Klei Aê Diê Blŭ: Klei Mphŭn Dơ̆ng: 12:10-20
Êlan kliăng: “Ênuk anăn mâo klei ư̆ êpa hlăm čar anăn. Snăn Y-Abram trŭn nao kơ čar Êjip čiăng dôk êjai tinăn, kyuadah klei ư̆ êpa prŏng hlăm čar”(Klei Mphŭn Dơ̆ng: 12:10)
Klei Êmuh ksiêm mĭn: Ya klei Y-Abram tuôm tơdah dôk hlăm krĭng lăn Aê Diê ƀuăn? Klei čuăn nao ti krĭng Êjip brei ƀuh si mnuih Y-Abram jing? Ya klei Aê Diê ngă leh leh anăn si boh tŭ mâo? Si drei dôk êbat hlăm êlan tui hlue Khua Yang?
Wăt tơdah krĭng Kanaan mâo leh mnuih dôk ƀiădah Aê Diê bi mklă hŏng Y-Abram Ñu srăng brei krĭng lăn kơ djuê ana ñu (Klei Mphŭn Dơ̆ng: 12:4). Kyua anăn, gŏ sang ñu kkuh mpŭ kơ Aê Diê leh anăn hdĭp mda tinei. Khădah snăn krĭng lăn ƀuăn amâo msĕ si klei ƀuăn ôh kyua klei gŏ sang Y-Abram tuôm amâo djŏ jing klei jăk mơak ôh ƀiădah jing gưl ư̆ êpa mâo hlăm krĭng (êlan 10). Klei Aê Diê Blŭ lač “klei ư̆ êpa prŏng”, leh anăn klei Y-Abram čuăn jing ba jih gŏ sang nao ti krĭng lăn Êjip ti nah dhŭng čiăng duah hdră duh ƀơ̆ng.
Êjip jing anôk mdrŏng sah, kyua mâo êa krông Nile anăn phŭn mnơ̆ng ƀơ̆ng lu snăk, ƀiădah Y-Abram thâo klă anei jing anôk bŏ hŏng klei soh. Ñu lŏ ƀuh kơ boh klei digơ̆ năng ai tơl mdjiê ung tlĕ mô̆, ƀiădah hrô kơ dôk tinăn leh anăn đăo knang kơ klei Aê Diê mkăp, amâodah ƀiă êdi jing duah klei Ñu ktrâo lač, snăn čiăng răng mgang ñu pô, ñu ăt čuăn nao tinăn mơh, leh anăn ñu bi mĭn hdră srăng tlă anăp hŏng klei mtô mô̆ blŭ luar kơ klei jing ung mô̆. Ñu ăt ruah klei dôk ñăt kriêp tơdah arăng ba mô̆ pô hlăm sang mtao. Klei anei brei ƀuh Y-Abram ăt jing anak mnuih êdu awăt, bŏ hŏng klei huĭ hyưt leh anăn bi mĭn kơ pô. Bruă Aê Diê iêô mthưr leh anăn brei klei ƀuăn kơ Y-Abram amâo djŏ kyua ñu mâo knuih hdĭp jăk hĭn kơ pô mkăn ôh, ƀiădah kyua Khua Yang mâo hdră mdê hjăn kơ ñu.
Aê Diê răng mgang leh anăn kiă kriê pô Ñu ruah leh. Tơdah arăng ba mô̆ Y-Abram hlăm sang mtao, Aê Diê brei leh klei truh kjham snăk hlăm kluôm sang mtao Êjip, ngă kơ diñu thâo jing mnuih diñu ba anăn jing mô̆ Y-Abram. Leh anăn mtam, mtao iêô Y-Abram leh anăn ba wĭt mô̆ kơ ñu, leh anăn suôt gŏ sang ñu nao ti anôk mkăn, lŏ wĭt ti krĭng Kanaan.
Klei lông dlăng jing klei amâo dưi ñĕ ôh tơdah êbat hlue si klei Aê Diê ƀuăn. Y-Abram lĕ buh kyua ñu wơr hĕ klei prŏng prĭn mơ̆ng Pô iêô leh ñu. Hrô kơ đăo knang kơ Aê Diê ñu knang kơ klei thâo pô leh anăn duah hdră msir nao ti Êjip. Ƀiădah bi mni kơ Aê Diê kyua Ñu ăt hrăm mbĭt hŏng mnuih Ñu ruah leh, leh anăn ngă bruă djŏ mmông Ñu. Kyua klei pap Aê Diê, drei ăt dôk lŏ dơ̆ng dôk hlăm klei Ñu ƀuăn. Sĭt nik, hdră êlan tui hlue Khua Yang jing hdră mơ̆ng klei pap, drei êbat hlăm hdră anăn knŏng hlăm klei đăo kơ Khua Yang đuč.
Si drei bi êdah klei đăo kơ Khua Yang, boh nik tơdah klei lông dlăng truh hlăm hdră tui hlue Khua Yang?
Wah lač: Ơ Khua Yang, akâo kơ Ih pap brei kơ kâo kyua tăp năng kâo gĭr msir mgaih klei lông dlăng hŏng klei kâo čiăng hrô kơ đăo knang kluôm dhuôm kơ Khua Yang. Bi mni kơ Ih kyua Ih amâo lui ôh kâo ƀiădah hrăm mbĭt nanao leh anăn đru hlue si mmông Ih . Akâo kơ Ih đru kâo kjăp nanao klei đăo knang leh anăn jao jih klei hdĭp kâo kơ Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: H’Êsther 9
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
