2 Petus 2:1-3
Nqe cim:
“Lawv yuav qhia tej zaj uas yuav coj nej mus raug kev puastsuaj rau nej, thiab lawv yuav tsis lees hais tias lawv paub Yexus Khetos tus uas tuag txhiv lawv lawm, thiab tib ntsais muag xwb lawv yuav raug kev puastsuaj” (2 Petus 2:1b)
Lus nug xav:
– Cov xibhwb cuav tshwm nyob qhov twg, thiab lawv qhia kev ntseeg li cas?
– Nujnqi ntawm cov xibhwb cuav thiab cov neeg uas mloog lawv qhia yuav zoo li cas?
– Peb yuav tsum ua li cas thiaj tsis poob rau cov xibhwb cuav txoj kev qhia yuam kev?
Tus Tswv Yexus tau hais tseg rau Nws cov thwjtim hais tias, thaum txog tiam kawg yuav muaj ntau tus cev Vajtswv lus cuav tshwm los (Mathais 24:11). Tseeb tiag, cov xibhwb cuav yeej tshwm muaj nyob hauv cov ntseeg lawm, timthawj Petus ceebtoom hais tias yuav muaj cov xibhwb cuav tshwm tawm hauv cov ntseeg thiab hauv Pawg Ntseeg los. Cov xib hwb cuav no ua txuj ua zoo li cov tim tswv uas ci ntsa iab (II Kauleethaus 11:14). Lawv hais tias lawv paub Vajtswv thiab qhia Vajtswv Txojlus. Tiamsis Ntxwgnyoog yog leej txiv ntawm txoj kev dag, cov xibhwb cuav los kuj “qhia tej zaj uas tsis muaj hauvpaus hauvntsis ntxias nej kom lawv tau zoo xwb”. Lawv siv txoj kev ntseeg los ua lag luam nrhiav nyiaj thiab kev tau zoo rau lawv tus kheej, lawv tsis quav ntsej txog tej nujnqi uas lawv thiab cov mloog yuav raug ris li (nqe 3). Vim cov xibhwb cuav muaj lub siab ntshaw nyiaj txiag lawv thiaj “qhia tej zaj uas yuav coj nej mus raug kev puastsuaj rau nej, thiab lawv yuav tsis lees hais tias lawv paub Yexus Khetos tus uas tuag txhiv lawv lawm, thiab tib ntsais muag xwb lawv yuav raug kev puastsuaj” (nqe 1). Tej lus uas lawv qhia ntawd tsis zoo ib yam li tej lus uas cov cev Vajtswv lus tseeb tau qhia hauv Phau Vajlukub Qub. Lawv hloov thiab txhais yuam kev tej lus qhia ntawm tus Tswv Yexus thiab cov thwjtim. Thaum cov xibhwb cuav qhia tej yam uas tsis haum Vajlugkub, qhov ntawd qhia hais tias lawv twb tsis lees paub tus Tswv uas yog tus Cawmseej thiab tus uas tau txhiv lawv lawm. Thaum kawg, yam lawv tau txais yog “tib ntsais muag xwb lawv yuav raug kev puastsuaj” (nqe 1).
Thaum xubthawj, cov xibhwb cuav xav hais tias lawv yuav dim Vajtswv txoj kev txiav txim. Tiamsis ntev tsis lig, lawv yuav raug kev puastsuaj tseeb tseeb xwb, vim “Tus uas yuav txiav txim, nws twb txiav txim rau lawv ntxov los lawm, thiab tus uas yuav ua kom lawv puastsuaj nws twb npaj txhij lawm” (nqe 3). Cov neeg uas mloog thiab ua raws cov xibhwb cuav, kuj zoo ib yam li tus neeg uas xaiv taug txoj kev dav thiab yoojyim, tiamsis thaum kawg yuav raug kev puastsuaj ibtxhis (Mathais 7:13–14). Timthawj Petus ceebtoom hais tias: “Muaj ntau leej yuav ua phem ua qias raws li cov neeg ntawd ua; twb yog vim lawv ua li ntawd, thiaj li muaj neeg thuam txojkev uas yog txoj tseeb” (nqe 2). Vim cov xibhwb cuav ua neej ua dog ua dig, tshwm ntau yam kev txhaum thiaj ua rau cov neeg tsis ntseeg thuam thiab saib tsis taus Vajtswv lub npe.
Niaj hnub no, peb tabtom ntsib ntau yam lus qhuab qhia yuam kev uas los ntawm ntau pab neeg ntseeg cuav tshwm los ntxias cov ntseeg Vajtswv tseeb. Peb yuav tsum nco ntsoov hais tias Ntxwgnyoog yog tus dag ntxias, nws siv cov xibhwb cuav los dag thiab ntxias coob leej. Cov ntseeg yuav tsum rau siab kawm Vajlugkub thiab cia Vaj Ntsujplig qhia kom peb totaub Vajtswv Txojlus tseeb, kom ceevfaj tau cov neeg uas tsis ua raws Vajtswv Txojlus thiab siv lawv lub tswvyim los txhais Vajlugkub. Peb yuav tsum txiav tu nrho tsis txhob nrog cov neeg uas tshaj tawm thiab nqua hu kom sawvdaws ua tej yam uas tawmtsam qhov tseeb uas Vaj Ntsujplig tau qhia hauv Vajtswv Txojlus. Peb yuav tsum ceevfaj heev, vim yog cov xibhwb cuav raug kev puastsuaj, ces cov neeg uas mloog, ntseeg thiab ua raws lawv qhia kuj yuav raug kev puastsuaj thiab, vim: “Ib tug digmuag yeej coj tsis tau ib tug digmuag kev li; yog nws ua li ntawd, nkawd yeej yuav mus poob kwjdeg xwb?” (Lukas 6:39).
Thov Vajtswv,
Tus Tswv, thov pab kom nyuam yaus nyiam thiab rau siab kawm Koj Txojlus, kom nyuam yaus thiaj paub Koj heev zuj zus. Thov pab kom nyuam yaus tsis txhob ua raws tej lus qhuab qhia uas tawmtsam qhov tseeb, thiab pab kom nyuam yaus khiav deb ntawm txhua yam kev phem, kev qias. Nyuam yaus tuav Tswv Yexus Khetos lub npe thov, Amees.
Peb ceecfaj li cas rau cov xibhwb cuav?
Nyeem Vajluskub hauv peb lub xyoos: Yauj 24
Kênh Youtube BHKTHN:
