Yaxayas 1:10-17
Nqe cim:
“…thiab xyaum ua neeg zoo nrhiav kev ncaj ncees, pab tej neeg uas raug tsimtxom, ua ncaj rau cov menyuam ntsuag thiab pab cov pojntsuam” (Yaxayas 1:17)
Lus nug xav:
– Tus Tswv tabtom cem Nws haivneeg txog yam dabtsi?
– Tus Tswv qhia kom Nws haivneeg ua neej ncaj ncees hauv zej zog li cas?
– Peb yuav siv Vajtswv Txojlus no los xyaum ua neej li cas?
Txawm yog nyob rau tiam Txoj Kevcai lossis tiam koob hmoov, los Vajtswv yeej ibtxwm kom Nws haivneeg yuav tsum ua neej ncaj ncees thiab ua zoo, tsis yog tsuas ua hauv Pawg Ntseeg xwb, tiamsis ua hauv zej zog thiab. Tiamsis haivneeg Yudais thaum ub tau ua neej tsis ncaj ncees thiab ua txhaum, tso tus Tswv tseg, thiab tseem ua saib tsis taus Nws (Yaxayas 1:4). Cov neeg uas raug tus Tswv cem ntawd, hnov cuag li lawv kub siab pehawm tus Tswv heev, xws li muab khoom fij, ceev hnub Hli Xiab, hnub Xanpataus, hnub ua tej kevcai so thiab kev thov Vajtswv ntev ntev. Tus Tswv muab ob lub nroog uas nto npe tshaj plaws txog kev txhaum hauv keebkwm, uas yog Xaudoos thiab Kaumaulas los hu haivneeg Yudais, xav qhia hais tias lawv txojkev ua zoo tau poob qis heev lawm thiab txaus ntshai kawg li (nqe 10-15)! Tseeb tiag, kev sib raug zoo nrog tus Tswv yuav tsum muaj lub neej ncaj ncees nrog nraim. Tus Tswv haivneeg pehawm Nws tiamsis tseem ua neej hauv kev txhaum thiab ua tej yam tsis ncaj ncees hauv zej zog, yog li ntawd tus Tswv thiaj rau txim hnyav rau lawv. Tej lus qhia no ceeb toom peb tias thaum raws tus Tswv qab, peb tsis txhob tso lub neej ncaj ncees tseg.
Vajtswv Txojlus hauv Yaxayas 1:4-7 qhia rau peb paub hais tias Vajtswv haivneeg ua neej tsis ncaj ncees thiab ua txhaum, ua rau lawv lub neej sab ntsujplig raug mob ib yam li kab mob kis. Lawv tej taubhau twb ua kiav txhab thoob plaws, thiab lawv tej siab tej ntsws twb mob ncus nco lawm. Txij ntua hauv kotaw mus nto plaws saum taubhau thoob plaws lawv lub cev twb tsis muaj ib qho zoo li; tsuas pom o doog thiab ua qhov txhab xwb. Lawv twb tsis qhwv lawv tej qhov txhab, tsis tu kom zoo thiab tsis muab tshuaj rau li. Qhov uas txav deb tus Tswv thiab saib tsis taus Vajtswv Txojlus ua rau lawv lub tebchaws raug muab tso tseg ua suab puam thiab raug yeeb ncuab txeeb tau. Tus Tswv siv tus Cevlus Yaxayas ceebtoom Nws haivneeg kom ua neej ncaj ncees, vim qhov ntawd yog yam uas ua rau tus Tswv txaus siab txais lawv tej kev pehawm thiab mloog lawv tej lus thov (nqe 14-15). Yog xav ua neej ncaj ncees hauv zej zog, qhov xubthawj yuav tsum lees paub yus tej kev txhaum, hloov siab lees txim rau tus Tswv thiab txiav txim siab tso tseg, cia li “ntxuav…kom huv”; cia li “tso plhuav tej kev phem kev qias” tseg, txhais tau hais tias tsis ua tej uas tus Tswv txwv thiab tsis ua phem rau lwm tus. Txawm li ntawd los, kev ua neej ncaj ncees thiab ua zoo hauv zej zos yeej muaj ntau yam tsis yoojyim ua, yog li ntawd yuav tsum “xyaum ua neeg zoo.” Peb yuav tsum mob siab nrhiav thiab xyaum ua ncaj ncees, pab cov uas raug tsimtxom, tiv thaiv cov uas tsis muaj chaw vamkhom thiab tsis koom tes nrog tej hwjchim phem rhuav tshem lwm tus (nqe 16-17).
Niaj hnub nimno, peb yooj yim raug ntxias poob rau kev pehawm tus Tswv raws li tej kab ke sab nraud thiab raws tej kevcai xwb; peb tsis ua ncaj rau lwm tus, tsuas xav ua zoo rau yus tus kheej. Zaj kawm no ceebtoom peb hais tias Vajtswv tsis saib peb raws li tej yam tshwm sab nraud, tiamsis Nws saib los ntawm tej haujlwm uas peb ua qhia tshwm lub neej ncaj ncees hauv Pawg Ntseeg, hauv tsev neeg thiab hauv zej zos. Peb cia li ua neej ncaj ncees kom coob leej pom tus Tswv dhau ntawm peb lub neej.
Thov Vajtswv
Leej Txiv uas ncaj ncees! Thov Koj qhia thiab pab nyuam yaus ua tau lub neej ncaj ncees, tsis yog tsuas ua ncaj ncees hauv Pawg Ntseeg xwb, tiamsis kuj ua ncaj ncees hauv tsev neeg thiab hauv zej zos, kom Koj lub npe tau koob meej dhau ntawm nyuam yaus lub neej. Nyuam yaus tuav Yexus Khetos lub npe thov, Amees.
Peb tabtom ua neej ncaj ncees hauv zej zos li cas kom Vajtswv tau koob meej?
Nyeem Vajluskub hauv peb lub xyoos: Yauj 29
Kênh Youtube BHKTHN:
