdrêč 12, khua ƀĭng kna Y-Pôl mtă kơ phung đaŏ ti Kôrantô “Ƀiădah brei diih čiăng snăk kơ klei brei yuôm hĭn. Ară anei kâo srăng bi êdah sa êlan jăk hĭn kơ diih.” (I Kôrantô 12: 31). Klei brei prŏng hĭn leh anăn êlan jăk hĭn, jing klei khăp.
Sĭt lač “Klei khăp amâo tuôm tuč ôh”, khua ƀĭng kna Y-Pôl čiăng kơ phung đaŏ Kôrantô leh anăn phung drei, grăp čô mnuih lŏ dlăng wĭt klei hdĭp pô. Drei đăm tui tiŏ ôh klei jing êjai tơl mâo klei bi mmiă, bi kah hlăm Sang Aê Diê, ƀiădah brei drei tui duah klei dôk lă lar, anăn jing klei khăp.
Drei hlăk dôk tui duah klei khăp lă lar mơ̆?
Ơ Khua Yang bŏ hŏng klei khăp, pô khăp leh kâo leh anăn čiăng kơ kâo bi êdah klei khăp hŏng ayŏng adei sa klei đaŏ leh anăn phung riêng gah kâo. Akâo kơ Khua Yang đru kâo thâo êlam hĭn klei Khua Yang khăp grăp hruê leh anăn lŏ mâo thiăm ai ktang mơ̆ng Ih čiăng bi êdah klei khăp amâo tuôm tuč kơ grăp cô mnuih.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
