Klei Aê Diê Blŭ: Kôlôs 3:18-25
Êlan kliăng: “Ya mta bruă diih ngă, ngă bĕ hŏng jih ai tiê, msĕ si mă bruă kơ Khua Yang, amâo djŏ kơ mnuih ôh.” (Kôlôs 3:23)
Klei êmuh ksiêm mĭn: Si Klei Aê Diê Blŭ mtô êlan hdră hdĭp kpă ênô kơ gŏ sang phung đăo kơ Krist? Ya jing atur hdĭp kpă ênô hlăm gŏ sang hruê êlâo leh anăn hruê anei?
Gŏ sang jing hdră čuăn mơ̆ng Aê Diê pô mkŏ mjing. Jih jang mnuih brei hdĭp tui hlue hnơ̆ng čuăn kpă ênô mơ̆ng Aê Diê, bi mpŭ hdơ̆ng pô kyua huĭ mpŭ kơ Aê Diê, čiăng dưi mâo klei jăk mơak Aê Diê brei. Tơdah Khua Yang jing Khua sĭt kơ gŏ sang snăn kơh jih jang mnuih dôk hdĭp kpă ênô, hdĭp thâo bi mpŭ mâo pruê̆ êlan gŭ dlông, êlâo êdei leh anăn kjăp rơ̆ng. Tui tluôn anăn, brei mô̆ mpŭ kơ ung, wăt tơdah ung amâo bi leh bruă klam ñu duah ƀơ̆ng čiêm rông, amâodah klei hriăm hră mơar ƀiă hĭn kơ mô̆… klei gưt asăp amâo mblang ung jing djŏ nanao, mô̆ amâo dưi mâo asăp blŭ, amâodah brei gưt asăp wăt tơdah ung bi kdơ̆ng hŏng Klei Aê Diê Blŭ ôh, amâodah brei mô̆ tŭ jih klei ung ngă jhat…, ƀiădah čiăng lač klei mpŭ kơ ung jing pô bi ala kơ klei hdĭp myang, jing pô kiă kriê gŏ sang. Blŭ mdê hĭn, ung mâo bruă klam atăt gŏ sang hlăm klei đăo, mâo bruă klam “Phung êkei mâo mô̆, khăp bĕ kơ mô̆ diih. Đăm ngă khăng hŏng diñu ôh” (êlan 19). Klei jing ung mô̆ jing klei bi mguôp kluôm jih klei hdĭp amâo djŏ knŏng khăp tui si klei bi djhưng ai, bi mlih hlue si hrue mlan ôh. “Ngă khăng” jing klei dôk dơ̆ng ƀơ̆ng huă kƀah klei khăp, ngă bi ruă êka mnuih mkăn hŏng klei blŭ, hŏng knuih amâodah ngă klei dưi. Khua ƀĭng kna Y-Pêtrôs mtă mtăn kơ phung jing ung “Msĕ mơh, Ơ phung ung, brei diih dôk dơ̆ng ƀơ̆ng huă hŏng mô̆ diih hŏng klei thâo mĭn, mpŭ kơ mô̆ jing phung awăt hĭn hlăm asei mlei, kyuadah diñu jing phung dưn mbĭt klei pap kơ klei hdĭp, čiăng kơ amâo mâo klei bi gun ôh kơ klei diih wah lač.” (I Y-Pêtrôs 3:7).
Bi kơ phung jing anak, brei gưt asăp leh anăn mpŭ kơ amĭ ama, ƀiădah kơ Khua Yang ăt jing mrô sa êlâo hĭn kơ amĭ ama hlăm klei mă bruă kơ Khua Yang (Y-Luk 14:26). Amĭ ama amâo blŭ amâodah ngă klei amâo djŏ, ngă kơ phung anak čô ăl, êdu ai ôh. “Mngal” jing klei dôk dơ̆ng ƀơ̆ng huă dlăng kơ mnuih mdê mdê, mưč mač ngă bi êka ai tiê phung anak, bi mkă anak pô hŏng “anak arăng”, ƀuah ăl, khăng mưč lu hĭn kơ mni.
Klei dôk dơ̆ng ƀơ̆ng huă mnuih mă bruă hŏng khua sang ăt brei hŏng klei huĭ mpŭ kơ Aê Diê msĕ mơh, leh anăn hŏng ai tiê sĭt suôr wăt hŏng khua dleh khăng (I Y-Pêtrôs 2:18). Drei mâo klei mtă mtăn brei ngă msĕ snăn “Kyuadah diih thâo leh diih srăng mă tŭ ngăn dưn mơ̆ng Khua Yang jing klei mưn kơ diih”, leh anăn “Kyuadah hlei pô ngă klei jhat srăng mă tŭ tui si klei jhat ñu ngă leh, leh anăn amâo mâo klei yap mnuih mdê mdê ôh” (êlan 24-25). Knhuah hdĭp thâodah hlăm gŏ sang amâodah ti êngao brei tui hlue hnơ̆ng čuăn KYUA KHUA YANG sơăi, leh anăn Khua Yang srăng mưn amâodah mkra phung gưt ngă hlue amâodah phung amâo gưt ngă hlue.
Hnơ̆ng čuăn dôk hdĭp kpă ênô hlăm gŏ sang phung đăo kơ Krist hruê êlâo ăt msĕ hŏng hruê anei mơh, brei dưm ti dlông atur Klei Aê Diê Blŭ mtô hlăm êlan 23: “…ngă bĕ hŏng jih ai tiê, msĕ si mă bruă kơ Khua Yang, amâo djŏ kơ mnuih ôh”. Grăp boh gŏ sang hdĭp kpă ênô leh anăn thâo bi khăp, srăng mtrang mngač klei guh kơang Khua Yang kơ lu mnuih, gŏ sang mâo klei jăk mơak, leh anăn ƀuôn sang êđăp ênang.
Ya klei drei srăng bi mlih hlăm klei dôk dơ̆ng ƀơ̆ng huă hŏng mnuih hlăm sang tơdah thâo săng kơ klei brei dôk hdĭp kpă ênô?
Wah lač: Ơ Ama kâo khăp! Akâo Ih đru kâo dôk hdĭp kpă ênô, thâo khăp leh anăn mâo bruă klam hŏng jih jang mnuih hlăm sang kyua Khua Yang. Brei knhuah hdĭp gŏ sang kâo mtrang mngač Anăn Khua Yang kơ lu mnuih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Sakari 4
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
