Klei Aê Diê Blŭ: Bruă Lêwi 19:1-2, 11; Y-Mathiơ 5:13-16
Êlan kliăng: “Đăm tlĕ, đăm mplư, kăn luar pô mkăn rei” (Bruă Lêwi 19:11)
Klei êmuh ksiêm mĭn: Ya mta klei Khua Yang mtă kơ jih jang phung ƀuôn sang Ñu hlăm ênuk Klei Bi Mguôp Hđăp? Si klei Khua Yang Yêsu mtô phung ƀĭng kna hdĭp kpă ênô hlăm ênuk Klei Bi Mguôp Mrâo? Si drei bi êdah klei sĭt kpă leh anăn klei mngač Khua Yang kơ gŏ sang drei leh anăn kơ mnuih mkăn hlăm klei dôk hdĭp grăp hruê?
Hlăm ênuk Klei Bi Mguôp Hđăp, Yêhôwa mtă kơ jih jang phung ƀuôn sang Ñu: “Brei diih jing doh jăk, kyuadah Kâo, Yêhôwa Aê Diê diih jing doh jăk” (êlan 2). Doh jăk mblang jing pioh hjăn kơ Aê Diê leh anăn dôk hdĭp doh jăk grăp hruê (I Y-Pêtrôs 1:15-16). Kyuadah drei jing phung anak Aê Diê doh jăk, brei klei hdĭp drei bi êdah knuih sĭt leh anăn kpă ênô Ñu. Klei Aê Diê Blŭ lač klă: “Yêhôwa bi êmut kheh kơ êlah blŭ klei luar, ƀiădah Ñu mơak hŏng phung blŭ klei sĭt.” (Klei Bi Hriêng 12:22).
Hlăm Bruă Lêwi 19:11, klei doh jăk bi êdah hŏng bruă ngă sĭt êdi: Đăm tlĕ, đăm mplư, kăn luar pô mkăn rei. Knhuah hdĭp msĕ snăn srăng răng mgang klei đăo knang leh anăn klei kpă ênô hlăm êpul êya. Klei tlĕ bi rai klei mtăp mđơr, klei blŭ luar bi êka klei bi mguôp, leh anăn klei mplư bi rŭng ala ƀuôn. Kyuanăn, dôk hdĭp sĭt kpă yơh jing ktlă mtrang knuih doh jăk, leh anăn amâo tuôm mlih mơ̆ng Aê Diê.
Truh kơ ênuk Klei Bi Mguôp Mrâo, Khua Yang Yêsu kñăm klei iêô mthưr anei hlăk Ñu mtô kơ phung ƀĭng kna jing “Hra kơ lăn” leh anăn “Klei mngač kơ lăn ala” (Y-Mathiơ 5:13-16). Hra răng pioh leh anăn mgang klei brŭ rai; klei mngač suôt đuĕ klei mmăt leh anăn mtrang êlan kơ mnuih mkăn. Tơdah hra luč klei msĭn amâodah klei mngač arăng guôm hĕ, diñu srăng jing mnơ̆ng hơăi mang. Kyuanăn, klei doh jăk amâo knŏng jing klei hdĭp kơ hjăn pô dê ôh, ƀiădah brei bi êdah kơ êngao; jĕ giăm hĭn leh anăn sĭt klă hĭn jing kơ gŏ sang, hŏng klei dôk hdĭp kpă ênô leh anăn bruă jăk.
Khua Yang Yêsu jing Pô hdĭp leh jăk klă. “Ñu amâo tuôm ngă soh ôh, kăn arăng tuôm hmư̆ klei luar mơ̆ng ƀăng êgei Ñu rei.” (I Y-Pêtrôs 2:22). Tơdah drei êbat tui hlue Khua Yang čiăng kơ Yang Mngăt Jăk atăt gai, klei hdĭp drei srăng ktlă mtrang klei kpă sĭt anăn hŏng klei hngah kơ klei blŭ mplư luar, čuăn ruah klei sĭt leh anăn hdĭp kpă ênuah. Drei dôk jing hra kăp mkhư̆ mgang hĕ klei bi rai klei ênuah ênô leh anăn klei mngač atăt mnuih mkăn hriê kơ Khua Yang.
Ƀiădah lĕ, dôk hdĭp ênuah ênô amâo êlưih ngă nanao ôh. Hlăm klei hdĭp ala ƀuôn hruê anei, arăng dlăng “klei blŭ luar điêt” jing bhiăn ngă, amâodah êlưih tŭ ư kyua tŭ dưn kơ pô, snăn klei djă pioh klei sĭt kpă mjing klei hưn bi sĭt ktang kjăp. Tơdah drei čuăn ruah dôk hdĭp kpă ênuah hlăm klei blŭ, sĭt kpă hlăm bruă ngă, leh anăn mtăp mđơr hlăm jih jang klei bi mguôp, klei hdĭp drei srăng ktlă mtrang klei guh kơang Aê Diê leh anăn brei klei bi hmô klă nik kơ anak čô. Klei kpă ênuah amâo knŏng ba klei jăk mơak kơ hjăn pô, kơ gŏ sang drei pô ƀiădah wăt bi guh kơang kơ Khua Yang leh anăn bi hmăi jăk truh kơ găp djuê, djuê ana.
Ya mta klei drei ƀuăn rơ̆ng bi mlih čiăng klei hdĭp doh jăk?
Wah lač: Ơ Khua Yang, đru kâo dôk hdĭp doh jăk leh anăn ênuah ênô, čiăng kơ klei hdĭp kâo jing hra leh anăn klei mngač, mpŭ mni Anăn Khua Yang leh anăn atăt ba mnuih mkăn kơ Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Sakari 9
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
