Lêwi 19:1-2, 11; Mathiơ 5:13-16
“Lu iĕm ‘nĕ kơ tơtông, kư̆m ‘nĕ kơ hơlĕnh ‘nĕ kơ chă pơdăr đon đe.” (Lêwi 19:11)
Nơ̆r jet tơchĕng pơwao:
– Lăm pah so; Kră Yang ‘Bok Kei-Dei khan tơtă kơ đĭ đăng kon pơlei Kră Yang tơdrong kiơ?
– Lăm pah ‘nao, Kră Yang Yêsu bơtho kơ lu bơngai piơhrăm păng Sư arih mă trŏ thoi yơ?
– Bơ̆n tơ’bôh tơdrong tơpăt tơpă păng pơchrang hơdah tơdrong Kră Yang kơ hnam dơnŏ păng bơngai nai thoi yơ lăm tơdrong arih rim năr?
Lăm pah so sơ̆, Kră Yang ‘Bok Kei-Dei pơkă khan kon đĭ đăng kon pơlei Kră Yang: “Roi tơbăt ăn bĕ kơ đĭ-đăng kon pơlei Isơrael khul akŭm, lu iĕm athei oei sa mă ‘lơ̆ng rơgoh bĕ, yua kơ Inh Kră Yang lu iĕm ‘lơ̆ng rơgoh.” (trong 2). ‘Lơ̆ng rơgoh wă khan klah ‘măn lê̆ kơ ‘Bok Kei-Dei păng arih ‘lơ̆ng rơgoh lăm tơdrong arih rim năr (I Pêtrôs 1:15-16). Yua kơ bơ̆n jơ̆ kon ‘Bok Kei-Dei ‘lơ̆ng rơgoh, tơdrong arih bơ̆n athei pơm tơ’bôh jơhngơ̆m tơpăt tơpă păng ‘lơ̆ng tơpăt Kră Yang. Nơ̆r ‘Bok Kei-Dei khan hơđăl: “Kră Yang areh kơ lu bơngai pơma hơlĕnh pơdăr; Mă-lei Sư lăp đon kơ lu bơngai pơma tơpăt.” (Tơdrong Pơđơ̆k 12:22).
Lăm Lêwi 19: 11, tơdrong ‘lơ̆ng rơgoh đei pơm tơ’bôh đơ̆ng bơ̆n pơm tơ’bôh tơpă: ‘Nĕ kơ tơtông, ‘nĕ kơ pơhlŭ hơlĕnh, ‘nĕ kơ chă plêl pơdăr. Tơdrong arih thoi noh bơwei jơhngơ̆m lui gơnang păng tơpăt lăm khul tơpôl. Tơtông lê̆ tơdrong tơpăt, pơma hơlĕnh ưh hiôk dih băl păng plêl pơdăr pơm, kơ teh đak rŭng răng. Kơlih thoi noh, arih tơpăt noh bơih tơ’bôh tơdrong ‘Bok Kei-Dei ‘lơ̆ng rơgoh păng ưh kơ tơplih.
Truh tơ jơhnơr pah ‘nao, Kră Yang Yêsu pơma hơđăl kơ nơ̆r athei ‘nâu kơplah Sư bơtho kơ lu bơngai pơhrăm păng Sư khan “iĕm thoi lĕ kơ ‘boh” păng “lu iĕm thoi lĕ kơ hơdah jơ̆p kơ teh đak” (Mathiơ 5:13-16). ‘Boh bơwei păng pơm kơ tơmam huay kơ ôm; hơdah sŭt lê̆ măng mu păng pơchrang hơdah kơ bơngai nai. Dah ‘boh jing sap dah ŭnh kơđeng iŏk rĕo klơ̆p lê̆, lu sư jing ưh kơ yua kiơ ôh. Kơlih kơ thoi ei, tơdrong ‘lơ̆ng rơgoh ưh kơ sĭ khan tơdrong arih bơ̆n kơdih na kư̆m athei pơm tơ’bôh tơgah nguaih; tơ jê̆ păng hơđăl hloh ‘noh lăm hnam dơnŏ đơ̆ng arih păng pơm ‘lơ̆ng.
Kră Yang Yêsu bơih mă arih ‘lơ̆ng tơpăt trŏ tôm tơdrong. “Sư ưh kơ đei pơm minh tơdrong yoch kiơ, păng Sư ưh kơ đei layơ hơlĕnh kơ đe.” (I Pêtrôs 2:22). Kơplah bơ̆n yak kiơ̆ Kră Yang păng ăn kơ Yang Bơhngol ‘Lơ̆ng pơgơ̆r, tơdrong arih bơ̆n gô pơm tơ’bôh tơdrong tơpăt păng arih tơpăt trŏ. ‘Boh oei pơm thoi ‘boh pơm pơgăn lê̆ tơdrong pơm ‘lơ̆ng păng pơm hơdah chông ba lơ bơngai nai năm tơ Kră Yang.
Mă khan lei ră, arih trŏ ưh kơ sĭ khan ‘bônh ôh. Lăm teh đak dang ei, dah đe lăng “nơ̆r pơma hơlĕnh iĕ ioch đĕch” noh hmă đĕch, dah pơm kơdih akâu hiôk lăp đon, lei na tơdrong bơwei tơdrong tơpăt jing minh nơ̆r pơm kơdranh pran. Dah bơ̆n arih iŏk tơdrong tơpăt lăm nơ̆r pơma tơpăt lăm tơdrong jang, păng tơpăt lăm tơdrong tơ’bưh băl tơduă, tơdrong arih bơ̆n gô pơm tơ’bôh tơdrong ‘lơ̆ng rŏ Kră Yang ‘Bok Kei-Dei păng pơm kơmĭl kơ kon sâu. Tơdrong tơpăt ưh kơsĭ ba ăn tơdrong pơm kơ bơ̆n kơdih, hnam dơnŏ bơ̆n kơdih đĕch ôh, na kư̆m ưang kơ Kră Yang păng ‘bơ truh tơ’nhŏng oh, kơ tum kơtŏng adrĕch adrŭng hai mơ̆n.
Ơ Kră Yang, apinh tơgŭm inh arih ‘lơ̆ng rơgoh păng tơpăt tơpă, wă kơ tơdrong arih inh jing ‘boh păng ŭnh hơdah, ưang anăn Kră Yang păng chông ba bơngai nai năm tơ Ih. Krao khan yua Anăn Kră Yang Yêsu Krist, Amen.
Bơ̆n pơkă pơkăm wă tơplih tơdrong kiơ wă kơ tơdrong arih ‘lơ̆ng rơgoh?
Đŏk Sơ̆p hla bơar ‘Bok Kei-Dei lăm pêng sơnăm: Sachari 9
Kênh Youtube BHKTHN:
