Klei Aê Diê Blŭ: Klei Mphŭn Dơ̆ng 14:13-16
Êlan kliăng: “Tơdah Y-Abram hmư̆ kơ anak adei ñu jing mnă leh, ñu atăt ba tlâo êtuh pluh sa păn čô ñu bi hriăm leh, phung kkiêng leh hlăm sang ñu, leh anăn tiŏ phung roh truh ti ƀuôn Dan” (Klei Mphŭn Dơ̆ng 14:14)
Klei êmuh ksiêm mĭn: Êjai Y-Lot dôk hdĭp hlăm klei bi blah ngă, bi Y-Abram si klei hdĭp ñu jing? Si ñu ngă tơdah thâo arăng mă anak adei ñu? Ya klei hriăm drei mâo mơ̆ng klei yăl dliê anei?
Tơdah Y-Lot ruah mŭt dôk hlăm ƀuôn Sôđôm kyuadah mĭn anăn jing anôk lăn jing, mâo klei êđăp ênang, ƀiădah ti knhal tuč jing hĕ mnă kơ klei bi blah, bi klei hdĭp Y-Abram jing mdê snăk. Jih jang mnuih thâo kơ ñu jing “mnuih Hêbrơ” (êlan 13). Anăn iêô tui si anăn Y-Êber, jing aê phŭn diñu (Klei Mphŭn Dơ̆ng 11:16), brei ƀuh klei Y-Abram dôk dơ̆ng ƀơ̆ng huă mâo klei mdê klă snăk, amâo mâo klei bi klŭk ôh, wăt tơdah dôk hdĭp hlăm čar phung Kanaan, phung Amôrit dưn. Leh anăn wăt tơdah jing mdê dưn, ñu ngă klei bi mguôp čiăng dôk mbĭt hŏng klei êđăp ênang hlăm čar (êlan 13). Y-Abram hdĭp hŏng klei êđăp ênang, mâo klei hing ang leh anăn mâo klei bi hmăi jăk, ñu mâo truh kơ 318 čô phung kkiêng leh hlăm sang ñu mâo klei bi hriăm, mprăp leh pioh kơ klei bi blah.
Tơdah hmư̆ kơ anak adei ñu arăng mă jing mnă leh, Y-Abram kgŭ mtam čiăng bi mtlaih gơ̆. Tui si klei jing, Y-Abram dưi hngah amâo nao bi mtlaih Y-Lot ôh, ƀiădah ñu ngă klei bi mtlaih kyua klei pap. Ñu thâo tơdah amâo ngă sa mta klei ôh, anak adei ñu srăng dôk hlăm klei huĭ hyưt snăk. Ñu bi kƀĭn jih jang phung hlăm ñu leh anăn dơ̆ng tiŏ phung roh (êlan 14). Mkă hŏng phung kahan pă čô mtao ngă klei bi mguôp, kahan Y-Abram amâo lu ôh. Y-Abram yua hdră bi blah “Êjai mlam…bi mbha phung mnuih ñu, ksŭng blah” hŏng phung roh (êlan 15). Ti knhal tuč phung kahan Y-Abram dưi hŏng phung roh, lŏ hrui mă jih jang ngăn drăp phung roh tlĕ mă leh, leh anăn yuôm hĭn jing ñu bi mtlaih anak adei ñu Y-Lot mbĭt hŏng jih jang mnuih hlăm sang gơ̆ (êlan 16).
Hlăm klei hdĭp, mâo lu blư̆ drei tŭ klei pô mkăn bi êka kyua bruă pô anăn ngă amâo djŏ ôh, leh anăn tơdah pô anăn mâo klei truh, drei amâo čiăng đru pô anăn ôh. Ƀiădah Khua Yang čiăng drei dôk dơ̆ng hŏng jih jang mnuih hŏng klei thâo pap, klei thâo pap amâo mtrŭt drei lŏ rŭ ênua ôh, ƀiădah “brei klei jăk ih ngă dưi hŏng klei jhat” (Rôm 12:21). Anăn yơh jing klei dôk dơ̆ng ƀơ̆ng huă djŏ tui si klei Khua Yang mtă leh anăn bi mơak kơ Ñu. Yuôm hĭn jing, klei yăl dliê kơ Y‑Abram čŏng čiăng kbiă mơ̆ng anôk ñu hdĭp êđăp ênang hung nao kơ klei bi blah čiăng bi mtlaih Y-Lot jing sa klei bi hmô jăk snăk kơ klei bi wir klei mĭn drei phă Khua Yang Yêsu Krist, Pô kkiêng leh mơ̆ng găp djuê Y-Abram, čŏng čiăng lui jhưng mtao hlăm adiê trŭn hriê ti lăn ala anei čiăng bi mtlaih mnuih mơ̆ng klei bi kmhal kơ klei soh. Hŏng klei anăn drei mâo klei bi mtlaih mơ̆ng klei rai luč atăt truh kơ anôk mâo klei hdĭp leh anăn hdĭp klei hdĭp mâo boh tŭ dưn. Ksiêm mĭn bĕ kơ klei anei leh anăn myơr klei bi mni kơ Khua Yang.
Mơ̆ng klei bi hmô hlăm klei Y-Abram dôk dơ̆ng ƀơ̆ng huă, si drei mĭn kơ êlan srăng bi êdah klei hdơr knga bi mni kơ klei Khua Yang Yêsu bi mtlaih?
Wah lač: Ơ Khua Yang Yêsu khăp ơi, kâo bi mni kơ Ih kyua klei bi hmô bŏ hŏng klei thâo pap mơ̆ng Y‑Abram. Ƀiădah êgao hĭn kơ jih jang, kâo bi mni kơ Ih čŏng čiăng hriê ti lăn ala čiăng bi mtlaih kâo mơ̆ng klei rai luč kyua klei soh. Đru kâo hdĭp bi êdah nanao klei Ih pap kơ jih jang mnuih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Yôp 10
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
