Klei Aê Diê Blŭ: Y-Êsai 1:10-17
Êlan kliăng: “Hriăm ngă bĕ klei jăk, Tui duah klei djŏ, mgang brei mnuih arăng ktư̆ juă. Ngă klei djŏ kơ phung anak êrĭt, blŭ mgang brei kơ phung mniê djiê ung” (Y-Êsai 1:17)
Klei êmuh ksiêm mĭn: Ya mta klei Khua Yang dôk ƀuah kơ phung ƀuôn sang Ñu? Si klei Khua Yang bi hriăm phung ƀuôn sang Ñu brei dôk hdĭp kpă ênô sĭt êmĭt ti krah ala ƀuôn? Si drei mă yua klei hriăm anei?
Wăt tơdah hlăm ênuk klei bhiăn amâodah klei pap, Aê Diê čoh čuăn nanao kơ phung anak ƀuôn sang Ñu brei dôk hdĭp kpă ênô leh anăn ênuah jăk, amâo knŏng hlăm Phung Sang Aê Diê ƀiădah wăt hlăm ala ƀuôn mơh. Ƀiădah lĕ phung ƀuôn sang Yuđa êlâo adih hdĭp amâo mâo mtăp mđơr, ngă soh, lui Aê Diê, tơl wăt bi êmut kơ Khua Yang (Y-Êsai 1:4). Phung mnuih Aê Diê ƀuah jing phung mnuih dlăng ti êngao hur har kkuh mpŭ kơ Aê Diê, msĕ si myơr mnơ̆ng ngă yang, djă pioh hruê mlan mrâo, hruê Sabat, jih hruê knăm leh anăn wah lač sui mmông. Khua Yang iêô kơ phung ƀuôn sang Yuđa pô yơh hŏng anăn iêô kơ dua boh ƀuôn prŏng ngă soh hing ang hĭn hlăm hƀuê ênuk jing Sôđôm leh anăn Gômôrơ, brei ƀuh klei hdĭp ênuah ênô hroh trŭn năng huĭ êdi (êlan 10-15)! Klă mngač yơh, klei bi mguôp hŏng Khua Yang čoh čuăn brei mâo klei hdĭp kpă ênô nao mbĭt. Phung ƀuôn sang Aê Diê nao kkuh mpŭ kơ Ñu ƀiădah ăt dôk hdĭp hlăm klei soh, ngă klei amâo mâo mtăp mđơr hlăm ala ƀuôn, kyuanăn yơh Khua Yang ƀuah ktang snăk. Klei Blŭ mtô lač anei mñă kơ drei amâo dưi dlăng hơăi mang ôh kơ klei hdĭp kpă ênô tơdah tui hlue Khua Yang.
Klei Aê Diê Blŭ hlăm Y-Êsai 1:4-7 brei thâo kơ phung ƀuôn sang Aê Diê dôk hdĭp amâo mtăp mđơr leh anăn ngă soh, bi mjing klei hdĭp myang diñu ruă êka msĕ si klei ruă mtưp. Boh kŏ diñu ruă hrŭm hrăm, ai tiê diñu mčah rai. Dơ̆ng mơ̆ng plă jơ̆ng hlŏng truh kơ čŏng kŏ, amâo mâo sa anôk adôk hmum ôh, bŏ hŏng kplač êka, gru čăm, anôk brăm bŏk ka păn guôm, ka mmia êa drao dluih bi êđăp êdu klei ruă ôh. Klei dôk kbưi hŏng Khua Yang, yap hơăi mang Klei Aê Diê Blŭ ngă kơ lăn čar jing ênguôl, arăng plah mă. Khua Yang yua Khua pô hưn êlâo Y-Êsai hưn êlâo brei phung ƀuôn sang Aê Diê răng dôk hdĭp kpă ênô, kyuadah klei anăn yơh Khua Yang čoh čuăn Ñu srăng mơak mă tŭ klei kkuh mpŭ leh anăn mđing hmư̆ klei diñu wah lač (êlan 14-15). Čiăng dôk hdĭp kpă ênô hlăm ala ƀuôn, mta bruă êlâo hĭn brei thâo kral klei soh pô, kmhal klei soh hŏng Khua Yang leh anăn čuăn ai tiê lui hĕ, “Rao bĕ diih pô, bi doh bĕ diih pô”, čuăn ai tiê “Mă hĕ klei jhat mơ̆ng klei diih ngă”, mblang jing amâo ngă soh ôh hŏng mta klei Aê Diê kăm, amâo ngă klei jhat kơ mnuih mkăn. Ƀiădah lĕ, dôk hdĭp kpă ênô, ênuah jăk hlăm ala ƀuôn mâo hlăm anăn lu mta bruă amâo ênưih ngă ôh, kyuanăn brei “Hriăm bĕ ngă klei jăk”. Brei čŏng tui duah leh anăn ngă klei kpă ênô, đru phung arăng ktư̆ juă, dŏng mgang phung kŏ krei asei hjăn, amâo ư ai mbĭt ôh hŏng phung yua klei dưi diñu čiăng ngă jhat ktư̆ juă mnuih mkăn (êlan 16-17).
Hruê anei, drei ăt ênưih snăk mơh lĕ hlăm klei mplư kkuh mpŭ kơ Aê Diê knŏng ti êngao, tui si hdră bhiăn; ƀiădah dôk hdĭp hŏng mnuih mkăn amâo mâo mtăp mđơr ôh, knŏng khă bi mâo klei tŭ dưn kơ pô đuč. Klei hriăm mñă kơ drei snei, Aê Diê amâo dlăng kơ drei tui si rup ti êngao ôh, ƀiădah Ñu dlăng kơ drei tui si knhuah hdĭp kpă ênô hlăm Phung Sang Aê Diê, hlăm gŏ sang leh anăn wăt hlăm ala ƀuôn hŏng bruă ngă sĭt êmĭt. Hdĭp bĕ kpă ênô čiăng kơ lu mnuih dưi ƀuh Khua Yang găn hŏng klei hdĭp drei.
Si drei dôk hdĭp kpă ênô hlăm ala ƀuôn čiăng bi guh kơang kơ Anăn Aê Diê?
Wah lač: Ơ Ama kpă ênô! Akâo Ih bi hriăm leh anăn đru kâo dôk hdĭp kpă ênô, ênuah jăk amâo knŏng hjăn hlăm Phung Sang Aê Diê ôh, ƀiădah wăt hlăm gŏ sang leh anăn ala ƀuôn, čiăng kơ Anăn Khua Yang mâo klei mpŭ mni găn hŏng klei hdĭp kâo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Yôp 29
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
