Kaulauxais 3:12-17
Nqe cim zaj kawm:
“Qhov uas tseemceeb dua tej ntawd huv tibsi, nej ib tug yuav tsum hlub ib tug tiag tiag. Yog nej ua li no, nej thiaj yuav nyob taus ua ke.” (Kaulauxais 3:14)
Lus nug xav:
– Timthawj Paulus ceebtoom Vajtswv cov menyuam txog yam dabtsi?
– Tej no muaj feem xyuam li cas rau lub neej hauv tsevneeg?
– Peb tsevneeg ib leeg ua neej nrog ib leeg raws li Vajtswv Txojlus li cas?
Timthawj Paulus siv ntau lo lus los qhuab ntuas txog cov ntseeg Tswv Yexus kev ua neej nrog lwm tus, tshwjxeeb yog hauv tsevneeg. Nws ceebtoom peb hais tias peb yog “Vajtswv haivneeg” uas “Vajtswv hlub” thiab tau xaiv “cia ua nws cov menyuam lawm”. Vim li ntawd, lub neej tshiab hauv Tswv Yexus Khetos yuav tsum ua qhia tshwm dhau ntawm tej uas peb ib tug ua rau ib tug: “nej yuav tsum hlub lwm tus thiab ua siab zoo tsis txhob khavtheeb, tiamsis muaj lub siab mos siab muag thiab ua siab ntev” (nqe 12).
Tsevneeg yog thawj qhov chaw uas peb txojkev ntseeg raug sim. Nov yog qhov chaw uas qhia tshwm peb tus yamntxwv tseeb meej tshajplaws. Vim li ntawd, Timthawj Paulus qhia tias lub neej ncaj ncees thiab muaj kev hlub tsis pib ntawm tej kevcai, tiamsis pib ntawm txoj koob hmoov hlub. Peb hlub thiab zam txim rau lwm tus vim Vajtswv twb hlub thiab zam txim rau peb lawm. Thaum txhua tus hauv tsevneeg paub tias lawv yog Vajtswv tug thiab tau txais Nws txojkev hlub pub dawb lawm, ces txhua txojkev sib raug zoo yuav pib hloov. Tsis muaj leejtwg yuav nrhiav kev ua kom luag lees paub nws tej txiajntsig ntxiv lawm; tiamsis sawvdaws yuav kawm ua neej nyob hauv txoj koob hmoov hlub uas ib leeg muaj rau ib leeg.
Ib yam tsawg tsis tau uas tsevneeg yuav tsum muaj yog kev zam txim. “Yog nej cov muaj ib tug ua txhaum rau ib tug, nej ib tug yuav tsum zam txim rau ib tug, ib yam li Vajtswv twb zam txim rau nej lawm” (nqe 13). Txhua tsevneeg yeej muaj tej lub sijhawm muaj kev tsis sib haum thiab kev mob siab. Yog tsis muaj kev zam txim, txojkev iab siab yuav maj mam rhuav tshem kev sib haum xeeb. Tiamsis thaum peb xyaum zam txim, ces Txojmoo Zoo yuav muaj sia nyob hauv peb lub neej txhua hnub. Qhov tseemceeb tshaj, Timthawj Paulus hais tias: “Qhov uas tseemceeb dua tej ntawd huv tibsi, nej ib tug yuav tsum hlub ib tug tiag tiag. Yog nej ua li no, nej thiaj yuav nyob taus ua ke” (nqe 14). Kev hlub yog lub hauvpaus uas tuav tsevneeg kom ruaj khov. Vajtswv lub siab nyiam yog kom txojkev ncaj ncees qhia tshwm dhau ntawm txojkev hlub. Thaum ua li no, tsevneeg yuav nyob taus ua ke muaj kev kaj siab lug hauv tus Tswv (nqe 15). Kev kaj siab lug hauv tsevneeg tsis yog txhais hais tias tsis muaj kev tsis sib haum, tiamsis yog cia Tswv Yexus Khetos coj kev daws tej xwm txheej. Thaum Nws ua tus tswjkav, txojkev npau taws yuav raug txo qis, thiab lub siab khavtheeb yuav muag zuj zus.
Tsevneeg ncaj ncees yog tsevneeg uas muab Vajtswv Txojlus ua lub hauvpaus: sib nyeem Vajluskub thiab sib thov Vajtswv. Timthawj Paulus xaus lus hais tias: “Txhua yam uas nej ua, nej yuav tsum ua kom tsimnyog qhov uas nej yog cov ntseeg tus Tswv Yexus. Nej cov uas ntseeg Yexus, nej cia li ua Vajtswv tus uas yog peb leej txiv tsaug” (nqe 17). Thaum txhua lo lus hais, txhua kev txiav txim siab thiab txhua tes haujlwm ua yog vim tus Tswv, ces tsevneeg yuav dhau los ua qhov chaw pehawm Vajtswv uas muaj sia. Kev ua neej ncaj ncees thiab sib hlub tsis yog ua kom zoo kawg nkaus, tiamsis yog cia Tswv Yexus Khetos hloov txhua txojkev sib raug zoo me me hauv peb lub neej txhua hnub.
Thaum peb cia txojkev hlub tshua hloov kev nruj tsiv, kev zam txim hloov kev iab siab, thiab cia txojkev hlub coj txhua txojkev sib raug zoo, ces peb tsevneeg yuav qhia tshwm Vajtswv lub Tebchaws. Thiab Txojmoo Zoo yuav pib ntawm peb lub tsev tawm mus.
Thov Vajtswv,
Tus Tswv, thov Koj pab kom nyuam yaus ua neej ncaj ncees thiab muaj kev hlub hauv nyuam yaus tsevneeg. Thov cia nyuam yaus tsevneeg dhau los ua qhov chaw qhia tshwm Koj txoj koob hmoov hlub, kev zam txim thiab Tswv Yexus Khetos txojkev kaj siab txhua hnub. Nyuam yaus tuav Tswv Yexus Khetos lub npe thov, Amees.
Ib tsoom cov mloog uas hmov thiab tshua,
Yam dabtsi qhia tias peb tsevneeg yog qhov chaw xyaum lub neej tshiab hauv tus Tswv?
Nyeem Vajluskub hauv peb lub xyoos: Xakhaliyas 2-3
Kênh Youtube BHKTHN:
