Sachari 8:16-17
“’Nâu tơdrong lu iĕm athei pơm: Athei pơma tơpăt dih băl, arih hiôk chơt hăm rông ‘bôt, athei sek tơlang mă tơpăt hơnơ̆ng” (Sachari 8:16)
Nơ̆r jet tơchĕng pơwao:
– Kră Yang krao lu kon pơlei Isơrael athei pơm tơdrong kiơ?
– Tơdrong gĭt kăl âu noh jơ̆ tơdrong kiơ?
– Tơdrong bơtho âu đei lơi yua thoi yơ lăm hnam dơnŏ?
Đơ̆ng rŏng kơ pơm đĭch bơnă lăm teh đak nai (Babylôn), kon pơlei Isơrael đei man tơiung pơlei Jêrusalem hăm hnam akŭm, mălei krao khan ‘Bok Kei-Dei wă hloh kơ lu sư noh jơ̆ tơiung dơ̆ng tơdrong ‘lơ̆ng păng tơdrong tơ’bưh dih băl. Kră Yang khan: “’Nâu tơdrong lu iĕm athei pơm: Athei pơma tơpăt dih băl, arih hiôk chơt hăm rông ‘bôt, athei sek tơlang mă tơpăt hơnơ̆ng. ‘Nĕ chă tơdrong kơnê̆ lăm jơhngơ̆m ‘nĕ kơ tơhil hăm lu rông ‘bôt; păng ‘nĕ kơ pơma hơlĕnh, yua kơ noh jơ̆ tơdrong mă Inh areh.” Kră Yang khan thoi noh, ‘nâu jơ̆ nhen thưk hơgăt kơ tơdrong arih sa hơdai lăm kon pơlei pơla wă kơ tơ’bôh pơchrang kơ a-năn Kră Yang: Tơpăt, tơpă hăm tơdrong ‘mêm mơnat.
Athei pơma tơpăt dih băl (trong 16), tơ’bôh kơ tơdrong gĭt kăl kơ tơdrong tơpăt lăm tơdrong arih mă lăm hnam dơnŏ dah arih hăm kon pơlei pơla. Tơdrong tơpăt lăm hnam dơnŏ blŭng a noh jơ̆ đơ̆ng nơ̆r pơma păng tơdrong pơm mă tơpăt. Kơplah đei tơdrong hơlĕnh đei truh, lei jơ̆ ưh pă đei tơdrong lui ngeh dih băl; dah tơdrong tơpăt đei bơwei lei ba ăn tơdrong ‘mêm rai đunh rai wơ̆ kơjăp.
Kră Yang đei krao pơtơm pơm thoi âu: “’Nĕ chă tơdrong kơnê̆ lăm jơhngơ̆m ‘nĕ kơ tơhil hăm lu rông ‘bôt” (trong 17a). tơdrong âu nhen thoi nơ̆r Kră Yang Yêsu đei bơtho kơ lu bơ̆n lăm tơdrong ‘mêm mơnat kơ bơngai mă jih ‘ma kơ bơ̆n păng ưh kơ răk rong mong găr wă pơrăm bơngai nai (Mathiơ 22:37-39; Markôs 12:31). Tơdrong bơtho tơ’bôh âu tơ’blŏk ăn kơ bơ̆n kăl kơ đei tơdrong mơnat dih băl, hăm đei jơhngơ̆m hlôh dih băl lăm tơdrong pơma dơnuh lăm hnam dơnŏ hăm kon pơlei pơla. Hơrĭ, Kră Yang đei ăn tơdrong nơ̆r ată hơđăl dêh thoi âu: “’nĕ kơ pơma hơlĕnh” păng Kră Yang tơbăt tơdrong ‘noh Kră Yang “hơreh” (trong 17b). Tơdrong đei khan âu hli krưp dêh kơ lăm tơdrong pơkă dah mă pơkă lăm tơdrong ưh kơ ‘lơ̆ng trŏ, păng tơdrong pơma âu să lanh kơ lăm dôm tơdrong hơlĕnh păng tơdrong mă ưh kơ tơpă. Yua kơ Kră Yang ‘Bok Kei-Dei jơ̆ Kră Yang mă tơpăt na Sư areh kơ dôm tơdrong mă ưh kơ tơpăt thoi noh.
Arih sa lăm hnam dơnŏ, tơdrong bơtho âu jơ̆ tơpă wă kơ arih sa tơpă lăm hnam dơnŏ. Mĕ ‘bă arih kăl kơ tơpăt păng pơma tơpăt păng pơm hơtŏ kơ kon hơ’lơ̆p. Hnam dơnŏ kăl kơ pơjing tơiung hăm tơdrong tơpăt păng hơmet tơdrong ưh kơ tơproh hăm tơdrong sơlam hiôk ‘lơ̆ng. Kon hơ’lơ̆p đei arih pơhrăm iŏk đơ̆ng mĕ ‘bă sư arih tơpăt păng băt mơnat. ‘noh jơ̆ tơ’bôh pơchrang hơdah tơdrong ‘Bok Kei-Dei lăm tơdrong ‘lơ̆ng tơpăt hăm tơdrong ‘mêm mơnat. Arih tŏk ‘bŏk teh đak đei lơ tơdrong tơklah păng tơdrong ưh kơ tơpăt, Kră Yang oei krao bơ̆n arih pha kơ lu sư. Arih tơpăt ưh kơ sĭ bơ̆n băt đơ̆ng nơ̆r bơtho ôh, mă lei tơdrong bơ̆n đei pơma bơ̆n đei pơm rim năr. Kơplah đei pơma tơpăt, jơhngơ̆m ưh kơ đei rong tơdrong kơnê̆ păng dôm tơ’bưh đei pơjing tơiung hăm tơdrong tơpă păng ‘mêm mơnat, hnam dơnŏ păng Khŭl Bơngai Lui gô pơchrang hơdah a-năn Kră Yang ‘Bok Kei-Dei.
Ơ Kră Yang, apinh Ih tơgŭm inh arih tơpăt bơ̆t anăp Ih păng hăm đĭ đăng bơngai. Apinh ih bơwei jơhngơ̆m wă kơ hoei kơ đei tơdrong hơlĕnh păng tơdrong wă ‘maih pơm kơnê̆. Apinh ăn kơ inh pơchrang hơdah tơdrong tơpăt, hơđơ̆ng păng tơdrong ‘mêm đơ̆ng Sư rim năr. Krao khan yua anăn Kră Yang Yêsu Krist, Amen.
Tơdrong kiơ ba ăn kơ bơ̆n đei arih tơpăt tơpă dih băl?
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: Sachari 10
Kênh Youtube BHKTHN:
