Efexus 4:32
Nqe cim zaj kawm:
“Nej yuav tsum ua siab dawb siab zoo, ib tug hlub ib tug, thiab ib tug zam txim rau ib tug, ib yam li Vajtswv twb zam txim rau nej cov uas ntseeg Yexus Khetos lawm.” (Efexus 4:32)
Phau Txhais Tshiab HMOWSV: “Cia li muaj lub siab khuvleej, siab tab ncuab, siab zam txim ib leeg rau ib leeg ib yam li Vajtswv zam txim rau nej hauv Khetos.”
Lus nug xav:
– Lub siab khuvleej, siab tab ncuab thiab siab zam txim muaj lub ntsiab lus li cas?
– Vim li cas cov ntseeg Yexus yuav tsum ua neej ncajncees thiab sib hlub hauv tsevneeg?
– Peb yuav hloov peb txojkev ua neej hauv tsevneeg li cas?
Lub neej hauv tsevneeg yog qhov chaw uas peb txojkev ntseeg raug sim thiab qhia tshwm meej tshajplaws. Efexus 4:32 hais txog ib lo lus samhwm yooj yim tiamsis muaj lub ntsiab lus tob heev los coj lub neej ntseeg hauv tsevneeg, uas yog: khuvleej, tab ncuab thiab zam txim. Tej no yog yam qhia tshwm txog lub neej uas muaj kev ncajncees thiab kev hlub hauv tsevneeg.
Qhov xubthawj, kev ua neej ncajncees qhia tshwm dhau ntawm lub siab khuvleej thiab lub siab tab ncuab. Kev ua neej ncajncees tsis yog tsuas zam yam tsis yog xwb, tiamsis kuj yog rau siab ua qhov tseeb qhov yog tabmeeg Vajtswv xubntiag thiab. Tus kws qhia Vajluskub Jones Spence piav lub ntsiab lus ntawm ob lo lus no meej heev. “Siab khuvleej” lossis “siab ua zoo” txhais hais tias muaj tus cwjpwm qab zib, ntxim nyiam, kovyeej txhua yam kev ua nruj ua tsiv, txhawb nqa txhua yam kev mos muag thiab kev zoo; ua zoo rau lwm tus thiab coj tus yamntxwv puv npo txoj koob hmoov hlub. Hos “siab tab ncuab” yog hais txog kev nkag siab lwm tus, tsis txhob ua nruj dhau rau lwm tus qhov txhaum, vim peb tus kheej los kuj muaj kev txhaum thiab. Hauv tsevneeg, kev ua neej ncajncees qhia tshwm dhau ntawm tej yam uas pom zoo li me me, xws li: tej yam peb ua thaum muaj kev ntxhov siab, tej lus peb hais thaum muaj kev tsis sib haum, hmov tshua txog tej kev cheemtsum thiab kev xav ntawm cov neeg hauv yus tsevneeg; tej no yeej yog suav tas nrho kev tso tseg kev tsimtxom, kev quab yuam ntawm txij nkawm thiab menyuam.
Qhov ob, kev ua neej sib hlub qhia tshwm dhau ntawm kev zam txim hauv tsevneeg. Txojkev hlub qhia tshwm meej tshajplaws yog dhau ntawm kev zam txim. Lub ntsiab ntawm lo lus “zam txim” lossis “ua siab ntev nyiaj” hais txog ntawm no yog hais ntsig txog lo lus “txoj koob hmoov hlub” uas Timthawj Paulus siv los piav txog Vajtswv txojkev cawmdim hauv Tswv Yexus Khetos (Efexus 2:5, 7-8). Thaum ua neej nyob hauv tsevneeg, kev mob siab yeej zam tsis dhau, tiamsis kev iab siab tsis tsimnyog muaj nyob. Kev zam txim yog tso tseg kev chim thiab xaiv muab txoj koob hmoov hlub rau lwm tus. Kev zam txim qhia tshwm txog txojkev zam txim uas peb twb tau txais hauv Tswv Yexus Khetos lawm . Thaum peb zam txim, peb rhuav txojkev chim ib ntus dhau ib ntus, thiab coj kev rov sib haum los ua neej sib raug zoo nrog lwm tus.
Cov ntseeg Tswv Yexus ua neej ncajncees thiab sib hlub vim peb twb tau txais txojkev hlub tshua thiab kev zam txim ntawm Tswv Yexus Khetos, tus uas muab Nws tus kheej los theej peb tej kev txhaum. Yog peb tsis zam txim thiab tsis khuvleej lwm tus, tshwjxeeb yog cov hauv peb tsevneeg, ces peb tabtom ua neej tawmtsam Nws txojkev hlub.
Lub homphiaj ntawm tsevneeg yuav tsum yog zam li Tswv Yexus Khetos: “ib yam li Vajtswv twb zam txim rau nej cov uas ntseeg Yexus Khetos lawm.” Thaum Tswv Yexus yog tus nyob nruab nrab, tsevneeg yuav dhau los ua qhov chaw puv nkaus kev ncajncees, kev hlub, kev kaj siab lug, thiab yuav yog ib lo lus timkhawv zoo txog tus Tswv. Cia peb xav txog txojkev zam txim uas Tswv Yexus Khetos twb pub rau peb lawm, kom txojkev zam txim ntawd hloov peb txojkev ua neej hauv peb tsevneeg.
Thov Vajtswv,
Tus Tswv, ua Koj tsaug uas Koj hlub tshua thiab zam txim rau nyuam yaus. Thov Koj qhia nyuam yaus ua neeg muaj lub siab khuvleej, siab tab ncuab thiab siab zam txim hauv nyuam yaus tsevneeg, ib yam li Koj twb zam txim rau nyuam yaus hauv Tswv Yexus Khetos lawm. Nyuam yaus tuav Tswv Yexus Khetos lub npe thov, Amees.
Yam dabtsi tabtom txwv tsis pub peb zam txim rau peb tsevneeg?
Nyeem Vajluskub hauv peb lub xyoos: Xakhaliyas 6
Kênh Youtube BHKTHN:
