I Yauhas 3:2-11
Nqe cim zaj kawm:
“Yog nej paub li ntawd lawm, ces thaum txog Hnub uas Yexus Khetos rov qab los, nej thiaj yuav zoo kawg nkaus tsis muaj ib qho txhaum li. Twb yog vim Yexus Khetos nyob hauv nej lub siab lawm, nej thiaj ua tau nej lub neej zoo kawg nkaus rau Vajtswv tau ntsejmuag.” (Filipis 1:10-11)
Lus nug xav:
– Vim li cas peb yuav tsum ua neej ncaj ncees thiab dawb huv?
– Yuav ua li cas peb thiaj ua tau lub neej ncaj ncees?
– Lub neej ncaj ncees yuav tau txais txiaj ntsig dabtsi?
Pawg Ntseeg chiv thawj tabtom raug cov xibhwb cuav tawm tsam. Lawv qhia hais tias Tswv Yexus tsis los yug ua neeg muaj cev nqaij daim tawv (I Yauhas 4:2-3), vim lawv xav hais tias cev nqaij daim tawv yog kev txhaum thiab tsis muaj cuabkav koom tau nrog lub cev tshiab uas dawb huv. Tsis tas li ntawd xwb, lawv tseem qhia hais tias kev ua txhaum ntawm cev nqaij tsis cuam tshuam rau tus ntsujplig, zoo ib yam li muab av nkos lo rau ntawm ib lub qe zeb muaj nqis di-amoos, av nkos tsuas lo rau sab nraud xwb, hos sab hauv lub qe zeb di-amoos tseem zoo nkauj li qub. Qhov ntawd ua rau lawv poob mus rau kev noj tsau haus qaug, ua plees ua yi, thiab ywj siab ua lwm yam kev txhaum vim lawv xav hais tias tej no tsuas yog khoom sab nqaij tawv cuamtshuam rau khoom sab nqaij tawv xwb! Timthawj Yauhas tawm tsam txojkev xav no thiab qhia hais tias thaum peb ntseeg Tswv Yexus peb yog “Vajtswv menyuam” thiab “Tus uas yog Vajtswv menyuam lawm, tus ntawd yeej tsis nyiam ua txhaum, rau qhov nws yog Vajtswv cov noob… Tus uas tsis nyiam ua ncaj ncees lossis tsis hlub nws kwv nws tij, tus ntawd tsis yog Vajtswv menyuam” (nqe 9-10). Cov ntseeg Yexus yuav tsum ua neej ncaj ncees thiab nrhiav txojkev dawb huv, vim peb twb yog Vajtswv cov menyuam lawm. Vajtswv tus yamntxwv nyob hauv peb.
Lub zog txhawb Vajtswv cov menyuam hauv Pawg Ntseeg kom nrhiav txojkev dawb huv yog txojkev cia siab loj uas yuav tau ntsib tus Tswv, “peb yuav zoo li Nws.” Thaum muaj txojkev cia siab ntawd nyob hauv peb lub siab, ces peb yuav tswj kom peb “ua tau lub neej dawbhuv ib yam li Yexus Khetos uas yog tus dawbhuv” (nqe 2-3).
Peb yuav tsum vamkhom Vaj Ntsujplig pab kom ua neej ncaj ncees phim peb lub meejmom uas yog Vajtswv cov menyuam. Tus Tswv twb muab lub tsho ncaj ncees uas dawb huv kawg nkaus rau peb hnav lawm; peb feemxyuam yog txuag lub tsho ntawd kom tsis txhob raug tej kev txhaum hauv ntiajteb tsuas ua rau qias neeg. Timthawj Yauhas qhia meej hais tias lub neej sab cev nqaij daim tawv muaj feem cuam tshuam rau lub neej thiab lub meejmom sab ntsujplig: “Tus uas cia Yexus Khetos kav nws lub neej lawm, tus ntawd tsis nyiam ua txhaum; tiamsis tus uas tseem nyiam ua txhaum, tus ntawd yeej tsis tau pom lossis tsis tau paub Yexus Khetos li” thiab “Tus uas tsis nyiam ua ncaj ncees lossis tsis hlub nws kwv nws tij, tus ntawd tsis yog Vajtswv menyuam” (nqe 6, 10)! Lo lus “tsis nyiam ua txhaum” txhais hais tias “tsis ua neej hauv kev txhaum ntxiv lawm.” Raws li Timthawj Yauhas, kev ua neej ncaj ncees tsis yog tsuas tsis nyob hauv kev txhaum xwb, tiamsis “ib leeg yuav tsum hlub ib leeg” (nqe 11).
Timthawj Yauhas tau kos ib daim duab qhia txog lub neej ncaj ncees thiab sib hlub uas muaj txhij txhua. Thaum Pawg Ntseeg muaj Vajtswv tus yamntxwv nyob hauv lawv lub siab lawm, ces txhua tus ntseeg yuav tsum ua neej thiab qhia tshwm tus Tswv tus yamntxwv rau sawvdaws pom, dhau ntawm lub neej ncaj ncees thiab sib hlub raws li Vajtswv Txojlus qhia, kom neeg ntiajteb paub tus Tswv dhau ntawm cov uas yog Nws cov menyuam.
Thov Vajtswv,
Leej Txiv uas dawb huv, ncaj ncees thiab hlub tshua! Nyuam yaus ua Koj tsaug uas Koj tau zam nyuam yaus tej kev txhaum thiab pab nyuam yaus ua neej dawb huv ib yam li Tswv Yexus. Thov Vaj Ntsujplig ua kom nyuam yaus dawb huv thiab ua neej sib hlub nrog cov kwvtij nkauj muam txhua hnub. Nyuam yaus tuav Tswv Yexus Khetos lub npe thov, Amees.
Cov neeg nyob ib ncig ntawm peb puas pom peb lub neej ncaj ncees thiab sib hlub nrog peb cov kwvtij nkauj muam?
Nyeem Vajluskub hauv peb lub xyoos: Yauj 4
Kênh Youtube BHKTHN:
