Hơriso 9:1-14
“Kră Yang jơ̆ anih kơ’nơp tih kơ bu mă đe pơjuă pơđep. Minh anih kơ’nơp tih lăm năr đei gleh truh” (Hơriso 9:9)
Nơ̆r jet tơchĕng pơwao:
– Pơtao Đawit ư-ang gah lăm păng tơdrong ‘lơ̆ng ayơ gah Kră Yang?
– Kơplah lăm tơdrong hli krê, kăl kơ đei dŏng pơklaih ngay, mălei pơtao Đawit đei pơm tơdrong kiơ adrol hloh?
– Lu bơ̆n pohrăm iŏk tơdrong kiơ lăm chăl arih gơnang kơ Kră Yang đơ̆ng ‘bok Đawit?
Pơih blŭng a Hơriso 9, Pơtao Đawit đĭ jơhngơ̆m bơnê păng ư-ang kơ Kră Yang yua kơ Kră Yang bơih Yang mơsêh, pơm lu tơdrong hlĭch chrơp tih hloh kơ tơdrong gơh păng tơchĕng kon bơngai bơ̆n (trong 1) păng tơdrong pơtrơp nơ̆r bơnê ư-ang lu tơdrong ‘lơ̆ng lăm Kră Yang, Kră Yang bơih tơngla đei kơdih, Sư pơgơ̆r ling lang (trong7). Sư gô sek tơlang teh đak hăm tơdrong tơpăt, Sư sek tơlang hăm tơdrong trŏ ưh kơ đei pơdê kơ bu, Sư pơgơ̆r tơpăt na sek tơlang kon bơngai hăm tơdrong trŏ (trong 8). “Yua kơ Ih wei dŏng păng ăn kơ inh gơh jei; Ih oei tơ kơpal tangdŏ pơtao sek tơlang tơpăt. Kră Yang jơ̆ anih kơ’nơp tih kơ bu mă đe pơjuă pơđep. Minh anih kơ’nơp tih lăm năr đei gleh truh” (trong 4,9). Kră Yang pơrăm bơih lu bơngai kơnê̆, Ih sŭt lê̆ bơih dôm anăn lu sư ling lang hlŏng hloi (trong 5,6). Kră Yang trŏ kơ bơ̆n lui gơnang “Bơngai bu băt anăn Ih gô gơnang kơ Ih; Yua kơ Ih ưh kơ achăng lê̆ ôh, bơngai bu chơchă Ih.” (trong 10). Kră Yang ‘bĕnh kơ todrong ‘mêm, hiơ̆k kơ dôm tơdrong sơ’ngon rim bơngai păng ưh kơ đei layơ hiơt tơdrong nhơ̆m ôr (trong 12).
Kơplah đŏk trong 13, lu bơ̆n ‘bôh hlĭch dêh yua kơ ‘bôh Pơtao Đawit tơ’bơ̆p tơdrong truh pơmat, kăl kơ đei dŏng pơklaih ngay mălei sư ưh kơ đei hăt hot roi tơdrong anat sư kơ Kră Yang mălei sư ‘măn adrol hloh noh đon lui kơ Kră Yang (trong 1, 2). Pơtao Đawit đĭ jơhngơ̆m ư-ang tơdrong ‘lơ̆ng rŏ lăm Kră Yang. Sư đei ră roi ming dơ̆ng đêl mơn ‘bôh tơdrong mơsêh Kră Yang pơm, tơdrong tơpăt păng jơhngơ̆m ‘mêm Kră Yang đơ̆ng sơ̆, păng lui kơjăp kơ Kră Yang jô̆ anih kơ’nơp tih.
Pơhrăm băt gah lăm păng tơdrong pơm ‘lơ̆ng Kră Yang tơgŭm đon lui lu bơ̆n kơjăp, ling lang gô đei tơdrong pŭn păng dŏng pơklaih đơ̆ng Kră Yang đơ̆ng sơ̆ tơgŭm ăn kơ lu bơ̆n hơđơ̆ng mă tơ’bơ̆p tơdrong pơmat tat truh, hiôk hơđơ̆ng chang gô tơdrong dŏng pơklaih lăm năr Kră Yang. Bơngai bu lui gơnang tơpă kơ Kră Yang gô tơchĕng tơ Kră Yang jơ̆ ‘Bok chĕp tơdrong arih tơ anăp, ưh kơ lê̆ chăl arih pơm kơ đon lui rŭng răng. Phŏ lăp Kră Yang đei ăn kơ lu bơ̆n yak hlôi kial hơbŭt wă kơ băt kơnăl đon lui păng hlôi mơn tơdrong mơsêh Kră Yang, tơdrong tơpăt păng tơdrong ‘mêm mơnat Kră Yang. Mă khan lu bơ̆n âu bu, mă oei arih thoi yơ, Kră Yang kư̆m oei krao wơ̆n lu bơ̆n kơ’nơp lăm Kră Yang wă kơ ‘bôh mơn tơdrong ‘mêm păng tơdrong mơsêh dŏng pơklaih Sư.
Ơ Kră Yang, mơsêh tơpăt păng ‘mêm mơnat! Inh bơnê kơ ih yua kơ ih bơih ling lang anih mă inh kơ’nơp hơđơ̆ng kơplah inh đei tơdrong truh, Ih ling lang mơ̆ng nơ̆r inh krao khan apinh păng băt tơdrong kiơ ‘lơ̆ng ‘măn kơ inh. Apinh ‘Bă ‘mêm tơgŭm inh gơnang đon lui kơjăp, băt mơn hiôk hơđơ̆ng, chang hơmĕng, Apinh Ih ăn kơ chăl arih inh băt ưang păng bơnê kơ Kră Yang, krao khan yua anăn Yêsu Krist, Amen.
Lu bơ̆n đei mơn đêl gah tơdrong dŏng pơklaih Kră Yang kơplah tơ’bơ̆p pơmat thoi yơ?
Đŏk Sơ̆p Hla bơar ‘Bok Kei-Dei lăm pêng sơnăm: Sachari 1
Kênh Youtube BHKTHN:
